ភ្នំពេញ៖ ដើម្បីសម្រួលដល់ការធ្វើចរាចរណ៍ក្នុងភូមិសាស្ត្ររាជធានីភ្នំពេញ រដ្ឋាភិបាលមហាមិត្តជប៉ុនបានសម្រេចសង់ផ្លូវរថភ្លើងអាកាសមួយខ្សែ ព្រមទាំងផ្តល់រថភ្លើងធុនស្រាលសម្រាប់បម្រើដល់ការដឹកជញ្ជូនអ្នកដំណើរតាមសំណើសុំរបស់រដ្ឋាភិបាលកម្ពុជា។
ព័ត៌មានផ្លូវការពីក្រសួងបរទេសកម្ពុជាបានឱ្យដឹងថា ការផ្តល់ជំនួយសង់ផ្លូវរថភ្លើងលើអាកាសនេះធ្វើឡើងក្នុងពេលដែលប្រមុខរដ្ឋាភិបាលកម្ពុជាបានអញ្ជើញទៅធ្វើទស្សនកិច្ចនៅប្រទេសជប៉ុន។ ក្នុងដំណើរទស្សនកិច្ចនោះ ឯកឧត្តម ស៊ីនហ្សូ អាបេ នាយករដ្ឋមន្ត្រីជប៉ុនបានឯកភាពជំរុញការអនុវត្តគម្រោងអាទិភាពមួយចំនួនដូចជា គម្រោងអភិវឌ្ឍន៍ប្រព័ន្ធដឹកជញ្ជូនអ្នកដំណើរ និងចរាចរណ៍ក្នុងរាជធានី គម្រោងធ្វើឱ្យប្រសើរឡើងនូវប្រព័ន្ធភ័ស្តុភាកម្មនៅកម្ពុជា និងការអភិវឌ្ឍធនធានមនុស្សដើម្បីបម្រើវិស័យឧស្សាហកម្ម។
ហើយក្នុងពេលឆាប់ៗនេះ ជប៉ុននឹងសិក្សាពីគម្រោងបង្កើតផ្លូវរថភ្លើងធុនស្រាលស្វ័យប្រព័ន្ធលើអាកាសដែលនឹងជួយកាត់បន្ថយការកកស្ទះចរាចរណ៍ និងគ្រោះថ្នាក់ចរាចរណ៍ ហើយព្រមទាំងជួយទាក់ទាញភ្ញៀវទេសចរមកកម្ពុជាឱ្យកាន់តែច្រើនឡើងទៀតផង។ គម្រោងផ្លូវរថភ្លើងលើអាកាសនេះនឹងរត់ចេញពីទីក្រុងភ្នំពេញឆ្ពោះទៅព្រលានយន្តហោះអន្តរជាតិដែលនឹងត្រូវចំណាយទឹកប្រាក់ច្រើនរហូតដល់ 800លានដុល្លារអាមេរិក។
គម្រោងនេះត្រូវបានគេរំពឹងថា នឹងកាត់បន្ថយពេលវេលាក្នុងការធ្វើដំណើរ ជួយកាត់បន្ថយការកកស្ទះចរាចរណ៍ក្នុងភូមិសាស្ត្ររាជធានីភ្នំពេញ ហើយអាចលើកកម្ពស់សោភ័ណភាពរាជធានី និងលើកកម្ពស់មុខមាត់កម្ពុជានៅលើឆាកអន្តរជាតិទៀតផង៕
