ក្នុងមួយថ្ងៃ តើស្រ្តីមានគភ៌ក្នុងត្រីមាសដំបូងគួរទទួលទានអ្វី?

ដូចដែលយើងបានដឹងច្បាស់ទាំងអស់គ្នាហើយថា ការញ៉ាំអាហារដែលល្អ និងមានប្រយោជន៍ក្នុងខណៈពេលតាំងគភ៌ នឹងត្រូវបានបញ្ជូនបន្តទៅឱ្យកូនតូចនៅក្នុងផ្ទៃឱ្យបានទទួលសារធាតុអាហារដែលល្អ ដើម្បីនាំយកទៅអភិវឌ្ឍអវយវៈផ្សេងៗឱ្យមានល្អឥតខ្ចោះ ដើម្បីត្រៀមជាស្រេចក្នុងការប្រសូតចេញមកពេញមួយរយៈពេល 9 ខែ។

ពេញមួយរយៈពេលនៃការតាំងគភ៌ អនាគតអ្នកម្ដាយត្រូវតែរលឹកដឹងជាប់ជានិច្ចថា កូននៅក្នុងផ្ទៃ រួមទាំងខ្លួនឯងផងត្រូវការសារធាតុអាហារដែលមានគុណប្រយោជន៍ និងកម្លាំងថាមពលពីអាហាររៀងរាល់ថ្ងៃយ៉ាងជាប់លាប់។ ដើម្បីសុខភាពដែលរឹងប៉ឹងឥតខ្ចោះ ទើបការបានទទួលទានអាហារល្អៗក្នុងខណៈពេលតាំងគភ៌ក្លាយជាក្រោះការពារឱ្យទារកក្នុងផ្ទៃមានសុវត្ថិភាពពីសភាវអន្តរាយផ្សេងៗ ធ្វើឱ្យរាងកាយមានភាពល្អឥតខ្ចោះ។ ដូច្នេះ តើស្រ្តីមានគភ៌គួរទទួលទានអ្វីខ្លះក្នុងត្រីមាសនីមួយៗទាំងបីត្រីមាសនោះ ហើយខាងក្រោមនេះគឺជាគំរូអាហារដែលស្រ្តីមានគភ៌ក្នុងត្រីមាសដំបូងគួរទទួលទានក្នុងមួយថ្ងៃៗ។

# ត្រីមាសដំបូង

អំឡុងពេលនេះ រូបរាងរបស់ស្រ្តីមានគភ៌នៅមិនទាន់ប្រែប្រួលច្រើនទេ អ្នកខ្លះនៅមើលមិនទាន់ដឹងផងថា មានគភ៌។ ទម្ងន់ខ្លួនអាចនៅមិនសូវកើនឡើង ឬអ្នកខ្លះដែលមានអាការចាញ់ខ្លាំង អាចធ្វើឱ្យទម្ងន់ខ្លួនថយចុះទៅវិញក៏មាន។ 1 – 3 ខែដំបូង ស្រ្តីមានគភ៌គួរសង្កត់ធ្ងន់លើអាហារឱ្យបានសម្បូរបែបដើម្បីឱ្យទទួលបានសារធាតុអាហារ និងកម្លាំងថាមពល ដូចជា បាយ ម្សៅ ប្រូតេអ៊ីន ខ្លាញ់ និងវីតាមិន។

គំរូអាហារក្នុង 1 ថ្ងៃ

ពេលព្រឹក

. បបរសាច់ជ្រូកចិញ្រ្ចាំ 1 ចានគោម

. ទឹកដោះគោ 1 ប្រអប់ (ចំណុះ 240 c.c)

. ផ្លែប៉ោម 1 ផ្លែ

ពេលថ្ងៃត្រង់

. គុយទាវសរសៃធំឆាសាច់ជ្រូក 1 ចាន

. បង្អែមចេកខ្ទិះ 1 ចានចង្កឹះ

ពេលល្ងាច

. បាយអង្ករសម្រិត (បាយអង្ករសម្រូប) 2 វែក

. ត្រីប្លាធូចៀន 1 ក្បាល

. សម្លម្ជូរបន្លែរួម 1 ចានគោម

. ចេកណាំវ៉ា 1 ផ្លែ

មុនគេង

. ទឹកដោះគោ 1 ប្រអប់ (ចំណុះ 240 c.c)។

# ត្រីមាសទី 2

នៅពេលបានធូរស្រាលពីអាការចាញ់កូន អនាគតអ្នកម្ដាយនឹងចាប់ផ្ដើមញ៉ាំអាហារបានច្រើនឡើងហើយ ក្នុងខណៈពេលជាមួយគ្នានេះ វិវឌ្ឍនាការខាងរាងកាយរបស់កូនក្នុងផ្ទៃក៏ចាប់ផ្ដើមសាងអវយវៈផ្សេងៗឡើងដែរ។ អាហារក្នុងរយៈពេលនេះ ស្រ្តីមានគភ៌គួរសង្កត់ធ្ងន់លើការបង្កើនសារធាតុដែក កាល់ស្យូម និងវីតាមីនផ្សេងៗ ដើម្បីឱ្យសុខភាពរបស់ម្ដាយរឹងមាំ និងមានចំណែកបង្កើនវិវឌ្ឍនាការរាងកាយរបស់កូនតូចដែលកំពុងតែធំធាត់ក្នុងពេលនេះ។

គំរូអាហារក្នុង 1 ថ្ងៃ

ពេលព្រឹក

– បបរត្រី 1 ចានគោម

– ទឹកដោះគោ 1 ប្រអប់ (ចំណុះ 240 c.c)

– ផ្លែត្របែក 1/2 ផ្លែ

ពេលថ្ងៃត្រង់

– បាយសាច់ជ្រូក 1 ចាន

– ស៊ុបឆ្អឹងជ្រួក 1 ចាន

ពេលល្ងាច

– បាយស 2 វែក

– ត្រីអណ្ដែងអាំង 1 ក្បាល

– សម្លកកូរបន្លែសព្វមុខ 1 ចាន

– ក្រូចឃ្វិច 1 ផ្លែ

មុនគេង

– ទឹកដោះគោ 1 ប្រអប់ (ចំណុះ 240 c.c)

ស្រ្តីមានគភ៌អាចបន្ថែមអាហារចម្អាបក្នុងចន្លោះពេលថ្ងៃត្រង់ ឬមុនពេលល្ងាច 1 ពេលទៀតបាន ដើម្បីមិនបណ្ដោយឱ្យពោះទំនេរ ឬឃ្លានខ្លាំងពេកមុននឹងដល់ពេលបាយចម្បង។

# ត្រីមាសទី 3

អំឡុងពេលចុងក្រោយមុនប្រសូត រាងកាយរបស់អនាគតអ្នកម្ដាយត្រូវការកម្លាំងថាមពលបន្ថែមឡើង។

គំរូអាហារក្នុង 1 ថ្ងៃ

ពេលព្រឹក

– បាយស 2 វែក

– ស៊ុតស្ងោ 1 គ្រាប់

– ទឹកគ្រឿង បន្លែស្រុស

– ទឹកដោះគោ 1 ប្រអប់ (ចំណុះ 240 c.c)

អាហារចម្អាប

– ផ្លែមង្ឃុត 6 ផ្លែ

ពេលថ្ងៃត្រង់

– បាយដំណើប 1 ដុំ(មួយក្ដាប់ដៃ)

– សម្លស្ងោមាន់ 1 ចាន

– ញាំសាច់ជ្រូក 1 ចាន(បរិមាណ 6 ស្លាបព្រា) បន្លែស្រស់

អាហារបន្ថែម

– ផ្លែសាវម៉ាវ 4 ផ្លែ

ពេលល្ងាច

– បាយស 2 វែក

– ភ្លៅមាន់អាំង 1 ភ្លៅ

– ខសាច់ជ្រូក – សាច់ 2 ដុំ

– ក្រូចឃ្វិច 1 ផ្លែ

មុនគេង

– ទឹកដោះគោ 1 ប្រអប់ (ចំណុះ 240 c.c)

តាមរយៈបញ្ជីគំរូអាហារក្នុងមួយថ្ងៃៗខាងលើនេះ យើងនឹងមើលឃើញថា អាហារដែលស័ក្តិសមសម្រាប់ស្រ្តីមានគភ៌គឺ គួរញ៉ាំឱ្យបានសម្បូរបែបក្នុងមួយពេលៗ ដែលគួរតែប្រកបទៅដោយ បាយ សាច់សត្វ បន្លែផ្លែឈើ ដើម្បីឱ្យមានក្រុមអាហារដែលគ្រប់ប្រភេទ បានទទួលសារធាតុអាហារដែលមានប្រយោជន៍រៀងរាល់ពេលបាយ។ ស្រ្តីមានគភ៌អាចកែសម្រួលទៅជាមុខម្ហូបដែលស្រដៀងៗគ្នាបានក្នុងមួយថ្ងៃៗ ដើម្បីកុំឱ្យកើតមានការធុញទ្រាន់ក្នុងការញ៉ាំ និងក្រៅពីការជ្រើសរើសទទួលទានម្ហូបអាហារដែលមានប្រយោជន៍ហើយ គួរនឹកដល់បរិមាណក្នុងការញ៉ាំដែលត្រូវតែមិនធ្វើឱ្យទម្ងន់ខ្លួនកើនឡើងផង។ នៅពេលស្រ្តីមានគភ៌ញ៉ាំអាហារបានគ្រប់ប្រភេទក្រុម មានសុខភាពរឹងមាំពេញមួយរយៈពេលតាំងគភ៌ ទម្ងន់ខ្លួនក៏ស្ថិតក្នុងកម្រិតប្រក្រតីដែរនោះ កូនតូចដែលកើតមកក៏នឹងមានសុខភាពរឹងមាំល្អឥតខ្ចោះ និងមានទម្ងន់ខ្លួនស្ថិតក្នុងកម្រិតប្រក្រតីផងដែរ៕