វេទិកាធំៗនានាដែលបង្កើតឡើងដោយយុវជនភាគច្រើនជាវេទិកាដែលបង្ហាញពីការអប់រំ ពីជីវិតជានិស្សិត ពីគន្លឹះជោគជ័យលើអាហារូបករណ៍ និងការសិក្សាជាដើម តែនៅពេលនេះយុវជនបានចាប់ផ្តើមបោះជំហានថ្មីមួយផ្សេងទៀតដែលចូលកាន់តែជ្រៅក្នុងជីវិតមនុស្ស គឺវេទិកាស្តីពីការកសាងសុភមង្គលក្នុងគ្រួសារ។
លោក ពេជ្រ ពិសាល អ្នកគ្រប់គ្រងកម្មវិធី «អាថ៌កំបាំង កសាងគ្រួសារ ដ៏មានសុភមង្គល» បានលើកឡើងថា ការបង្កើតសិក្ខាសាលាស្តីពីសុភមង្គលគ្រួសារ គឺក្នុងគោលបំណងបង្ហាញដល់យុវជន និងប្រជាជនទូទៅនៅកម្ពុជាឱ្យបានយល់ដឹងពីភាពចាស់ទុំក្នុងការរស់នៅ ក៏ដូចជាត្រៀមខ្លួនក្លាយជាមនុស្សដែលពោរពេញទៅដោយភាពជោគជ័យពិតប្រាកដ ទាំងការសិក្សា ការងារ និងសុភមង្គលគ្រួសារ។
ជាធម្មតាទេគ្មានមនុស្សណាម្នាក់គេចផុតពីជីវិតនៃការកសាងគ្រួសារនោះទេ ហេតុនេះការរៀបចំខ្លួនឱ្យហើយសម្រាប់កសាងគ្រួសារជារឿងសំខាន់សម្រាប់យុវជនកម្ពុជា។ ហេតុនេះហើយទើបសិក្ខាសាលានេះមានអញ្ជើញបុគ្គលដែលពោរពេញទៅដោយបទពិសោធជិវិតទាំងក្នុងគ្រួសារ និងក្នុងសង្គម ដើម្បីចែករំលែកមេរៀនជីវិតល្អៗទាំងអស់នោះទៅកាន់សាធារណជនបានស្វែងយល់។
វាគ្មិនដែលនឹងធ្វើបទបង្ហាញនៅក្នុងសិក្ខាសាលាស្តីពីអាថ៌កំបាំង កសាងគ្រួសារ ដ៏មានសុភមង្គល រួមមាន លោក សោម សម្បត្តិ អគ្គនាយកក្រុមហ៊ុន Campaint Cambodia លោក កែវ ឡង់ឌី នាយកអភិវឌ្ឍន៍អាជីវកម្មនៃក្រុមហ៊ុន Baby Outlet Cambodia និងលោក រិន រ៉ាវុធ មន្ត្រីគ្រប់គ្រងរដ្ឋបាលជាន់ខ្ពស់នៃក្រសួងសង្គមកិច្ច អតីតយុទ្ធជន និងយុវជននីតិសម្បទា ដែលនឹងធ្វើឡើងនៅមជ្ឈមណ្ឌលសហប្រតិបត្តិការកម្ពុជាជប៉ុន នៅថ្ងៃអាទិត្យខាងមុខនេះ៕
