ភ្នំពេញ – ដើម្បីឆ្លើយតបទៅនឹងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍2017-2025 ក្នុងការផ្គត់ផ្គង់កម្លាំងពលកម្មជំនាញក្នុងវិស័យទេសចរណ៍កំពុងមានតម្រូវការខ្ពស់ សាមីក្រសួងបានគ្រោងនឹងអនុវត្ដគម្រោងបណ្ដុះបណ្ដាលវិជ្ជាជីវៈម្ហូបអាហារ (ACAC) ។
សាលាបណ្តុះបណ្តាលវិជ្ជាជីវៈម្ហូបអាហារ (ACAC) ជាសាលាបណ្តុះបណ្តាលយុវជនកម្ពុជាលើជំនាញធ្វើម្ហូបស្របតាមកម្មវិធីសិក្សាអាស៊ាន ដែលក្រសួងទេសចរណ៍បានដាក់ចុះ និងកម្មវិធីសិក្សារបស់សាលា Lusan ប្រទេសស្វ៊ីស។ សាលាបណ្តុះបណ្តាលវិជ្ជាជីវៈម្ហូបអាហារ (ACAC) នឹងជួយបណ្តុះបណ្តាលយុវជនកម្ពុជា ឆ្លើយតបទៅនឹងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍។
វគ្គសិក្សានៅសាលាបណ្តុះបណ្តាលវិជ្ជាជីវៈម្ហូបអាហារ (ACAC) មានរយៈពេល 2ឆ្នាំ ដែលសិស្សានុសិស្សនឹងមានការទទួលស្គាល់គុណវុឌ្ឍិពីលេខាធិការដ្ឋានអាស៊ានផងដែរ ដែលគេមើលឃើញថា ការសិក្សាលើជំនាញនេះរយៈពេល2ឆ្នាំនឹងទទួលបានឱកាសធ្វើការទទួលបានប្រាក់បៀវត្សរ៍ចាប់ពី 400-500 ដុល្លាអាមេរិក ឬពួកគាត់អាចបង្កើតអាជីវកម្មក្នុងសេវាកម្មភោជនីយដ្ឋានដោយខ្លួនឯងក៏បាន។
សិក្ខាសាលា “ភាពជាដៃគូរដ្ឋ-ឯកជនក្នុងការអនុវត្តគម្រោងសាលាបណ្តុះបណ្តាលវិជ្ជាជីវៈម្ហូបអាហារ (ACAC)” ត្រូវបានរៀបចំឡើងដោយមានការចូលរួមក្រោមអធិបតីភាពរបស់ ឯកឧត្តមប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានក្រុមប្រឹក្សាភិបាលសាលាបណ្តុះបណ្តាលវិជ្ជាជីវៈម្ហូបអាហារ ACAC និងស្ថាប័នពាក់ព័ន្ធ មានក្រសួងអប់រំ យុវជន និងកីឡា ក្រសួងពាណិជ្ជកម្ម នាយកអង្គការ Shift 360 ព្រមទាំងក្រសួងការងារ និងបណ្តុះបណ្តាលវិជ្ជាជីវៈ ក្រសួងសេដ្ឋកិច្ច និងហិរញ្ញវត្ថុ អង្គការជាតិ -អន្តរជាតិ សាលាបណ្តុះបណ្តាល សមាគមចុងភៅ និងភាគីឯកជនប្រមាណ35រូប នៅទីតាំងសលាបណ្តុះបណ្តាលវិជ្ជាជីវៈម្ហូបអាហារ (ACAC)។
រយៈពេល6ខែដើមឆ្នាំ2017 នេះ កម្ពុជាទទួលបានទេសចរអន្តរជាតិប្រមាណ2.6លាននាក់ កើនឡើងប្រមាណ 12.8% ធៀបនឹងរយៈពេលដូចគ្នាក្នុងឆ្នាំ2016។ នៅឆ្នាំ2020 កម្ពុជារំពឹងទទួលបានទេសចរអន្តរជាតិប្រមាណ 7លាននាក់ បង្កើតការងារបានជិត1លាននាក់ និងនាំចំណូលចូលសេដ្ឋកិច្ចជាតិ ប្រមាណ5ពាន់លានដុល្លារ។
ដើម្បីសម្រេចបានចក្ខុវិស័យអភិវឌ្ឍន៍ទេសចរណ៍ឆ្នាំ2020 ក្រសួងទេសចរណ៍បានដាក់ចេញផែនការសកម្មភាព និងយុទ្ធនាការរយៈពេលខ្លី និងមធ្យម ដោយផ្តោតលើជ្រុងយុទ្ធសាស្ត្រចំនួន 4គឺ
ទី1.ការបង្កើត និងផ្សព្វផ្សាយផលិតផលទេសចរណ៍ថ្មី
ទី2.ពង្រឹងគុណភាពសេវាកម្មទេសចរណ៍
ទី3. ការអនុវត្តបច្ចេកវិទ្យា ព័ត៌មានវិទ្យាក្នុងវិស័យទេសចរណ៍ (E-Tourism)
ទី4. ពង្រឹងការអភិវឌ្ឍធនធានមនុស្ស
បច្ចុប្បន្នក្រសួងទេសចរណ៍បានបណ្តុះបណ្តាលគ្រូបង្គោល និងអ្នកវាយតម្លៃបង្គោលអាស៊ានចំនួន 30រូប គ្រូបង្គោល និងអ្នកវាយតម្លៃបង្គោលជាតិចំនួន542រូប ឯកសារបណ្តុះបណ្តាល 976ក្បាល អ្នកជំនាញទេសចរណ៍ប្រមាណ2,000នាក់ ទទួលស្គាល់សាលាបណ្តុះបណ្តាលវិជ្ជាជីវៈចំនួន 12 និង បង្កើតសាលាថ្មីៗ រួមមានសាលាជាតិបណ្តុះបណ្តាលវិជ្ជាជីវៈទេសចរណ៍ចំនួន២ នៅរាជធានីភ្នំពេញ និងខេត្តព្រះសីហនុ ក្រោមឥណទានរបស់ទីភ្នាក់ងារបារាំងសម្រាប់ការអភិវឌ្ឍ (AFD)៕
