ខ្សែប្រយុទ្ធ Andre Gray បានចូលរួមជាមួយនឹងក្លិប Watford ដោយចេញពីក្លិប Burnley ដែលស្ថិតក្នុងក្របខ័ណ្ឌ Premier League ដូចគ្នាក្នុងតម្លៃខ្លួនជាកំណត់ត្រារបស់ក្លិប។ នេះបើយោងតាមការប្រកាសរបស់ក្លិបថ្មីរបស់គេកាលពីថ្ងៃពុធ។
ខ្សែប្រយុទ្ធសញ្ជាតិអង់គ្លេសវ័យ26ឆ្នាំរូបនេះបានចុះហត្ថលេខាលើកុងត្រារយៈពេល5ឆ្នាំ ហើយក្លិប Watford បានចំណាយប្រាក់ប្រមាណជា18.5លានផោន (ស្មើនឹង24លានដុល្លារអាមេរិក)។ Watford បានឲ្យដឹងក្នុងសេចក្តីប្រកាសមួយនៅលើគេហទំព័ររបស់ពួកគេថា៖ «ក្លិប Watford FC ពិតជារីករាយណាស់ក្នុងការប្រកាសពីការចុះហត្ថលេខាជាមួយនឹងខ្សែប្រយុទ្ធ Andre Gray សម្រាប់តម្លៃខ្លួនជាកំណត់ត្រារបស់ក្លិប»។ ក្លិប Watford បានប្រកាសពីការផ្ទេរនេះ តាមរយៈទំព័រគណនីនៃបណ្តាញសង្គម Twitter របស់ខ្លួន។
Gray បានបង្ហាញខ្លួនក្នុងរូបភាពវីដេអូដែលត្រូវបានបង្ហោះនៅលើបណ្តាញសង្គមនោះដោយបាននិយាយថា៖ «សួស្តី ឈ្មោះរបស់ខ្ញុំគឺ Andre Gray។ ខ្ញុំពិតជារីករាយណាស់ក្នុងការបានចូលរួមជាមួយនឹង Watford និងពិតជាស្រេកឃ្លានក្នុងការចាប់ផ្តើមប្រកួតខ្លាំងណាស់»។ Gray បានចូលរួមជាមួយនឹងក្លិប Burnley ដោយចេញពីក្លិប Brentford ក្នុងតម្លៃខ្លួន9លានផោន កាលពីឆ្នាំ2015 និងបានស៊ុតបាល់បញ្ចូលទី33គ្រាប់ក្នុងរយៈពេល2រដូវកាលនៅឯកីឡដ្ឋាន Turf Moor ក្នុងនោះរាប់បញ្ចូលទាំងការរកបាន9គ្រាប់ក្នុងក្របខ័ណ្ឌ Premier League កាលពីរដូវកាលមុនផងដែរ។ ខ្សែប្រយុទ្ធរូបនេះ បានស៊ុតបាល់បញ្ចូលទីសរុបដល់ទៅ 23គ្រាប់ក្នុងរដូវកាលឆ្នាំ2015-2016 ដែលនៅពេលនោះក្លិប Burnley បានឡើងចេញពីក្របខ័ណ្ឌ Championship ទៅកាន់ក្របខ័ណ្ឌ Premier League។ ស្របពេលជាមួយគ្នានេះ កាលពីថ្ងៃអង្គារ ក្លិប Watford បានបំពេញការចុះហត្ថលេខាជាមួយនឹងខ្សែប្រយុទ្ធអន្តរជាតិប្រេស៊ីល Richarlison ពីក្លិប Fluminense ក្នុងតម្លៃខ្លួន13លានផោន៕
ប្រភពពី៖ Sky Sport