ក្រុមអ្នកវិទ្យាសាស្ត្របានសង្កេតមើលទៅលើសកម្មភាពផ្កាយតូចពណ៌ស (White Dwarf) មួយដួងដែលស្ថិតក្នុងប្រព័ន្ធផ្កាយ J2056 និងបានស្វែងយល់អំពីដំណើរការនៃការស្រូបទាញវត្ថុធាតុពីផ្កាយធំមួយដួងដែលស្ថិតនៅក្នុងប្រព័ន្ធជាមួយគ្នា ក្នុងពេលវាកំពុងវិលជុំវិញខ្លួនឯង2ជុំក្នុង1វិនាទី។
ថ្មីៗនេះ ក្រុមអ្នកតារារូបវិទ្យាបានរកឃើញផ្កាយពណ៌សមួយដួងដ៏ចម្លែក ដោយកំពុង “ស៊ីសាច់” មិត្តរួមដំណើររបស់វា។ ស្នូលរបស់ផ្កាយដែលនៅសល់ពីការផ្ទុះ នេះ កំពុងវិលជុំវិញខ្លួនវាដោយប្រើពេល1វិនាទីសម្រាប់ការវិល2ជុំ ធ្វើឱ្យវាក្លាយជាផ្កាយពណ៌ស White Dwarf ដែលវិលជុំវិញខ្លួនឯងបានលឿនជាងគេបង្អស់នៅក្នុងចំណោមផ្កាយពណ៌សដែលត្រូវបានរកឃើញកន្លងមកនេះ។
យោងតាម Space នៅពេលផ្កាយមួយដួងដែលដូចទៅនឹងព្រះអាទិត្យបានងាប់ទៅ ផ្កាយមួយដួងផ្សេងទៀតដែលជាអ្នករួមដំណើររបស់វា នឹងអាចចាប់ផ្ដើមឈានចូលដល់ដំណាក់កាលចុងក្រោយក្នុងជីវិតរបស់វា ឬចល័តចូលមកក្បែរផ្កាយពណ៌ស ហើយបង្កើតបានជាបាតុភូតបំផ្លិចបំផ្លាញដ៏គួរឱ្យខ្លាច។
ផ្កាយពណ៌ស អាចស្រូបទាញវត្ថុធាតុពីផ្កាយដែលកំពុងរួមដំណើរជាមួយវា រួចបញ្ចេញជារលកវិទ្យុសកម្ម។ ក្រុមតារារូបវិទូមកពីសាកលវិទ្យាល័យ New York និង Stony Brook បានរកឃើញថា ប្រព័ន្ធផ្កាយ J2056 នេះ មានចម្ងាយ850ឆ្នាំពន្លឺពីផែនដី។ ដែនម៉ាញេទិក (magnetic field) ដែលមានកម្លាំងមិនខ្លាំងក្លា ឬខ្សោយ បានបណ្ដាលឱ្យផ្កាយពណ៌សក្នុងប្រព័ន្ធនេះ ជះពន្លឺមិនស្មើគ្នា ធ្វើឱ្យអ្នកវិទ្យាសាស្ត្រពិបាកព្យាករ។
ប្រភព៖ Amaze Lab
