ក្រុមហ៊ុន Foxconn គឺជាដៃគូផលិតដ៏ធំមួយរបស់ Apple មានមូលដ្ឋាននៅក្នុងប្រទេសចិន បានចាប់ផ្ដើមធ្វើការជ្រើសរើសបុគ្គលិក ដើម្បីជួយដល់ការដំឡើង iPhone 12 ។ លក្ខខណ្ឌដ៏គួរឱ្យភ្ញាក់ផ្អើលនោះគឺ បើអ្នកដាក់ពាក្យជាប់ក្នុងការជ្រើសរើស នឹងមានផ្ដល់ជូនប្រាក់រង្វាន់លើកទឹកចិត្ត រហូតដល់ជិត 1,300ដុល្លារ។
រោងចក្រ Foxconn គឺត្រូវការកម្លាំងមនុស្សច្រើន ពេលដែល iPhone ជំនាន់ថ្មីចាប់ផ្ដើមការផលិតទ្រង់ទ្រាយធំ។ គេរំពឹងថា នៅក្នុងឆ្នាំនេះ Apple នឹងប្រកាសចេញ iPhone ថ្មីរហូតដល់ 4ម៉ូដែល ដែលមាន 2ប្រភេទ អេក្រង់ទំហំ 6.1អ៊ីញ។ 1ប្រភេទអេក្រង់ 5.4អ៊ីញ និង 1ទៀតអេក្រង់ 6.7អ៊ីញ។
ជារឿយៗ ស្មាតហ្វូន iPhone ថ្មី តែងតែចាប់ផ្ដើមបញ្ចេញលក់នៅចុងខែកញ្ញា ប៉ុន្តែកាលពីពេលថ្មីៗនេះ Apple បានឱ្យតម្រុយថា ការបញ្ចេញលក់ iPhone នាឆ្នាំនេះ នឹងយឺតជាសព្វដងប្រមាណជា 2ទៅ 3សប្ដាហ៍៕
