បញ្ហាទឹកជំនន់នៅក្នុងរាជធានីភ្នំពេញ ជាចំណុចយ៉ាងសំខាន់មួយដែលប្រជាជនគ្រប់រូបកំពុងយកចិត្តទុកដាក់ ព្រោះពីមួយឆ្នាំទៅមួយឆ្នាំ មានបញ្ហាច្រើនណាស់ដែលកើតឡើងដោយសារតែស្ថានភាពអាក្រក់នេះ។
ពាក់ព័ន្ធនឹងបញ្ហានេះ ឯកឧត្ដម ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម បានលើកឡើងថា រាជធានីភ្នំពេញ ជាតំបន់ដែលមានរៀងកណ្តក់ ដែលងាយគំរាមកំហែងចំពោះទឹកជំនន់។ បញ្ហា3 ដែលជាកត្តាគំរាមកំហែង និងជាចំណុចដែលធ្វើឱ្យរាជធានីភ្នំពេញមានទឹកជំនន់គឺ ដោយសារតែទី1 បញ្ហាទឹកភ្លៀងដែលធ្លាក់ក្នុងភូមិសាស្ត្ររាជធានីភ្នំពេញផ្ទាល់ បញ្ហាទី2 ការគំរាមកំហែងពីទឹកទន្លេមេគង្គ និងបញ្ហាទី3 គឺជំនន់ពីស្ទឹងព្រែកត្នោត។
ឯកឧត្តម បានបញ្ជាក់ថា ចំពោះបញ្ហាការគំរាមកំហែងពីទឹកទន្លេមេគង្គយើងបានដោះស្រាយរួចរាល់ហើយ ព្រោះយើងធ្លាប់មានបទពិសោធន៍កាលពីឆ្នាំ 2000 ដែលកាលនោះមានជំនន់សហសវត្សដែលទាំងឯកឧត្តមរដ្ឋមន្ត្រី និងមន្ត្រីទាំងអស់ត្រូវសម្រាកលើទំន់កប់ស្រូវ 22យប់ ដើម្បីទប់ទល់នឹងស្ថានភាពទឹកជំនន់។ ដោយឃើញពីបញ្ហានេះ រដ្ឋមន្ត្រីក្រសួងធនធានទឹក ក៏បានរៀបចំឱ្យឡើងវិញឱ្យមានទំនប់រឹងមាំ និងក្រោយមកក៏រាជធានីភ្នំពេញបានអភិវឌ្ឍទៅជាមហាវិថីឈ្នះៗរហូតមកដល់បច្ចុប្បន្ន។ រហូតមកដល់ពេលនេះ បញ្ហាលំបាកខាងលើបានដោះស្រាយរួចរាល់ទាំងស្រុង។
សម្រាប់ជំនន់ព្រែកត្នោតវិញ អាចនៅជាបញ្ហាលំបាកដោយសារតែមានការរួមតូចនៃផ្នែកខាងក្រោម និងស្ថានភាពគោករាក់។ ឯកឧត្តមថាដើមឡើយមានផ្លូវមួយចំនួនដើម្បីរំដោះទឹក ដោយមួយផ្នែកហូរទៅកាន់ដើមឫសនៅខេត្តកណ្តាល និងមួយផ្នែកទៀតធ្លាក់ទៅម្តុំព្រៃស បន្ទាប់មកធ្លាក់ចូលទៅបឹងជើងឯក ទើបចេញទៅស្ទឹងជ្រៅដោយបែងចែកចេញជា2ច្រកទៀតគឺ ច្រកចេញទៅទន្លេបាសាក់ និងមួយច្រកទៀតហូរទៅព្រែកកំពឹស។
ស្ទឹងព្រែកត្នោតនេះមានទឹករហូតដល់ 1,200ម៉ែត្រគីបក្នុងមួយវិនាទី ហេតុនេះហើយទើបចាំបាច់ត្រូវមានចំណាត់ការដើម្បីទប់ស្កាត់កុំឱ្យមានបញ្ហា។ ជាដំណោះស្រាយ ម្សិលម៉ិញនេះរដ្ឋមន្ត្រីក្រសួងធនធានទឹក និងឧត្តុនិយម បានចរចារជាមួយក្រុមហ៊ុនចិន និងក្រសួងសេដ្ឋកិច្ច និងហិរញ្ញវត្ថុ ដើម្បីបើកការស្តារស្ទឹងព្រែកត្នោតឡើងវិញ។ ប្រសិនបើស្តារយើងអាចនឹងចំណាយពេលប្រហែលជា 30ខែ តែក្រោយពេលស្តារហើយ យើងនឹងអស់បារម្ភពីបញ្ហាគំរាមកំហែងដោយសារស្ទឹងព្រែកត្នោតទៀតហើយ។
ហេតុនេះជារួមបច្ចុប្បន្ននេះបញ្ហាគំរាមកំហែង2 បានដោះស្រាយហើយ នៅឡើយងបញ្ហាជំនន់ទឹកភ្លៀងដែលឯកឧត្តមបញ្ជាក់ថា ប្រសិនបើភ្លៀងចាប់ពីមួយម៉ោងកន្លះឡើងទៅតំបន់មួយចំនួននៅក្នុងរាជធានីភ្នំពេញ អាចនឹងលេចទឹក។ បញ្ហានេះគឺត្រូវការឱ្យអាជ្ញាធររាជធានីភ្នំពេញ រៀបចំហេដ្ឋារចនាសម្ព័ន្ធឱ្យបានល្អដើម្បីដោះស្រាយ។ ទោះជាយ៉ាងនេះក្តី ឯកឧត្តមបញ្ជាក់ថា រដ្ឋបាលរាជធានីភ្នំពេញក៏កំពុងដោះស្រាយដែរចំពោះរឿងនេះ ដោយសាលារាជធានីភ្នំពេញ កំពុងតែរៀបចំហរដ្ឋរចនាសម្ព័ន្ធជាដំណាក់កាល៕
