យុវនារីម្នាក់ដែលកើតចេញពីត្រកូលកសិករនៅខេត្តកំពង់ចាម កញ្ញា លឹម លីឆាយបានធ្វើការផ្លាស់ប្តូរដំណើរជីវិតរបស់ខ្លួនដ៏គួរឱ្យភ្ញាក់ផ្អើលតាមរយៈការធ្វើដំណើរទៅសិក្សានៅប្រទេសជាច្រើនដើម្បីស្វែងយល់ពីបញ្ហានៃការរស់នៅក្នុងបណ្តាប្រទេសអភិវឌ្ឍន៍ និងកំពុងអភិវឌ្ឍន៍។ យុវតីស្រដីផ្អែមនិងក្លាហានខាងលើបានឆ្លងកាត់បញ្ហាព្យុះភ្លៀងជាច្រើនក្នុងជីវិតសិក្សា ដោយត្រូវជម្នះបញ្ហាជីវភាព និងយោបល់អវិជ្ជមានរបស់អ្នកជិតខាងដែលមិនសូវឱ្យតម្លៃលើជីវិតកូនស្រីនៅក្នុងការសិក្សា។
កញ្ញា លឹម លីឆាយ ជានិស្សិតអាហារូបករណ៍ដែលបានបញ្ចប់ការសិក្សាមុខវិជ្ជានយោបាយ ទស្សនវិជ្ជា និងសេដ្ឋកិច្ច(PPE: Politic, Philosophy and Economic) នៅសាកលវិទ្យាល័យអាស៊ីសម្រាប់ស្ត្រី (Asian University of Women) នៅប្រទេសបង់ក្លាដែស។
កញ្ញា លីឆាយ បាននិយាយថា៖ «ទោះបីជាស្ថិតក្នុងស្ថានភាពណាក៏ដោយ សូមកុំខ្លាចនឹងប្រឈមជាមួយបញ្ហាក្នុងជីវិតតែត្រូវគិតឱ្យខ្លាំងលើគោលដៅ នោះទើបយើងមានកម្លាំងជំរុញដើម្បីប្រឈមជាមួយនឹងរឿងពិបាកនានា»។
បើតាមកញ្ញា លីឆាយ យុវជនកម្ពុជា ជាពិសេសនិស្សិតជាស្ត្រីដែលភាគច្រើនជាមនុស្សដែលត្រូវប្រឈមច្រើនជាមួយនឹងឧបសគ្គនានាក្នុងសង្គម ប្រពៃណី និងស្ថានភាពជាក់ស្តែងក្នុងការសិក្សាគួពង្រឹងភាពរឹងមាំរបស់ខ្លួនហើយរកឱ្យឃើញនូវអ្វីដែលខ្លួនស្រឡាញ់ដើម្បីបង្កើតជាគោលដៅឱ្យបានច្បាស់លាស់។ ការរស់នៅក្នុងសង្គម គឺត្រូវការភាពរឹងមាំ ហើយមានគោលជំហរផ្ទាល់ខ្លួនដើម្បីធ្វើជាគំរូល្អដល់ស្ត្រីដទៃទៀត និងដើម្បីបង្ហាញឱ្យច្បាស់ទៅមនុស្សមួយចំនួនដែលធ្លាប់មានគំនិតអវិជ្ជមានលើយើង។ ក្រោយពេលមានគោលដៅច្បាស់លាស់ហើយ យើងនឹងមានផ្លូវសម្រាប់ដើរជាក់លាក់ហើយរូបភាពនៃក្តីស្រមៃទាំងអស់នោះនឹងបង្កើតសុភមង្គលក្នុងគំនិតដែលវាជារូបភាពជំរុញឱ្យមនុស្សមានការខិតខំប្រឹងប្រែងដោយមិនខ្លាចនឿយហត់។
ដើម្បីបង្ហាញពីភាពរឹងមាំពិតប្រាកដយុវតីដែលប្រកាន់គំនិតយ៉ាងច្បាស់លាស់ខាងលើ បានព្យាយាមចេញទៅប្រទេសកំពុងអភិវឌ្ឍន៍ផ្សេងៗដើម្បីស្វែងយល់ និងចែករំលែកពីការតស៊ូដើម្បីទទួលបានការអប់រំនៅគ្រឹះស្ថានឧត្តមសិក្សាអន្តរជាតិ។ កញ្ញា លីឆាយ បានចេញទៅសិក្សាទៅដកស្រង់យកបទពិសោធ និងសិក្សានៅទីក្រុងហុងកុងលើជំនាញសេដ្ឋកិច្ចនយោបាយចេញទៅប្រទេសហ្វីលីពីនដើម្បីសិក្សាពីបញ្ហាសង្គមពាក់ព័ន្ធនឹងគ្រោះទឹកជំនន់ និងរញ្ជួយដី និងចេញទៅសហរដ្ឋអាមេរិកក្នុងកម្មវិធីកម្មសិក្សា ស្តីពីភាពជាអ្នកដឹកនាំ(Leadership and International Cooperation)។ បទពិសោធដែលទទួលបានពីប្រទេសអភិវឌ្ឍន៍ទាំងអស់នោះ ត្រូវបានកញ្ញា លឹម លីឆាយយកមកចែករំលែកជាមួយយុវជននៅក្នុងប្រទេសដែលនៅជិតៗសាកលវិទ្យាល័យរបស់គាត់ និងប្រទេសកម្ពុជាដែលជាស្រុកកំណើតរបស់គាត់ផងដែរ។
កញ្ញា លឹម លីឆាយ នឹងបន្តការសិក្សាថ្នាក់អនុបណ្ឌិតលើជំនាញរបស់គាត់ និងចេញទៅធ្វើការនៅក្នុងប្រទេសអភិវឌ្ឍន៍មួយចំនួនសិនមុននឹងត្រឡប់មកធ្វើការងារដែលគាត់ពេញចិត្តនៅកម្ពុជាវិញ៕
