រដ្ឋបាលលោក ដូណាល់ ត្រាំ នឹងបិទ TikTok លែងឱ្យប្រើនៅអាមេរិកតទៅទៀត ប្រសិនបើផែនការទិញយកប្រតិបត្តិការរបស់ TikTok នៅអាមេរិក ពីសំណាក់ក្រុមហ៊ុនធំៗនៅអាមេរិក មិនអាចសម្រេចជាស្ថាពរ ត្រឹមថ្ងៃទី15 ខែកញ្ញាទេនោះ។
លោក ដូណាល់ ត្រាំ បានបញ្ជាក់ថា លោកយល់ព្រមឱ្យក្រុមហ៊ុន Microsoft ឬក្រុមហ៊ុនអាមេរិកដទៃទៀត ទិញយកប្រតិបត្តិការកម្មវិធី TikTok នៅអាមេរិក ដើម្បីឱ្យកម្មវិធីនេះអាចដំណើរការបានតទៅទៀត។ បន្ថែមពីនេះដែរ ក្រសួងរតនាគារអាមេរិកនឹងត្រូវទទួលបានភាគលាភមួយចំណែកធំ ពីការលក់ប្រតិបត្តិការ TikTok នេះផងដែរ។
ដូណាល់ ត្រាំដដែលបានលើកឡើងដូច្នេះថា៖ “ខ្ញុំមិនប្រកាន់ថា Microsoft ឬអ្នកផ្សេងណា ឬក៏ក្រុមហ៊ុនធំរបស់អាមេរិកណាមួយទិញយកវានោះទេ តែវានឹងត្រូវបិទនៅថ្ងៃទី15 ខែកញ្ញា លុះត្រាតែ Microsoft ឬក្រុមហ៊ុនណាមួយអាចទិញយក និងឯកភាពលើតម្លៃសមរម្យមួយ ដូច្នេះរតនាគារជាតិអាមេរិកនឹងទទួលបានចំណែកភាគលាភច្រើន។
គេមិនទាន់ច្បាស់នៅឡើយទេថា តើរតនាគារជាតិអាមេរិក នឹងទទួលបានចំណែកភាគលាភពីការទិញយកប្រតិបត្តិការ TikTok ដោយវិធីណានោះទេ និងតើ Microsoft ជាអ្នកចំណាយ ឬ ByteDance ជាអ្នកចំណាយ ឬភាគីទាំង2 ជាអ្នកចំណាយ? វាច្បាស់ជាធ្វើឱ្យការចរចាទិញកាន់តែពិបាក ប្រសិនបើចំណែកភាគលាភដែលរតនាគារជាតិអាមេរិកចង់បាន មានចំនួនច្រើន៕
