ការនាំចេញអង្ករទៅទីផ្សារអន្តរជាតិឆ្នាំនេះកើនឡើងខ្លាំងបើប្រៀបធៀបនឹងឆ្នាំមុន

កម្ពុជា ជា​ប្រទេស​ដែលមាន​សក្តានុពល​មួយ​ក្នុងចំណោម​ប្រទេស​ក្នុង​តំបន់​ដែល​នាំចេញ​ផលិតផល​កសិកម្ម​ទៅកាន់​ទីផ្សារ​អន្តរជាតិ។ ក្នុងចំណោម​ដំណាំ​យុទ្ធសាស្ត្រសំខាន់ៗ ស្រូវ​ជា​ផ្នែក​យ៉ាងសំខាន់​ដែល​ប្រទេស​យើង​បាន​នាំចេញ ដោយ​ក្នុងមួយឆ្នាំៗយើង​បាន​នាំចេញ​ស្រូវ​ជាច្រើន​លាន​តោន​ទៅកាន់​ទីផ្សារ​នានា។

ជា​លទ្ធផល​ក្នុង​ឆ្នាំ 2020នេះ ឯកឧត្តម វេ​ង សាខុន រដ្ឋមន្ត្រី​ក្រសួងកសិកម្ម រុក្ខា​ប្រ​ម៉ាញ់ និង​នេសាទ បាន​បញ្ជាក់ថា លទ្ធផល​នៃ​ការនាំចេញ​អង្ករ​ដែល​បាន​ឆ្លងកាត់​ការត្រួតពិនិត្យ​ភូតគាម​អនាម័យ ក្នុង​រយៈពេល 7ខែ​ដើមឆ្នាំ2020 សម្រេចបាន 426,073 តោន កើនឡើង​ប្រមាណ 118,060 តោន ស្មើនឹង 38.30% ដែល​ធៀប​ទៅនឹង​រយៈ7ខែ​ដើមឆ្នាំ2019 មាន​ចំនួន 308,013 តោន ។ ដោយឡែក​សម្រាប់​ខែកក្កដា ឆ្នាំ2020 នេះ សម្រេចការ​នាំចេញ​អង្ករ​បាន ចំនួន 28,413តោន កើនឡើង​ចំនួន 1,938តោន ស្មើនឹង 7.32% ធៀប​ទៅនឹង​ខែឧសភា ឆ្នាំ2019 ដែល​ក្នុងនេះ​មាន៖ អង្ករ​ក្រអូប​គ្រប់​ប្រភេទ​មាន​ចំនួន 18,523 តោន អង្ករ​ចម្រុះ​គ្រប់​ប្រភេទ​មាន​ចំនួន 9,208 តោន អង្ករ​ចំ​ហ៊ុយ​មាន​ចំនួន 682តោន និង​អង្ករ​ក្រហម​មាន​ចំនួន 28.41 តោន ។

ប្រទេស​ដែល​បាន​បញ្ជា​ទិញ​អង្ករ​ពី​កម្ពុជា​ក្នុង​រយៈពេល 7ខែ​នេះ មាន​ចំនួន 57ប្រទេស៖ នៅក្នុង​សហភាព​អ៊ឺរ៉ុប​មាន​ប្រទេស​ចំនួន24 ក្នុងចំណោម28ប្រទេស ប្រទេស​ចិន ប្រទេស​សមាជិក​អាស៊ាន​ចំនួន6 ហើយ​និង​នៅ​ទ្វិ​ប​ដ៏ទៃទៀត​ចំនួន 26ប្រទេស ។ ទន្ទឹមនឹងនេះ​ក៏មាន​ក្រុមហ៊ុន​ចំនួន5 ក្នុងចំណោម 70ក្រុមហ៊ុន ដែល​បាន​នាំចេញ​អង្ករ​ច្រើនជាងគេ ។

សូមបញ្ជាក់ថា ការនាំចេញ​អង្ករ​កម្ពុជា​ក្នុង​រយៈពេល 7ខែ​ដើមឆ្នាំ​ដូចគ្នា​ប្រៀបធៀប​ទៅនឹង​ឆ្នាំ2019 មាន​កំណើន​នៅ​គ្រប់​គោលដៅ​នាំចេញ​ទាំងអស់ សហភាព​អ៊ឺរ៉ុប​កើន​ចំនួន 37.70%, ប្រទេស​ចិន​កើន​ចំនួន 25.91%, បណ្តា​ប្រទេស​សមាជិក​អាស៊ាន​កើន​ចំនួន 44.03%, និង​គោលដៅ​ដ៏ទៃទៀត​បាន​កើនឡើង​ចំនួន 72.4% ។ចំណែកឯ​ការនាំចេញ​ស្រូវ​នៅតាម​ច្រក​តាម​បណ្តា​ខេត្ត​ជាប់​ព្រំដែន​នៃ​ប្រទេស​វៀតណាម ក្នុង​រយៈពេល 7ខែ​ដើមឆ្នាំ2020 មាន​ចំនួន​ជាង 1,115លាន​តោន៕