ក្រសួងអប់រំ យុវជន និងកីឡា ថ្មីៗនេះបានប្រកាសថា ក្រសួងគ្រោងនឹងបង្កើតមូលនិធិស្រាវជ្រាវ គំនិតច្នៃប្រឌិត និងនវានុវត្តន៍ ដើម្បីជំរុញឱ្យមានការអភិវឌ្ឍកាន់តែខ្លាំងលើសមត្ថភាពរបស់ប្រជាជន និងជាពិសេសគឺយុវជនខ្មែរ។
ក្រសួងអប់រំ បានបញ្ជាក់ថា យើងទាំងអស់គ្នាតែងសង្ឃឹមថា គង់មានថ្ងៃណាមួយនឹងមានកូនខ្មែរណាម្នាក់អាចនាំទង់នៃព្រះរាជាណាចក្រកម្ពុជាទៅបង្ហោះលើទីអវកាស ឬបង្កើតរថភ្លើងល្បឿនលឿនជាងគេបំផុត ឬអាចបង្កើតពូជស្រូវដែលមានទិន្នផលខ្ពស់ជាងគេបំផុតឡើង។ ប្រសិនបើយើងមិនអាចជាកូនខ្មែរម្នាក់នោះទេ យើងនឹងធ្វើគ្រប់យ៉ាងដើម្បីបង្កើតបរិស្ថាននៃការដុះដាលសម្រាប់កូនខ្មែរម្នាក់នោះ។
ក្រសួងអប់រំ យុវជន និងកីឡា នឹងប្រកាសជាផ្លូវការនូវ មូលនិធិការស្រាវជ្រាវ គំនិតច្នៃប្រឌិត និងនវានុវត្តន៍ (Research Creativity and Innovation Fung-RCI Fund) នាពេលឆាប់ៗខាងមុខនេះ ដើម្បីបង្កើតបរិស្ថាននៃការដុះដាលនេះ។ មូលនិធិនេះ នឹងក្លាយជាជំហានថ្មីមួយទៀតនៃបំណងប្រាថ្នាកម្ពុជា ក្នុងការអប់រំឌីជីថល និងការអប់រំបែបសតវត្សទី21 ក្នុងដំណើរឆ្ពោះទៅរកសង្គមមួយដែលប្រកបដោយពុទ្ធិ និងប្រជាជាតិមួយដែលរស់រវើក៕
