ទីភ្នាក់ងារអវកាសអាមេរិក (NASA) បានបញ្ចេញរូបថត បង្ហាញអំពីទិដ្ឋភាពដ៏ស្រស់ស្អាតនៃកាឡាក់ស៊ីរាងគូទខ្យង NGC 4848 ប្រកបដោយភាពលម្អិត ដែលត្រូវបានហ្ស៊ូមមកជិត និងថតបានកាលពីពេលថ្មីៗនេះ។
កាឡាក់ស៊ី NGC 4848 មានទីតាំងស្ថិតនៅភាគខាងជើងនៃកញ្ចុំផ្កាយ Coma Berenices ដែលមានចម្ងាយពីផែនដីប្រមាណជា336លានឆ្នាំពន្លឺ (1ឆ្នាំពន្លឺមានប្រវែង 9.46លានលានគីឡូម៉ែត្រ)។ NGC 4848 ត្រូវបានចាត់ចូលក្នុងប្រភេទកាឡាក់ស៊ីគូទខ្យងដែលបាក់ជាកំណាត់ ឬកាឡាក់ស៊ីគូទខ្យងមានមែកទទឹង ដែលដូចទៅនឹងកាឡាក់ស៊ី Milky Way របស់មនុស្សយ៉ាងដូច្នោះដែរ។
ចំណុចពិសេសរបស់បណ្ដាកាឡាក់ស៊ីរាងគូទខ្យង នោះគឺ ពួកវាមានមែកធាង ឬដៃដែលមានរាងដូចដងធ្នូ ដែលលាតសន្ធឹងពីចំណុចកណ្ដាលទៅកាន់ជាយរបស់កាឡាក់ស៊ី។ នៅក្នុងរូបភាពថ្មីបំផុតរបស់កាឡាក់ស៊ី NGC 4848 ដែលត្រូវបានថតដោយកាមេរ៉ារបស់កែវយឹតអវកាស Hubble បង្ហាញថា ដៃនានាដែលមានរាងដូចគូទខ្យង និងពណ៌ខៀវខ្ចីដ៏ស្រស់ស្អាតរបស់កាឡាក់ស៊ីនេះ អាចឱ្យយើងសង្កេតមើលឃើញបានយ៉ាងលម្អិត។
“Hubble មិនត្រឹមតែថតបានទិដ្ឋភាពផ្នែកខាងក្នុងយ៉ាងច្បាស់នៃដៃនានាកាឡាក់ស៊ីនេះ ជាកន្លែងដែលមានផ្ទុកផ្កាយ “ក្មេងៗ” រាប់សែនដួងកំពុងបញ្ចេញពន្លឺដ៏ខៀវស្រងាត់ប៉ុណ្ណោះទេ ប៉ុន្តែវាក៏អនុញ្ញាតឱ្យយើងមើលឃើញកន្ទុយដ៏ស្រទន់របស់កាឡាក់ស៊ីដែលបន្លាយខ្លួនចេញឆ្ងាយពីចំណុចកណ្ដាល ប្រៀបបានទៅនឹងដៃបីសាចដូច្នេះដែរ” នេះបើតាមការពិពណ៌នារបស់ NASA។
NGC 4848 ត្រូវបានរកឃើញជាលើកដំបូងកាលពីថ្ងៃទី21មេសា ឆ្នាំ1865 ដោយតារាវិទូជនជាតិអាល្លឺម៉ង់ Heinrich Louis d’Arrest។ តាមការគន់គូរ កាឡាក់ស៊ីនេះ មានទំហំធំជាង Milky Way របស់មនុស្សដល់ទៅជិតពាក់កណ្ដាលឯណោះ ដោយវាមានអង្កត់ផ្ចិតប្រវែងជិត 150,000ឆ្នាំពន្លឺ៕
ប្រភព៖ Sci-News
