ក្រុមហ៊ុនជប៉ុនចំនួន30 នឹងទទួលបានជំនួយពីរដ្ឋាភិបាលប្រទេសនេះ ដើម្បីរើរោងចក្រ ឬចង្វាក់ផលិតកម្មចេញពីប្រទេសចិន ចូលមករកស៊ីនៅក្នុងតំបន់អាស៊ីអាគ្នេយ៍។
អង្គការលើកកម្ពស់ពាណិជ្ជកម្មជប៉ុន Jetro (Japan External Trade Organization) ទើបតែបានប្រកាសបង្ហាញបញ្ជីឈ្មោះក្រុមហ៊ុនចំនួន30នៃប្រទេសនេះ ដែលនឹងទទួលបានជំនួយសម្រាប់ការរើរោងចក្រ ក្រុមហ៊ុន ចេញពីប្រទេសចិន ចូលមករកស៊ីនៅក្នុងបណ្ដាប្រទេសនៃតំបន់អាស៊ីអាគ្នេយ៍ ដែលនេះគឺគោលនយោបាយថ្មីមួយរបស់ជប៉ុន។
មកដល់ពេលនេះ គេមិនបានដឹងច្បាស់ថា តើក្រុមហ៊ុនទាំងនេះដែលកំពុងស្ថិតនៅប្រទេសចិន នឹងរើចង្វាក់ផលិតកម្មរបស់ខ្លួនទាំងស្រុង ឬផ្នែកណាមួយរបស់ពួកគេចេញពីប្រទេសចិននៅឡើយ។
ក្រុមហ៊ុនជប៉ុនដែលនឹងរើចេញពីប្រទេសចិន មានដូចជា វិស័យផលិតសម្ភារៈសុខាភិបាល គ្រឿងបន្លាស់ទូរស័ព្ទ ម៉ាស៊ីនត្រជាក់ និងគ្រឿងអេឡិចត្រនិចផ្សេងៗទៀត។ នៅក្នុងបញ្ជីខាងលើនេះ ក្រុមហ៊ុន Hoya ដែលផលិតគ្រឿងបន្លាស់ផ្នែករឹងកុំព្យូទ័រជាដើម នឹងរើរោងចក្រពីប្រទេសចិនទៅកាន់ប្រទេសឡាវ និងវៀតណាម។
យោងតាមសេចក្ដីប្រកាសរបស់ Jetro ខ្ទង់ប្រាក់ជំនួយរបស់រាជរដ្ឋាភិបាលជប៉ុនសម្រាប់ប៉ះប៉ូវទៅលើការចំណាយនានានៅក្នុងពេលរើ និងដំឡើងរោងចក្រនៅប្រទេសផ្សេងៗ នឹងឡើងដល់ចន្លោះពី100លានយ៉េន (931,445ដុល្លារ) ដល់5ពាន់លានយ៉េន (46,572,250ដុល្លារ)។
ក្រៅពីក្រុមហ៊ុនចំនួន30ដែលនឹងមកកាន់តំបន់អាស៊ីអាគ្នេយ៍ រាជរដ្ឋាភិបាលជប៉ុនក៏ផ្ដល់ជំនួយយ៉ាងតិច57.5ពាន់លានយ៉េន (536លានដុល្លារ) ទៅឱ្យបណ្ដាក្រុមហ៊ុនជប៉ុនចំនួន57ផ្សេងទៀត រួមទាំងក្រុមហ៊ុនឯកជនផលិតម៉ាស់ Iris Ohyama និងក្រុមហ៊ុន Sharp ផងដែរ សម្រាប់ការរើត្រលប់មកកាន់ប្រទេសជប៉ុនវិញ។
ខាងលើនេះគឺជាផ្នែកមួយនៃគោលនយោបាយពិពិធកម្មខ្សែចង្វាក់ផ្គត់ផ្គង់ទូទាំងសកលលោកដែលត្រូវបានជប៉ុនប្រកាសកាលពីខែមេសាកន្លងទៅ។ ប្រទេសជប៉ុនគឺជាខឿនសេដ្ឋកិច្ចទីពីរហើយ (បន្ទាប់ពីកោះតៃវ៉ាន់) ដែលមានគោលនយោបាយលម្អិតដើម្បីជំរុញការធ្វើពិពិធកម្មខ្សែចង្វាក់ផ្គត់ផ្គង់ទូទាំងពិភពលោក ដើម្បីកាត់បន្ថយការពឹងផ្អែកលើសេដ្ឋកិច្ចចិន។
កាលពីឆ្នាំ2019 រដ្ឋាភិបាលកោះតៃវ៉ាន់ក៏បានផ្ដល់ជំនួយទាំងទឹក អគ្គិសនី ដី ទុន និងពន្ធ ដើម្បីអូសទាញក្រុមហ៊ុនតៃវ៉ាន់នានាឱ្យរើចង្វាក់ផលិតកម្ម ត្រលប់ចូលប្រទេសវិញផងដែរ៕
ប្រភព៖ សារព័ត៌មានបរទេស
