នៅប៉ុន្មានថ្ងៃទៀតខាងមុខនេះ ក្រុមហ៊ុននឹងធ្វើការប្រកាសបង្ហាញចេញស្មាតហ្វូនកម្លាំងខ្លាំងបំផុត ក្នុងស៊េរី Galaxy គឺ Note 20 ដែលឆ្នាំនេះ តម្លៃរបស់ Galaxy Note ជំនាន់ថ្មី នឹងមានការចុះថ្លៃបន្តិចបន្តួច។
សារព័ត៌មានកូរ៉េ Naver បានឱ្យដឹងថា Note20 និង Note20+ នឹងមានតម្លៃធូរជាងមុនប្រមាណ 5ម៉ឺនវ៉ុន ដែលស្មើនឹងប្រមាណ 40ដុល្លារអាមេរិក។ តម្លៃនេះបើធៀបនឹងពេលមុនប្រកាសចេញ កាលពីឆ្នាំមុន Samsung បានបញ្ចេញលក់ Galaxy Note10 ក្នុងតម្លៃ 1.25លានវ៉ុន និង Note10+ តម្លៃ 1.5លានវ៉ុន នៅក្នុងទីផ្សារកូរ៉េខាងត្បូង។
ដោយឡែក ទីផ្សារពេលចេញលក់នៅអាមេរិក Galaxy Note10 មានតម្លៃ 950ដុល្លារ និង Note10+ មានតម្លៃ 1,100ដុល្លារ។
បើទោះជាយ៉ាងនេះក៏ដោយ ប្រភពមិនបានបញ្ជាក់ថា ការចុះថ្លៃនេះ នឹងមាននៅលើទីផ្សារប្រទេសផ្សេងៗ អ៊ីចឹងដែរឬយ៉ាងណានោះទេ។
Samsung បានបញ្ចេញវីដេអូខ្លីមួយដែលបញ្ជាក់អំពីកាលបរិច្ឆេទប្រារព្ធនូវកម្មវិធី Galaxy Unpacked ដោយនឹងធ្វើឡើងនាថ្ងៃទី5 ខែសីហាខាងមុខ ដែលមានការផ្សាយបន្តផ្ទាល់លើគណនី YouTube ផ្លូវការរបស់ Samsung និងលើវេបសាយរបស់ក្រុមហ៊ុនផងដែរ៕
សូមទស្សនាវីដេអូ TVC ខាងក្រោម៖
