ការវាយកូន គឺជារឿងមួយដែលមិនល្អទាល់តែសោះសម្រាប់ក្មេងៗ ព្រោះក្រៅពីនឹងហុចផលមិនល្អដល់ផ្លូវចិត្តរបស់ក្មេងហើយនោះ ថែមទាំងជាការរារាំងការទទួលបានជោគជ័យក្នុងការរស់នៅ និងការធ្វើការងារនាពេលអនាគតរបស់កូនទៀតផង។ កុមារដែលត្រូវឪពុកម្តាយវាយ នឹងមានសញ្ញាថា នឹងក្លាយជាក្មេងរឹងរូស មិនស្តាប់បង្គាប់ឪពុកម្តាយ និងច្រើនតែសម្តែងទង្វើតតាំងខ្លាំងជាងកុមារដែលមិនត្រូវបានដាក់ទោសដោយវិធីនេះ។
ចំពោះរឿងនេះ អ្នកវិភាគមកពីខាង University of Texas សហរដ្ឋអាមេរិក បានធ្វើការសិក្សាអំពីរឿងនេះ និងបានប្រមូលរួបរួមព័ត៌មានមកជាង 50 ឆ្នាំ ក្នុងចំនួនកុមារជាង 160.000 នាក់ហើយ ដោយលទ្ធផលរបស់ការវិភាគនោះបានចង្អុលបង្ហាញច្បាស់ទៅក្នុងទិសដៅតែមួយដូចគ្នាថា ក្មេងៗដែលត្រូវឪពុកម្តាយវាយនោះ នឹងមានទង្វើតតាំងនឹងសង្គម មានសញ្ញាថានឹងក្លាយជាក្មេងច្រងេងច្រងាង និងមានបញ្ហាខាងផ្លូវចិត្តទៀតផង។
ចំណែកខាង Andrew Grogan-Taylor អ្នកវិភាគម្នាក់ទៀតមកពី University of Michigan បាននិយាយថា “ការវាយកូនគឺរឿងដែលផ្ទុយនឹងផ្លូវចិត្តរបស់ឪពុកម្តាយ គ្មានឪពុកម្តាយណាម្នាក់ចង់វាយកូនមែនទែននោះទេ”។
ការយល់ឃើញក្នុងរឿងនេះមួយទៀតរបស់ Elizabeth Gershoff អ្នកវិភាគពីមហាវិទ្យាល័យ តិចសាស់ អូស្ទីន បាននិយាយថា “ការវាយកូននឹងធ្វើឱ្យមានផលប៉ះពាល់ដល់ផ្លូវចិត្តរបស់កុមារក្នុងផ្លូវដែលកាន់តែអាក្រក់ទៅក្នុងរយៈពេលវែង ឪពុកម្តាយគួរតែអប់រំប្រដែប្រដៅកូនដោយវិធីផ្សេងវិញដែលវានឹងហុចផលល្អបំផុត”។
រឿងការដាក់ទោសកូនដោយការវាយនេះ គ្រួសារជាច្រើនអាចកំពុងនៅតែប្រើវិធីការនេះនៅឡើយតាមនិស្ស័យឪពុកម្តាយ តែបើសិនជាមានការវិភាគអំពីអ្នកជំនាញចេញមកបែបនេះហើយ ឡារ៉ែនក៏ចង់សុំឱ្យមានការពិចារណាក្នុងការដាក់ទោសកូនដោយវិធីផ្សេងវិញម្តងសាកលមើលដែរ៕
