ពិតជាមិនធម្មតាមែន! ត្រឹមតែមួយរាត្រីសោះ បទចម្រៀងជាស្នាដៃនិពន្ធថ្មីដោយតារាសម្ដែង សាវិន ហ្វីលីព បានធ្វើឱ្យកក្រើករំជួលអារម្មណ៍មហាជនដែលបានទស្សនាឱ្យស្រក់ទឹកភ្នែករលីងរលោងទៅតាមមនោសញ្ចេតនារបស់បទចម្រៀងមួយនោះ។
ផ្ដើមចេញពីសាច់រឿងដ៏កម្សត់ដែលជារឿងរ៉ាវពិតមួយរបស់អ្នកដឹកនាំសម្តែងដែលធ្លាប់បានឆ្លងកាត់ ហើយបានតាក់តែងជាទំនុកច្រៀង និងសាច់រឿងដែលអាចនិយាយបានថា ការជារំឭកគុណមាតាបិតា និងអនុស្សាវរីយ៍កម្សត់ជាមួយឪពុកអ្នកក្រ និងបទពិសោធនៃក្រុមគ្រួសារដែលជាអ្នកមានទ្រព្យស្ដុកស្តម្ភ តែខ្វះភាពកក់ក្ដៅដែលត្រូវបានលាតត្រដាងចេញពីទិដ្ឋភាពសង្គមខ្មែរទាំងស្រុងនៅក្នុងបទចម្រៀងដែលមានចំណងជើងថា «ឪពុកអ្នកក្រ»។
នេះគឺជាបទចម្រៀងទី១ហើយដែលលោកខៃ ប្រសិទ្ធ ចូលរួមសម្តែងក្រោយពីអាក់ខានសម្តែងក្នុងវិថីសិល្បៈខ្មែរ អស់រយៈពេល23ឆ្នាំមក។ លោក ខៃ ប្រសិទ្ធ បានប្រាប់ឱ្យដឹងថា លោកពិតជាសប្បាយរីករាយចិត្តពេកកន្លង ដែលបានចូលរួមសម្តែងក្នុងបទចម្រៀងបែបអប់រំរបស់អង្គការមូលនិធិសាវិនដើម្បីកុមាររបស់លោក សាវិន ហ្វីលីពនេះ។ លោកថា «ខ្ញុំពិតជាសូមអរគុណច្រើនដែលពុកម៉ែបងប្អូននៅតែនឹករឭកស្រឡាញ់ និងគាំទ្រចំពោះរូបខ្ញុំ»។
គួរបញ្ជាក់ផងដែរថា បទចម្រៀងមួយនេះផលិតដោយផលិតករនិពន្ធទំនុកច្រៀង និងតារាសម្ដែង សាវិន ហ្វីលីព ក្រោមស្នាដៃដឹកនាំសម្តែងដោយ សុធា ហ្វី និពន្ធបទភ្លេង & Melody ដោយណាំ ប៊ុណ្ណារត្ន័ ច្រៀងដោយកញ្ញា សុវត្តិឌី ធារីកា ហើយសម្ដែងដោយ លោកខៃ ប្រសិទ្ធ លោកសាវិន ហ្វីលីព កញ្ញាឃីម ចរិយា និងកញ្ញា វីរីយ៉ា ហ្វីលីព អាយុ១៥ឆ្នាំដែលត្រូវជាកូនស្រីបង្កើតរបស់លោកសាវិន ហ្វីលីព ផងដែរ៕
ទស្សនាវីដេអូឃ្លិបដូចខាងក្រោមនេះ៖
