កាលពីមុន អ្នកជំពាក់លុយគេភាគច្រើនគេសំគាល់ថាជាអ្នកក្រ ឬជាមនុស្សលំបាកលំបិនជាដើម តែបច្ចុប្បន្ននេះ អ្នកមានកាន់តែខ្លាំង មានបំណុលកាន់តែធំដូចគ្នា។ ហេតុនេះ ការមានបំណុលមិនប្រាកដថាសុទ្ធតែរឿងមិនល្អនោះទេ តែចាំបាច់បំណុលនោះជាបំណុលល្អ មិនមែនខ្ចីលុយគេមកចាយវាយខ្ជះខ្ជាយនោះទេ។
ពាក់ព័ន្ធនឹងបញ្ហានេះ លោក ង៉ែត ជូ អ្នកជំនាញផ្នែកហិរញ្ញវត្ថុ បានលើកឡើងថា នៅក្នុងការគ្រប់គ្រងហិរញ្ញវត្ថុផ្ទាល់ខ្លួន កុំសួរលោកពីក្បួនដោះបំណុល។ គួរតែសួរលោកពីវិធីដែលអាចបង្កើនបំណុលដើម្បីពង្រីកឱកាសវិញល្អជាង។ ជាទូទៅបំណុលកាន់តែច្រើន កាន់តែប្រសើរប្រសិនបើនោះជាបំណុលល្អ។ សេដ្ឋីប្រាក់លានអាចមានបំណុលរាប់លានដុល្លា។ មហាសេដ្ឋីអាចមានបំណុលរាប់ពាន់លានដុល្លា។ បំណុលជាគ្រាប់ពូជដ៏សំខាន់ចេញពីហោប៉ៅអ្នកដទៃដែលម្នាក់ៗត្រូវប្រើប្រកបដោយការទទួលខុសត្រូវ និងបញ្ញា។ បុគ្គលដែលចង់ដោះបំណុលមានន័យថាបំណុលមិនមានសុខភាពល្អនោះទេ។ នោះអាចមកពីមូលហេតុ៣យ៉ាង៖
- ប្រើបំណុលខុសគោលដៅដែលមិនបំរើអោយសកម្មភាពរកប្រាក់ចំណេញ។
- បរាជ័យក្នុងអាជីវកម្មឬការវិនិយោគ។
- ខ្ចីបំណុលច្រើនហួសលទ្ធភាព៕
