បច្ចុប្បន្ននេះ ទោះបីជាមានវិបត្តិ Covid-19 ដែលធ្វើឱ្យមនុស្សជាច្រើនត្រូវឃុំខ្លួនឯងក្នុងផ្ទះក៏ដោយ ក៏ផលប៉ះពាល់បរិស្ថាននៅតែត្រូវបានគេគិតគូរ ព្រោះវាអាចនឹងផ្តល់ផលប៉ះពាល់យូរអង្វែងសម្រាប់ការរស់នៅ។
ដើម្បីដោះស្រាយបញ្ហាទាំងអស់នេះ ប្រទេសខ្លះបានចាប់ផ្តើមបង្កើតផ្លូវជិះកង់ឱ្យបានច្រើនដើម្បីជំរុញប្រជាជនឱ្យជិះកង់ និងតំបន់ខ្លះទៀតបានច្នៃឱ្យមានភាពបៃតងនៅក្នុងទីក្រុងដើម្បីស្រូបជាតិពុល។ ថ្មីៗនេះ នៅប្រទេសមួយចំនួនគេចាប់ផ្តើមប្រើប្រាស់រថយន្តក្រុងអេឡិចត្រូនិក ដើម្បីជំរុញឱ្យការធ្វើដំណើរនៅតាមទីក្រុងកាន់តែរលូន លើកទឹកចិត្តឱ្យប្រជាជនកាត់បន្ថយការប្រើប្រាស់មធ្យោបាយធ្វើដំណើរផ្ទាល់ខ្លួន និងកាត់បន្ថយផ្សែងពុលផងដែរ។
អងុ្គការវេទិកាសេដ្ឋកិច្ចពិភពលោកបានបញ្ជាក់ថា ការប្រើប្រាស់រថយន្តក្រុងអេឡិចត្រូនិក អាចជួយកាត់បន្ថយការពុលខ្យល់ និងការផ្លាស់ប្តូរអាកាសធាតុបានប្រកបដោយប្រសិទ្ធភាពខ្ពស់។ បើប្រៀបធៀបពីផលប៉ះពាល់របស់រថយន្តប្រើសាំង និងប្រើម៉ាស៊ូត រថយន្តប្រើអគ្គិសនីមានផលប៉ះពាល់ចំពោះបរិស្ថានតិចតួចបំផុត។ ចំពោះតម្លៃសេវាទៀតសោតក៏មានភាពធូរថ្លៃជាងរថយន្តប្រើប្រេងផងដែរ ដែលវាជាកត្តាជំរុញយ៉ាងសំខាន់ក្នុងការលើកទឹកចិត្តឱ្យប្រជាជនងាកមកប្រើប្រាស់រថយន្តក្រុងសាធារណៈវិញ។ តាមការបញ្ជាក់របស់ស្ថាប័នខាងលើបានឱ្យដឹងថា វាចំណាយតិចជាងរថយន្តប្រើប្រាស់ប្រេងរហូតដល់ទៅ 70% ឯណោះ។
បន្ថែមពីលើនេះ ប្រទេសមួយចំនួននៅតំបន់អាមេរិកឡាទីន បានដាក់ឱ្យប្រជាជនប្រើប្រាស់ដោយឥតគិតថ្លៃរហូតដល់កន្លះឆ្នាំដើម្បីជំរុញឱ្យប្រជាជនងាកមកប្រើប្រាស់មធ្យោបាយដឹកជញ្ជូនរួមវិញ៕
