អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងប្រង្ក្រាបការក្លែងបន្លំ (ក.ប.ប) បានប្រកាសឱ្យប្រជាជនបញ្ឈប់ទទួលទានស្រាថ្នាំចិនសែដែលមានយីហោ « តាំង គួយ» ជាបន្ទាន់ក្រោយមានមនុស្សពុលស្លាប់ និងកំពុងសង្គ្រោះបន្ទាន់ជាច្រើននាក់នៅខេត្តបន្ទាយមានជ័យ។
ជាចំណាត់ការស្ថាប័នខាងលើបាន បើកការស្រាវជ្រាវ និងស៊ើបអង្កេត កន្លែងកើតហេតុ ស្ថិតនៅក្នុងខេត្តបន្ទាយមានជ័យ ដោយបានសាកសួរព័ត៌មាន និងយកគំរូសំណាក ស្រាថ្នាំចិនសែនេះ មកវិភាគនៅរថយន្តមន្ទីរពិសោធន៍ចល័តផ្នែកម្ហូបអាហារ និងមន្ទីរពិសោធន៍ខា្នតតូចរបស់សាខាអគ្គនាយកដ្ឋាន។ ជាលទ្ធផលមន្ត្រីជំនាញ រកឃើញសារធាតុមេតាណុល ក្នុងកម្រិតខ្ពស់ជាង០.35% ដែលអាចបណ្ដាលឱ្យអ្នកទទួលទានស្លាប់បាន។
មន្ត្រីជំនាញ ក៏បានបើកប្រតិបត្តិការបង្ក្រាបទីតាំងផលិត និងចែកចាយស្រាថ្នាំចិនសែនេះ ដោយសហការជាមួយព្រះរាជអាជ្ញា អមសាលាដំបូងរាជធានីភ្នំពេញ ស្នើសុំបើកទីតាំងផលិត ដើម្បីស្វែងរកវត្ថុតាង និងរឹបអូសផលិតផលស្រាថ្នាំចិនសែទាំងនោះ។
បន្ថែមពីលើនេះ អាជ្ញាធរក៏បាន បានបញ្ជាឱ្យសាខា ក.ប.ប. រាជធានី-ខេត្ត ទាំងអស់ប្រមូលត្រលប់មកវិញ នូវស្រាថ្នាំចិនសែយីហោ «តាំង គួយ» ទាំងអស់នៅទូទាំងប្រទេស។
ក្នុងករណីសង្ស័យថាមានបញ្ហា សូមទំនាក់ទំនងមកកាន់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ តាមរយៈលេខទូរស័ព្ទ 023 231 856 ឬ 092 830 856៕
