តារាចម្រៀងប្រុសដ៏ល្បីក្នុងប្រទេសកម្ពុជា លោក ខេមរៈ សិរីមន្ត បានទទួលការគាំទ្រខ្លាំង រហូតដល់សព្វថ្ងៃ ដោយសារតែទេពកោសល្យសិល្បៈ ជាពិសេសទឹកដមសំឡេងដ៏ពិរោះរបស់លោកតែម្ដង ដែលត្រូវចិត្តមហាជនជាច្រើន។ ក្រៅពីការងារសិល្បៈ តារាប្រុសសាច់ដុំធំៗរូបនេះ ក៏មានជំនួញក្នុងដៃជាច្រើនផងដែរ។ ថ្មីៗនេះ បើទោះបីជាស្ថិតក្នុងស្ថានភាពរដូវកាលកូវីដ19 តារាចម្រៀងប្រុសរូបនេះ មិនមានការមមាញឹកនឹងសិល្បៈឡើយ ទើបធ្វើឱ្យមានពេលទំនេរក្នុងការបង្កើតមុខរបរថ្មីមួយទៀត។
ខេមរៈ សិរីមន្ត បានចាប់ផ្ដើមបើកហាងលក់សម្លៀកបំពាក់ ដែលនាំចូលពីប្រទេសក្រៅ ជាម៉ូដសម្លៀកបំពាក់បែបយុវវ័យ។ ដើម្បីទាក់ចិត្តមហាជនអ្នកគាំទ្រ និងជួយប្រូម៉ូតហាងលក់សម្លៀកបំពាក់មួយផងដែរ លោកបានធ្វើការឡាយច្រៀងផ្ទាល់ជាមួយអ្នកគាំទ្រ តាមរយៈការសំណូមពរបទចម្រៀង ដោយលើកយកបទចាស់ៗពិរោះៗចំនួនពីរបទ គឺបទ៖ «អន្ទងស្នែហ៍» និង «ធុញបងមែនទេ» ច្រៀងប្រគំជាមួយហ្គីតាសាំប៉ុណ្ណោះ ឃើញថាពិតជាពិរោះខ្លាំងមែនទែន ។
តាមរយៈការច្រៀងគោកដ៏កម្រនេះផងដែរ លោក ខេមរៈ សិរីមន្ត ក៏បាននិយាយថា លោកពុំធ្លាប់ដែលច្រៀងគោករបៀបនេះទេ ប៉ុន្តែ វាស្ទៃល៍ប្លែកថ្មីមួយសម្រាប់ថ្ងៃនេះ ដោយសារតែមានការជំរុញកម្លាំងចិត្តបងប្អូនទាំងអស់គ្នា៕
