លោក Pham Nhat Vuong ដែលជាមហាសេដ្ឋីវៀតណាម និងជាស្ថានិករបស់ក្រុមហ៊ុន Vingroup ថ្លែងថា នេះគឺជាការសាកល្បងសម្រាប់ប្រព័ន្ធទាំងមូល ព្រោះបើសិនផលិតផលមិនមានគុណភាព រីឯតម្លៃក៏មិនអាចប្រកួតប្រជែងបាន នោះនឹងមិនមានមូលហេតុអ្វីដើម្បីអាចរក្សាវត្តមានបានឡើយ។
កាលពីថ្ងៃទី28ឧសភា ក្រុមហ៊ុន Vingroup បានបើកកិច្ចប្រជុំជាមួយភាគហ៊ុនិកប្រចាំឆ្នាំ2020។ ក្នុងកិច្ចប្រជុំនេះ មហាសេដ្ឋី Phan Nhat Vuong អគ្គនាយកក្រុមហ៊ុន Vingroup បានឱ្យដឹងថា ក្រុមហ៊ុនបុត្រសម្ព័ន្ធ VinFast កំពុងសិក្សាស្រាវជ្រាវទីផ្សារនាំចេញ ខណៈដែល Vinsmart បាននាំចេញទៅកាន់ប្រទេសមួយចំនួនរួចហើយ។
ប៉ុន្តែ អំឡុងពេលបច្ចុប្បន្ន យុទ្ធសាស្ត្ររបស់ក្រុមហ៊ុន Vingroup សម្រាប់ VinFast និង Vinsmart នោះគឺផ្ដោតទៅលើទីផ្សារតែមួយគត់ គឺសហរដ្ឋអាមេរិក។ Vingroup ចាត់ទុកសហរដ្ឋអាមេរិកជាទីផ្សារសំខាន់បំផុត និងជាទីផ្សារដែលពិបាកប្រកួតប្រជែងបំផុត ព្រោះថា បើសិនជាទទួលបានជោគជ័យនៅក្នុងទីផ្សារបែបនេះ នោះការវាយលុកទីផ្សារផ្សេងទៀតនឹងជារឿងងាយស្រួល។
មហាសេដ្ឋីវៀតណាមដែលមានទ្រព្យ 6ពាន់លានដុល្លារ លោក Pham Nhat Vuong ថ្លែងថា “សម្រាប់ក្រុមហ៊ុនថ្មីដែលមានលក្ខណៈជា startup ដូច VinFast និង Vinsmart យើងដាក់គោលដៅយ៉ាងខ្ពស់ និងយ៉ាងម៉ត់ចត់”។
មហាសេដ្ឋីលំដាប់ទីមួយនៅវៀតណាមរូបនេះ បន្តថា Vingroup នឹងសុខចិត្តខាតក្នុងរយៈពេលពី3-5ឆ្នាំសម្រាប់វិស័យឧស្សាហកម្ម ហើយអាចស្រង់ដើមទុនបានមកវិញបានបន្ទាប់ពីដំណាក់កាលនោះ។ ក៏ប៉ុន្តែពេលនោះ Vingroup បានកាន់កាប់ទីផ្សារវៀតណាមបានយ៉ាងល្អទៅហើយ ចំណែកទីផ្សារសហរដ្ឋអាមេរិក យើងក៏មានកន្លែងមួយសម្រាប់ឈរជើងទៅហើយ។ គោលដៅនាបច្ចុប្បន្នរបស់ Vingroup គឺចំណែកទីផ្សារ មិនមែនប្រាក់ចំណេញនោះឡើយ។ Vingroup បានដំណើរការសាកល្បងរថយន្តអគ្គិសនីដំបូងរបស់ខ្លួន ហើយវិស័យ Smartphone ក៏បានលក់ចេញ 1.2លានគ្រឿងហើយដែរ។
ផែនការពាណិជ្ជកម្មរបស់ Vingroup សម្រាប់ឆ្នាំ2020នេះ គឺត្រូវរកចំណូលឱ្យបាន 145លានលានដុង (6,303,000,000ដុល្លារអាមេរិក) (កើន11% ធៀបនឹងឆ្នាំ2019) និងចំណេញក្រោយការបង់ពន្ធ ត្រូវឱ្យបាន5លានលានដុង (217,000,000ដុល្លារអាមេរិក) (ថយចុះ35%)។
ក្រុមហ៊ុន Vingroup ឱ្យដឹងថា ក្នុងវិស័យអចលនទ្រព្យ ក្រុមហ៊ុនបុត្រសម្ព័ន្ធ Vinhomes នឹងបន្តបើកទ្វារលក់គម្រោងថ្មីៗដែលស្ថិតក្នុងមហាគម្រោង Vinhomes Ocean Park, Vinhomes Smart City និង Vinhomes Grand Park។ ចំណែកគម្រោង Vinhomes Wonder Park នៅរដ្ឋធានីហាណូយ ដែលជាគម្រោងតូចជាងខាងលើ ក៏ត្រូវបានដាក់លក់ផងដែរ ខណៈដែលក្រុមហ៊ុនបុត្រសម្ព័ន្ធ Vincom Retail ជំរុញការលក់រាយ និងការកម្សាន្តលំដាប់អន្តរជាតិជាមួយនឹងរូបមន្តប្លែកថ្មី ស្របពេលដែល Vinpearl ផ្ដោតទៅលើការជំរុញវិស័យពាណិជ្ជកម្ម៕
ប្រភព៖ សារព័ត៌មានបរទេស
