ម្ដងនេះមែនទែនហើយ ខណៈដែលតារាចម្រៀងស្រីជើងចាស់ល្បីឈ្មោះ ម៉េង កែវពេជ្ជតា បានឡាយវីដេអូហែកហួនលើបណ្ដាញសង្គមហ្វេសប៊ុក ឥលូវនេះត្រូវបានស្ត្រីម្នាក់ ឈ្មោះ រស់ សោភ័ណ្ឌ ដាក់ពាក្យប្តឹងទៅកាន់សាលាដំបូងរាជធានីភ្នំពេញ ពីបទ បរិហារកេរ្តិ៍ជាសាធារណៈ និងសម្លុតកុំឱ្យដាក់ពាក្យបណ្តឹង តាមបណ្តាញសង្គមហ្វេសប៊ុក។
បើតាមក្នុងពាក្យបណ្តឹង ដាក់ចូលតុលាការកាលពីថ្ងៃទី28 ខែឧសភា ឆ្នាំ2020នេះ ស្ត្រី ដែលទំនងជាប្រពន្ធក្រោយរបស់លោកឧត្តមសេនីយ៍ មួង ឃីម ជាអតីតប្តីរបស់អ្នកនាង ម៉េង កែវពេជ្ជតា បានប្តឹងទាមទារសំណងជំងឺចិត្ត 100រៀល និងសុំឱ្យចោទប្រកាន់ ផ្តន្ទាទោសតាមច្បាប់ និងសុំឱ្យប្រកាសសុំទោសលើបណ្តាញសង្គមហ្វេសបុកជាសាធារណៈ។
ទាក់ទិនទៅនឹងបណ្ដឹងនេះ អ្នកនាង ម៉េង កែវពេជ្ជតា បានបង្ហោះសារអំពាវនាវយ៉ាងវែងអន្លាយថា ៖
ក្រោយពីខ្ញុំបានបកស្រាយអំពីការពិតនៅពីក្រោយនៃសម្លេងជេររបស់ខ្ញុំក្នុងខ្សែរអាត់ និងពាក្យមួលបង្កាច់មួយចំនួនដែលជនថោកទាបបានធ្វើដើម្បីឱ្យគេស្អប់ខ្ញុំ ពេលនេះខ្ញុំ និងកូនបានទទួលយុត្តិធម៌អំពីមហាជនរាប់លាននាក់ហើយ គឺលែងមានការយល់ច្រលំ និងបានទទួលនូវការអាណិត ការផ្តល់កម្លាំងចិត្តយ៉ាងកក់ក្តៅ ។ ម្តាយកូនយើងខ្ញុំសូមគោរពអរគុណលោកទាំងអស់ខ្លាំងណាស់
…ប៉ុន្តែអតីត ស្វាមីបោះត្រារបស់ខ្ញុំ ដែលពាក់ផ្កាយលើស្មាដោយសារខ្ញុំ បានដឹកដៃប្រពន្ធចុងក្មេងជាង30ឆ្នាំមកប្តឹងខ្ញុំឱ្យឡើងតុលាការទៅវិញ ! ផ្កាយលើស្មានេះបានធ្វើបាបខ្ញុំ និងកូនកាលពី១០ឆ្នាំមុនម្តងហើយ។ ពិតជាសក្តិសមនិងកិត្តិយសឯកឧត្តមផ្កាយបីនៃក្រសួងមហាផ្ទៃមែន ក្លាហានណាស់ ក្លាហានបានតែជាមួយមនុស្សស្រី និងកូនក្មេង ។ ដើម្បីផ្គាប់ចិត្តស្រីចុង ហ៊ានលើកដៃធ្វើបាបកូនខ្លួនឯង !
បងប្អូនណាអាចឆ្លើយនឹងខ្ញុំបាន ?
ក្នុងលោកនេះ តើមានស្ត្រីប៉ុន្មាននាក់ដែលត្រូវប្តីថោកទាបផិតក្បត់ដេញប្រពន្ធកូនចេញពីផ្ទះ ហើយដឹកដៃប្រពន្ធចុងមកប្តឹងប្រពន្ធដើម ? ?
ក្នុងលោកនេះ តើមានកូនប៉ុន្មាននាក់ដែលត្រូវរងភាពកំព្រាឪ ព្រោះតែឪស្រីស្រាល្បែង ?
ក្នុងលោកនេះ តើមានកូនប៉ុន្មាននាក់ដែលត្រូវឪពុកចិត្តតិរិច្ឆាន តាមយាយីសូម្បីសល់ម្តាយតែមួយហើយនៅមកតាមបំផ្លាញដោយមិនខ្វល់ដល់ការរស់នៅរៀនសូត្រ និងអារម្មណ៍កូន ឥតល្ហែរបែបនេះ ?
តើឯណាទៅកត្តិយសជានាយនគរបាលជាតិ ? ឯណាទៅកិត្តិយសជាមនុស្ស ? ឯណាទៅកិត្តិយសជាឪពុក ?
គិតទៅ គ្រាន់តែខ្ញុំចង់រកយុត្តិធម៌ និងកិត្តិយសដែលបាត់បង់អស់រយៈ10ឆ្នាំដោយសារពួកគេសោះ ក៏ពួកគេមិនព្រមដែរ ពួកគេចង់អោយខ្ញុំរស់ក្នុងឈ្មោះថោកទាប និងយល់ច្រលំជារៀងរហូត ទើបពួកគេសុខចិត្តពួកគេពិតជាមិនចង់ឱ្យខ្ញុំទទួលបានយុត្តិធម៌ទេ ។ ពេលនេះជុំវិញខ្ញុំសុតតែបីសាច និងខ្មោចព្រាយចូលមករារាំង ..ប៉ុន្តែខ្ញុំមិនខ្លាចឡើយ ! យុត្តិធម៌ត្រូវតែមានសម្រាប់ខ្ញុំ !
ទោះជាពិបាកយ៉ាងណា ក៏ខ្ញុំមិនព្រមសូមទោសអាមនុស្សក្បត់ប្រពន្ធកូន ក្បត់ប្រពៃណីយទាំងពីរនាក់ឯងជាដាច់ខាត ! ! !
