ByteDance ដែលជាក្រុមហ៊ុនមេរបស់ TikTok កំពុងតែបោះជំហានចេញពីស្រុកកំណើតរបស់ខ្លួនដើម្បីឆ្ពោះទៅកាន់ទីផ្សារពិភពលោក ដោយគោលដៅសំខាន់របស់ក្រុមហ៊ុននេះ អាចជាសហរដ្ឋអាមេរិក។
ការដែល TikTok អញ្ជើញ Kevin Mayer ពីក្រុមហ៊ុន Walt Disney មកធ្វើជា CEO បានបង្ហាញយ៉ាងច្បាស់អំពីគោលបំណងរបស់ ByteDance ក្នុងការរើក្បាលម៉ាស៊ីនរបស់ខ្លួនបន្តិចម្ដងៗ ចាកចេញពីប្រទេសចិនដែលជាស្រុកកំណើត។ ឥរិយាបថនេះត្រូវបានធ្វើឡើងនៅពេលពិភពលោកមានភាពតានតឹងកាន់តែខ្លាំងឡើងៗ ពាន់់ព័ន្ធនឹងបញ្ហាជាច្រើនជុំវិញរឿងនយោបាយ សេដ្ឋកិច និងសុខភាព។
យុទ្ធសាស្ត្រខាងលើនេះ មិនត្រឹមសំដៅទៅលើតែ TikTok (ដែលមិនមានមុខនៅប្រទេសចិន) នោះទេ តែវាអនុវត្តចំពោះក្រុមហ៊ុនបុត្រសម្ព័ន្ធផ្សេងៗទៀតរបស់ ByteDance ក្នុងនោះក៏មានបណ្ដាញសង្គមនៅឥណ្ឌា ដូចជា Helo ជាដើម។
ByteDance បានពង្រីកសកម្មភាពផ្នែកបច្ចេកទេស ស្រាវស្រាវ និងអភិវឌ្ឍនានារបស់ TikTok នៅ Mountain View ក្នុងរដ្ឋ California សហរដ្ឋអាមេរិក។ ប្រភពព័ត៌មានរបស់ Reuters បានឱ្យដឹងថា ក្រុមហ៊ុននេះបានជួលវិស្វករផ្នែកព័ត៌មានវិទ្យាចំនួនជាង150នាក់នៅទីនេះផងដែរ។ ByteDance ក៏បានជួលនាយកផ្នែកទំនាក់ទំនងម្នាក់ ដែលធ្វើការនៅការិយាល័យក្នុងទីក្រុង New York ដើម្បីរក្សាទំនាក់ទំនងជាមួយក្រុមអ្នកវិនិយោគធំៗ ដូចជា General Atlantic និង KKR ជាដើម។ កន្លងមក ទំនាក់ទំនងនេះត្រូវបានគ្រប់គ្រងដោយទីស្នាក់ការនៅរដ្ឋធានីប៉េកាំង។
ប្រភពព័ត៌មានបានឱ្យដឹងថា ក្រុមហ៊ុនចិន ByteDance នេះ តែងតែជ្រើសរើសបុគ្គលិកផ្នែកព័ត៌មានវិទ្យាជាបន្តបន្ទាប់នៅពាសពេញពិភពលោក ក្នុងនោះមាន សិង្ហបុរី ឥណ្ឌូនេស៊ី និងប៉ូឡូញជាដើម។ល។
ដើម្បីបង្ហាញថា ក្រុមហ៊ុន ByteDance មិនជាប់ពាក់ព័ន្ធនឹងរដ្ឋាភិបាលក្រុងប៉េកាំងដូចទៅនឹងការចោទប្រកាន់របស់សហរដ្ឋអាមេរិក TikTok បានបញ្ជូនកម្លាំងផ្នែកបច្ចេកវិទ្យារបស់ខ្លួនចេញពីប្រទេសចិនជាបណ្ដើរៗហើយ ដោយគោលដៅគឺសហរដ្ឋអាមេរិក។ ប៉ុន្តែ ទំនាក់ទំនងស្អិតល្មួតរវាងក្រុមហ៊ុនជាមួយនឹងក្រុមវិស្វករ IT នៅប្រទេសចិននឹងជាឧបសគ្គធំសម្រាប់គោលដៅនេះ។ ក្រៅពី TikTok ក្រុមហ៊ុន ByteDance ក៏មានកំណែស្រដៀងនឹង TikTok មួយផ្សេងទៀតសម្រាប់អ្នកប្រើប្រាស់នៅប្រទេសចិន នោះគឺ Douyin។ ការបែងចែកនេះមិនមែនជារឿងធម្មតានោះទេ តែពួកវាមានរចនាសម្ព័ន្ធតែមួយ។ ចំណែកបច្ចេកទេស និងទម្រង់បង្ហាញរូបភាព(interface) របស់ TikTok និង Douyin ក៏ប្រហាក់ប្រហែលគ្នាដែរ។
Paul Marquest មេធាវីរបស់ CFIUS (Committee on Foreign Investment in the United States) ដែលជាគណៈកម្មធិការវិនិយោគបរទេសក្នុងទឹកដីសហរដ្ឋអាមេរិករបស់រដ្ឋាភិបាលអាមេរិកាំង បានឱ្យដឹងថា ការព្យាយាមបង្កើតរចនាសម្ព័ន្ធរបស់ ByteDance គឺជាប្រការដែលគួរឱ្យទុកចិត្ត។ CFIUS នឹងវាយតម្លៃថាតើក្រុមហ៊ុននេះពិតជារកស៊ីដោយឯករាជ្យ និងមិនជាប់ពាក់ព័ន្ធនឹងបញ្ហានយោបាយមែនដែរឬអត់។
បើទោះជាត្រូវប្រឈមនឹងបញ្ហាហាមឃាត់ច្រើនពីសហរដ្ឋអាមេរិក ប៉ុន្តែ TikTok នៅតែទទួលបានជោគជ័យច្រើនក្នុងការរកស៊ី។ ស្ថិតិថ្មីបំផុតពីក្រុមហ៊ុនផ្ដល់សេវាកម្មផ្នែកទីផ្សារ ឈ្មោះ Sensor Tower នៅក្នុងខែមេសា ឆ្នាំ2020 បានបង្ហាញថា TikTok បានយកឈ្នះ Youtube ហើយបានក្លាយជាកម្មវិធិដែលរកបានចំណូលច្រើនជាងគេក្នុងពិភពលោក ដោយរកបាន78លានដុល្លារក្នុង1ខែ។ នៅដើមឆ្នាំនេះ TikTok ក៏បានយកឈ្នះលើ WhatsApp ហើយក៏បានក្លាយជាកម្មវិធី (App) ដែលមានអ្នកទាញយកមកប្រើប្រាស់ច្រើនជាងគេបង្អស់ក្នុងពិភពលោកផងដែរ៕
ប្រភព៖ Reuters
