ក្រសួងសុខាភិបាល បានបញ្ជាក់ថាចាប់ពីថ្ងៃទី 27ខែឧសភាឆ្នាំ2020 នេះតទៅ ប្រជាជនខ្មែរនៅបរទេសទាំងអស់មិនចាំបាច់ត្រូវមានវិញ្ញាបនបត្រសុខភាព (health certificate) បញ្ជាក់ថាគ្មានមេរោគ Covid-19 ទៀតនោះទេ ដើម្បីចូលមកក្នុងប្រទេសវិញ។
ទោះជាយ៉ាងនេះក្តីអ្នកដែលបានធ្វើដំណើរពីបរទេសចូលមកកាន់ប្រទេសកម្ពុជាទាំងអស់ត្រូវអនុវត្តនូវវិធានសំខាន់ៗមួយចំនួនដូចជា អ្នកដំណើរជនជាតិខ្មែរ និងបរទេសដែលធ្វើដំណើរចូលមកដល់កម្ពុជាត្រូវបញ្ចូនទៅមណ្ឌលរង់ចាំ ដើម្បីធ្វើតេស្តរកមេរោគ Covid-19 និងរង់ចាំលទ្ធផលពីមន្ទីរពិសោធន៍ប៉ាស្ទ័រ។ ក្នុងករណីមានអ្នកដំណើរណាម្នាក់ ឬច្រើនដែលមាន Covid-19 វិជ្ជមាន រាល់អ្នកដំណើររួមជាមួយគ្នាផ្សេងទៀតទាំងអស់ត្រូវឱ្យធ្វើចត្តាឡីស័ករយៈពេល 14ថ្ងៃ នៅទីតាំងដែលកំណត់ដោយគណៈអន្តរក្រសួងប្រយុទ្ធ Covid-19។
លើសពីនេះទៅទៀត ក្នុងករណីអ្នកដំណើរទាំងអស់មានលទ្ធផលបញ្ជាក់ពីមន្ទីពិសោធន៍ថាជំងឺ Covid-19 អវិជ្ជមាន ពួកគាត់ត្រូវអនុញ្ញាតឱ្យធ្វើចត្តាឡីស័ករយៈពេល 14ថ្ងៃនៅតាមផ្ទះរៀងៗខ្លួនក្រោមការត្រួតពិនិត្យពីអាជ្ញាធរមូលដ្ឋាន និងមន្ត្រីសុខាភិបាល ដោយតម្រូវឱ្យធ្វើតេស្តបញ្ជាក់ម្តងទៀតនៅថ្ងៃទី13 នៃការធ្វើចត្តាឡីស័ក៕
