ក្នុងរយៈពេលស្ទើរពេញមួយខែនេះ កម្ពុជាបានអនុវត្តសកម្មភាពរឹតបន្តឹងច្បាប់ចរាចរណ៍ផ្លូវគោក ដោយមានការផាកពិន័យធ្ងន់ធ្ងរជាងមុន និងមានសកម្មភាពតឹងតែងជាងមុន ដើម្បីធានាពីសុវត្ថិភាពរបស់ប្រជាជនក្នុងការបើកបរ។ ស្របជាមួយគ្នានេះដែរ មានប្រជាជនមួយចំនួនក៏បានសម្តែងការគាំទ្រ ខណៈប្រជាជនមួយចំនួនបានរិះគន់ចំពោះចំណាត់ការថ្នាក់ជាតិនេះ។
នៅក្នុងពិធីផ្សព្វផ្សាយរបាយការណ៍ជាតិស្តីពីការងារប្រយុទ្ធប្រឆាំងអំពើជួញដូរមនុស្សឆ្នាំ2019 និងលើកទិសដៅបន្តឆ្នាំ2020 សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថាចាប់ពីថ្ងៃទី1 ខែឧសភា ឆ្នាំ2020 រហូតមកដល់ពេលនេះ មានអ្នករិះគន់ប្រមាណមិនដល់ 1ភាគរយទេដែលបានយល់ខុសចំពោះកិច្ចខិតខំប្រឹងប្រែងរបស់រាជរដ្ឋាភិបាល និងនគរបាលចរាចរណ៍។ សម្តេចបញ្ជាក់ជាថ្មីទៀតរថាប្រសិនបើពលរដ្ឋអ្នកដំណើរមិនប្រព្រឹត្តខុសអ្វីពេលកំពុងបើកបរ គឺគ្មានសមត្ថកិច្ចណាឃាត់សួរនាំរកឯកសារនោះទេ។
គួរបញ្ជាក់ថា គិតត្រឹមរយៈពេល26ថ្ងៃកន្លងមក បើធៀបនឹងរយៈពេលដូចគ្នាឆ្នាំ2019 និងធៀបនឹងខែមេសាឆ្នាំ2020។ ធៀបនឹងរយៈពេលដូចគ្នាឆ្នាំ2019 គឺគ្រោះថ្នាក់បានថយចុះ112លើក ស្មើនឹង38ភាគរយ អ្នកស្លាប់បានថយចុះ៣34នាក់ ស្មើនឹង26ភាគរយ,អ្នករបួសថយចុះ165នាក់ ស្មើនឹង31ភាគរយ ហើយបើធៀបនឹងរយៈពេលដូចគ្នាកាលពីខែមេសាកន្លងទៅ មានអ្នកស្លាប់ថយចុះ7នាក់ រងរបួសបានថយចុះរហូតដល់82២នាក់៕
