កំពុងសម្ងំស្ងាត់ស្ងៀមបានមួយរយៈ ឥឡូវ Justin Bieber កើតរឿងក្ដៅៗឡើងទៀតហើយ ដោយលោកបានបើករថយន្ដទៅបុកបុរសម្នាក់ជាជនជាតិស្បែកខ្មៅនៅក្បែរព្រះវិហារសាសនាគ្រិស្ត Hillsong នៅក្នុងទីក្រុង Los Angeles ។
រឿងនេះ មិនអាចបន្ទោសតារាចម្រៀងវ័យ 23 ឆ្នាំរូបនេះបានឡើយ ព្រោះថា ដំបូងឡើយគឺបុរសដែលមានមុខរបរជា Paparazzi ឬ អ្នកតាមប្រមាញ់ថតរូបជនល្បីឈ្មោះ និងជាអ្នកសារព័ត៌មានផ្នែកសិល្បៈកម្សាន្ដផងនោះ បានព្យាយាមតាមថតរូប Justin ខណៈដែល Justin កំពុងធ្វើដំណើរទៅឡើងរថយន្ដធំប្រភេទ SUV ដែលបានចតរង់ចាំលោក។ ក៏ប៉ុន្ដែ នៅពេលដែលតារាចម្រៀងរូបនេះ បានបើកឡានចេញទៅ ក៏ស្រាប់តែអ្នកសារព័ត៌មាន Paparazzi នោះព្យាយាមស្ទុះទៅតាមថត រហូតដល់លោកមិនប្រយ័ត្ន ក៏បុកអ្នកសារព័ត៌មាននោះនៅនឹងកន្លែងធ្វើឱ្យរងរបួសជើងជាទម្ងន់តែម្តង។ ភ្លាមៗនោះតារាចម្រៀងខាងលើបានចុះមកមើល ព្រមទាំងហៅរថយន្ដពេទ្យ និងបានសហការជាមួយមន្ត្រីប៉ូលិសចំពោះករណីនេះផងដែរ។
គួរបញ្ជាក់ផងដែរថា ខណៈនេះ តារាចម្រៀង Justin Bieber កំពុងត្រូវបានសាកសួរពីមន្ត្រីប៉ូលិសនៅក្នុងតំបន់ ហើយប៉ូលិសបានអះអាងប្រាប់សារព័ត៌មាន The Mirror យ៉ាងច្បាស់ថា តារាចម្រៀងវ័យក្មេងរូបនេះ មិនត្រូវបានចាប់ឃុំខ្លួនឡើយ ៕
