ក្រុម Manchester City របស់លោក Pep Guardiolaបានចំណាយប្រាក់ដ៏ច្រើនសន្ធឹកសន្ធាប់ដើម្បីពង្រឹងតំបន់ការពាររបស់ពួកគេនៅរដូវក្តៅនេះហើយពួកគេបានបង្ហាញថាពួកគេនឹងក្លាយជាក្រុមដែលត្រូវតែទទួលបាននូវការចាប់អារម្មណ៍នៅរដូវកាលខាងមុខនេះក្រោយពីបានបំបាក់ក្រុម Real Madrid យ៉ាងចាស់ដៃក្នុងលទ្ធផល 4-1ក្នុងការប្រកួតមិត្តភាពកាលពីថ្ងៃព្រហស្បតិ៍។
ការបង្ហាញពីទម្រង់លេងយ៉ាងល្អក្នុងតង់ទី២នៅពីមុខអ្នកគាំទ្រចំនួន93,000នាក់ ក្នុងទីក្រុង Los Angelesបានជួយឲ្យក្រុម Man City កត់ត្រាជ័យជម្នះក្នុងការប្រកួតមិត្តភាពជាលើកទី1របស់ពួកគេយ៉ាងកក់ក្តៅ។ ក្រុមReal Madrid មិនអាចធ្វើការរារាំងក្រុម Man City របស់លោក Guardiola បានឡើយក្រោយពីពួកគេបានដាក់សម្ពាធត្រឹមតែមួយលើកគត់នៅដើមតង់ទី2។
ការចំណាយប្រាក់ចំនួន28.5លានផោន (ស្មើនឹង37លានដុល្លារអាមេរិក) របស់ក្រុម Man Cityដើម្បីទិញខ្សែការពារ Nicolas Otamendi កាលពី2ឆ្នាំមុនហាក់បានផ្តល់នូវការប្រែប្រួលតិចតួចណាស់មុននឹងពួកគេបានចំណាយប្រាក់ដ៏ច្រើនសន្ធឹកសន្ធាប់ដើម្បីនាំយកខ្សែការពារ Kyle Walker, John Stonesនិង Benjamin Mendy ក្នុងរយៈពេល12ខែចុងក្រោយនេះ។ ប៉ុន្តែ ក្រោយពី Otamendiបានស៊ុតបាល់ពីចម្ងាយចូលទីយ៉ាងល្អ1គ្រាប់មក ក្រុម Man City បានបន្តបង្ហាញពីទម្រង់លេងយ៉ាងរឹងមាំដើម្បីរកគ្រាប់បាល់បញ្ចូលទី3គ្រាប់បន្តបន្ទាប់គ្នា មុនពេល Realបានធ្វើការវាយបកបាន1គ្រាប់វិញនៅជិតបញ្ចប់ការប្រកួត។
ស្របពេលជាមួយគ្នានេះដែរ នៅក្នុងការប្រកួតមួយទៀត ខ្សែប្រយុទ្ធ Eder បានស៊ុតបាល់បញ្ចូលទី2គ្រាប់ដើម្បីជួយឲ្យក្រុម Inter Milan កត់ត្រាជ័យជម្នះដ៏មិននឹកស្មានដល់ក្នុងលទ្ធផល 2-0នៅពេលប្រកួតជាមួយនឹងក្រុមម្ចាស់ជើងឯកអាល្លឺម៉ង់ Bayern Munich កាលពីថ្ងៃព្រហស្បតិ៍ក្នុងការប្រកួតមិត្តភាពនៅលើទឹកដីសិង្ហបុរី៕
ប្រភពពី៖ Skysport
