អ្វីទៅដែលធ្វើឱ្យបុរសរៀបការហើយមានសេចក្តីសុខ? មានលទ្ធផលនៃការស្រាវជ្រាវថ្មីមួយបានបង្ហាញឱ្យដឹងថា រឿងនោះវាអាស្រ័យលើមនុស្សដែលជាភរិយាថា តើនាងមានសេចក្តីសុខឬទេ?
ក្រុមអ្នកស្រាវជ្រាវមកពីមហាវិទ្យាល័យ រ៉ាត់ជើរ៍ និងមហាវិទ្យាល័យ មិឈិហ្គែន បានធ្វើការជំរឿនគូអាពាហ័ពិពាហ៍ជិត 400 គូដែលរៀបការជាមធ្យមក្នុងអាយុ 38 ឆ្នាំ ដោយក្រុមគោលដៅទាំងនោះត្រូវឆ្លើយនឹងសំណួរពាក់ព័ន្ធនឹងក្តីពេញចិត្តក្នុងជីវិតគូ។
លទ្ធផលនៃការស្រាវជ្រាវបានរកឃើញថា នៅពេលកម្រិតក្តីពេញចិត្តក្នុងជីវិតគូរបស់ភរិយាឡើងខ្ពស់ជាងកម្រិតមធ្យម ស្វាមីក៏មានសញ្ញាថានឹងមានសេចក្តីសុខច្រើនជាងនោះទៅទៀត តែក្នុងផ្លូវផ្ទុយគ្នាវិញ នៅពេលស្វាមីមានសេចក្តីសុខខ្លាំងក្នុងជីវិតក្រោយការរៀបការ ភរិយាបែរជាមើលទៅហាក់ដូចជាមានសេចក្តីសុខត្រឹមតែបន្តិចបន្តួចប៉ុណ្ណោះ។
អ្នកស្រាវជ្រាវអធិប្បាយថា លទ្ធផលនៃការពិនិត្យបានធ្វើឱ្យមើលឃើញនូវការពិតថា នៅពេលភរិយាពេញចិត្តជាមួយនឹងការរៀបការ និងជីវិតបន្ទាប់ពីអាពាហ៍ពិពាហ៍នោះ នាងមានទំនោរក្នុងការធ្វើអ្វីដើម្បីផ្គាប់ចិត្តស្វាមីច្រើនឡើង ដែលវានឹងហុចផលវិជ្ជមានដល់ជីវិតរបស់ស្វាមី។
អ្នកស្រាវជ្រាវបានបញ្ជាក់ថា សេចក្តីពេញចិត្តក្នុងជីវិតអាពាហ័ពិពាហ៍ នឹងនាំឆ្ពោះទៅរកជីវិតគូដែលស្ថិតស្ថេរយូរអង្វែង ដែលនឹងជួយការពារបញ្ហាការឈឺចាប់ខាងផ្លូវចិត្តដែលកើតពីភាពតានតឹងធុញថប់ក្នុងជីវិត ហើយនឹងជួយគូអាពាហ៍ពិពាហ៍ឱ្យអាចចាត់ការឧបសគ្គផ្សេងៗក្នុងជីវិតបានទៀតផង៕
ដោយ ៖ អ្នកគ្រូ ឆវី
