វិស័យមួយចំនួន ត្រូវបានទទួលភាពអនុគ្រោះជាអាទិភាព ជាពិសេសផ្នែកអាជីវកម្មសណ្ឋាគារ ផ្ទះសំណាក់ ទេសចរណ៍ សំណង់ វាយនភណ្ឌកាត់ដេរ និងផលិតផលស្បែកជើង ដើម្បីបន្តនិរន្តរភាពអាជីវកម្មទាំងនេះ។ នេះបើតាមសេចក្តីប្រកាសរបស់សមាគមធនាគារនៅកម្ពុជា និងសមាគមមីក្រូហិរញ្ញវត្ថុ ដែលបានលើកទឹកចិត្តដល់សមាជិករបស់ខ្លួនឱ្យបន្តផ្តល់ឥណទាន ដែលជាតម្រូវការរបស់វិស័យទាំងនោះ។
យោងតាមសេចក្តីថ្លែងការណ៍រួមនៃសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជាស្តីពីវិធានការការពារផលប៉ះពាល់បណ្តាលមកពីការរីករាលដាលជាសកលនៃវីរុសកូវីដ-19 ចេញផ្សាយនៅថ្ងៃទី9 ខែមីនា ឆ្នាំ2020 បានឱ្យដឹងថា សមាជិកសមាគម គប្បីរក្សាភាពទន់ភ្លន់ និងពិនិត្យតាមលទ្ធភាពជាក់ស្តែងក្នុងការដោះស្រាយបំណុលយឺតយ៉ាវ ដែលបណ្តាលមកពីផលប៉ះពាល់វីរុសកូវីដ-19។
សេចក្តីថ្លែងការណ៍ដដែលបន្តថា សមាជិកសមាគម ត្រូវបន្តតាមដាន និងដាក់ចេញវិធានការ ការពារការរីករាលដាលនៃវីរុសកូវីដ-19 ទៅលើបុគ្គលិក និងអតិថិជន ដើម្បីធានាឱ្យបាននិរន្តរភាពប្រតិបត្តិការរបស់គ្រឹះស្ថានធនាគារ និងហិរញ្ញវត្ថុជាប្រក្រតី។
បន្ថែមលើវិធានការការពារខាងលើ សមាជិកសមាគមទាំង2 ក៏បាននិងកំពុងចូលរួមជាមួយរាជរដ្ឋាភិបាលកម្ពុជាក្នុងគម្រោងសហហិរញ្ញប្បទាន ទ្រទ្រង់សហគា្រសធុនតូច និងមធ្យមតាមរយៈក្រសួងសេដ្ឋកិច្ច និងហិរញ្ញវត្ថុ។ គម្រោងនេះ នឹងផ្តល់ទុនក្នុងអត្រាការប្រាក់សមរម្យដល់សហគ្រាសធុនតូច និងមធ្យមនៅកម្ពុជា លើវិស័យអាទិភាព ហើយដែលគ្រោងចាប់ផ្តើមដំណើរការក្នុងពេលឆាប់ៗខាងមុខនេះ។
សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក៏បានអំពាវនាវដល់សមាជិករបស់ខ្លួនទាំងអស់ រួមមានធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុ គ្រឹះស្ថានឥណទានជនបទ និងក្រុមហ៊ុនភតិសន្យាហិរញ្ញវត្ថុ ចូលរួមអនុវត្តនូវវិធានការខាងលើដើម្បីកាត់បន្ថយផលប៉ះពាល់ជាយថាហេតុ ក៏ដូចជាជំរុញកំណើនសេដ្ឋកិច្ចជាតិបន្ថែមទៀត។
នៅក្នុងសេចក្តីថ្លែងការណ៍របស់សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក៏បានប្រកាសគាំទ្រចំពោះសេចក្ដីប្រកាសរបស់ធនាគារជាតិនៃកម្ពុជា ដែលបានដាក់ចេញកាលពី5 ខែមីនា ឆ្នាំ2020 កន្លងមកនេះផងដែរ លើការទប់ទល់ការរីករាលដាលនៃវីរុស Covid-19 និងផលអវិជ្ជមាន ជាយថាហេតុផ្សេងទៀត៕
