នៅថ្ងៃទី11 ខែកុម្ភៈ តាមការចេញផ្សាយរបស់ CNN Business បានឱ្យដឹងថា មានកម្មវិធីមួយឈ្មោះថា Corona 100m បានដាក់ឱ្យដំណើរការដើម្បីឆ្លើយតបនឹងវីរុសកូរ៉ូណាប្រភេទថ្មី ដែលអ្នកបង្កើតកម្មវិធីនេះ មួយចំនួនបានបង្កើតកម្មវិធីដែលអាចឱ្យគេបានដឹងព័ត៌មានអំពីវីរុសកូរ៉ូណា និងទីតាំងដែលកើតមានវីរុសកំណាចនេះ។
កម្មវិធីនេះនឹងប្រមូលទិន្នន័យពីរដ្ឋបាលសាធារណៈ រួមមានមជ្ឈមណ្ឌលគ្រប់គ្រងជំងឺឆ្លងរបស់កូរ៉េ ដើម្បីបង្ហាញអំពីកាលបរិច្ឆេទដែលអ្នកជំងឺម្នាក់ឆ្លងវីរុសកូរ៉ូណា រួមជាមួយសញ្ជាតិ អាយុ ភេទ និងទីកន្លែងដែលគេបានទៅដល់ផងដែរ។
ប្រសិនបើអ្នកប្រើប្រាស់កម្មវិធីនេះស្ថិតនៅចម្ងាយ 100ម៉ែត្រ ពីទីកន្លែងដែលមានមនុស្សឆ្លងវីរុសកូរ៉ូណាបានទៅដល់នោះ គេនឹងទទួលបានការផ្ដល់ដំណឹង (Notification) ព្រមានតែម្ដង ដែលដូចជាឈ្មោះរបស់កម្មវិធីនេះដែរ។
អ្នកបង្កើតកម្មវិធីនេះឈ្មោះ Bae Won-Seok និយាយថា កម្មវិធីនេះបន្តរីកធំ ដោយរៀងរាល់ 1ម៉ោងម្ដង នឹងមានការទាញយកទៅប្រើជាង 2ម៉ឺនដង ហើយពេលខ្លះគាំងដោយសារមានចំនួនទាញយកច្រើនលើសលប់ពេក។
នៅមានមួយទៀត គឺកម្មវិធី Corona Map ដែលវាក៏នឹងបង្ហាញទីតាំងរបស់អ្នកដែលឆ្លងវីរុសកូរ៉ូណាផងដែរ ហើយវាបានក្លាយជាកម្មវិធីដែលមានគេទាញយកទោប្រើច្រើនជាងគេនៅកូរ៉េខាងត្បូង។
Corona Map នេះ ដំណើរការដូច Corona 100m ដែរ គឺអាចឱ្យអ្នកប្រើប្រាស់ចៀសវាងពីតំបន់ដែលអ្នកឆ្លងវីរុសកូរ៉ូណាធ្លាប់បានទៅដល់។ គួរបញ្ជាក់ផងដែរថា ប្រទេសកូរ៉េខាងត្បូង កើតមានករណីថ្មី 813ករណីជាប់ជាកំណត់ត្រាខ្ពស់បំផុតមួយដែលមិនធ្លាប់មានពីមុនមកឡើយ។
Link: https://play.google.com/store/apps/details?id=jcsla.novelcoronavirus