រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារគ្រប់គ្រងគម្រោង Financial Management Information Systems ហៅកាត់ថា FMIS ឬគម្រោងគ្រប់គ្រងហិរញ្ញវត្ថុសាធារណៈ បានប្រកាសដាក់ឱ្យប្រើប្រាស់នូវប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈជាផ្លូវការនៅក្រសួង-ស្ថាប័នចំនួន17 និងអង្គភាព
ថវិកាដែលជាឤណាប័ក ផ្ទេរសិទ្ធិពេញលេញចំនួន13 កាលពីចុងខែកុម្ភៈ ឆ្នាំ2020 នៅក្រសួងសេដ្ឋកិច្ច និងហិរញ្ញវត្ថុ។
ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បាន ឱ្យដឹងថា ការដាក់ឱ្យអនុវត្តប្រព័ន្ធ FMIS ដល់ក្រសួងស្ថាប័នទាំង17 គឺជាប្រវត្តិសាស្រ្តថ្មី នៅក្នុង ដំណើរការអនុវត្តន៍គម្រោង FMIS ដែលក្រសួង-ស្ថាប័ននៃរាជរដ្ឋាភិបាលកម្ពុជា បានប្រើប្រាស់ប្រព័ន្ធមួយនេះប្រកបដោយភាពជឿទុកចិត្ត និងមានគុណភាពខ្ពស់ក្នុងការគ្រប់គ្រងការអនុវត្តចំណូល-ចំណាយថវិកាជាតិ និងឤចឈានទៅក្តាប់យកកាលានុវត្តភាពពីបដិវត្តន៍ឧស្សាហកម្មទី4 និងសក្តានុពលនៃសេដ្ឋកិច្ចឌីជីថលទៀតផង។
ឯកឧត្តមបណ្ឌិតសភាចារ្យរដ្ឋលេខាធិការ បានមានប្រសាសន៍ឱ្យដឹងថា ក្រសួងសេដ្ឋកិច្ច និងហិរញ្ញវត្ថុ នឹងដើរតួជាស្ថាប័ននាំមុខ និងដំបូងគេក្នុងការអនុវត្តនីតិវិធីតម្រង់ទិសថ្មីតាមប្រព័ន្ធ FMIS ទាំងស្រុងនៅក្នុងឆ្នាំ2020 នេះ។ ដោយចាប់ផ្ដើមពីនីតិវិធីទូទាត់ចំណាយបៀវត្សរ៍ជូនមន្ត្រីរាជការស៊ីវិល និងការទូទាត់ត្រង់ទៅកាន់នីតិវិធីអនុវត្តន៍ការងារផ្សេងៗទៀត ដែលផ្សារភ្ជាប់នឹងការប្រើប្រាស់ប្រព័ន្ធ FMIS រួមជាមួយនឹងការគិតគូរ កាត់សម្រួលលើឯកសារភ្ជាប់ជាក្រដាស (Hard Copy) និងបន្តពង្រីកទៅកាន់ក្រសួង-ស្ថាប័នជាបន្តបន្ទាប់។
ឯកឧត្តមបានបន្តថា ម្យ៉ាងទៀតការប្រមូលធាតុចូលគន្លឹះបន្ថែមពីក្រសួង-ស្ថាប័ន និងដៃគូអភិវឌ្ឍន៍លើការរៀបចំផែនការយុទ្ធសាស្ត្រតម្រង់ទិសនីតិវិធីអនុវត្តន៍ការងារឆ្នាំ2020-2025 ឱ្យកាន់តែល្អ និងគ្រប់ជ្រុងជ្រោយ និងបន្ស៊ីគ្នាជាមួយនឹងផែនការយុទ្ធសាស្ត្រគ្រប់គ្រងការផ្លាស់ប្តូរប្រកបដោយភាពប្រទាក់ក្រឡាគ្នា មុននឹងអនុម័តដាក់ឱ្យអនុវត្តនៅក្នុងឆ្នាំ2020 ដែលនេះជាជំហានមួយថ្មីទៀត រួមចំណែកដល់ការសម្រេចបានគោលដៅការរៀបចំខ្លួនសម្រាប់សេដ្ឋកិច្ចឌីជីថល និងឆ្លើយតបទៅនឹងបដិវត្តន៍ឧស្សាហកម្មជំនាន់ទី4 ដែលកំណត់ក្នុងយុទ្ធសាស្ត្រចតុកោណរបស់រាជរដ្ឋាភិបាលដំណាក់កាលទី4។
ឯកឧត្តមបណ្ឌិតសភាចារ្យបានគូសបញ្ជាក់ពីតួនាទីសំខាន់របស់ប្រព័ន្ធ FMIS ក្នុងការជួយពង្រឹងប្រសិទ្ធភាព គណនេយ្យភាព តម្លាភាព និងគាំទ្រដល់ការគ្រប់គ្រង និងតាមដានការអនុវត្តថវិកា និងហិរញ្ញវត្ថុ ស្របពេលដែលគ្រប់ក្រសួង-ស្ថាប័នទាំងអស់ ត្រូវបានដាក់ឱ្យអនុវត្តថវិកាកម្មវិធី និងការបង្កើតអង្គភាពថវិកា ជាពិសេសគាំទ្រដល់ដំណើរឆ្ពោះទៅដំណាក់កាលទី4 នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈគឺ គណនេយ្យភាព សមិទ្ធកម្មនៅឆ្នាំ2021 ខាងមុខនេះ។
ឯកឧត្តមបានបញ្ជាក់ទៀតថា ប្រព័ន្ធ FMIS នេះគាំទ្រដល់ការទូទាត់ថវិកាតាមអេឡិចត្រូនិក ការធ្វើសន្ធានកម្មក្នុងការផ្លាស់ប្តូរទិន្នន័យពីប្រព័ន្ធខាងក្រៅដោយស្វ័យប្រវត្តិ ការលើកកម្ពស់គុណភាពនៃការផលិតរបាយការណ៍ និងការទាញយករបាយការណ៍តាមតម្រូវការចាំបាច់របស់ក្រសួងសាមីនីមួយៗ និងធ្វើឱ្យការប្រើប្រាស់ប្រព័ន្ធ FMIS ក្លាយជាប្រព័ន្ធតែមួយគត់ដែលគាំទ្រដោយផ្ទាល់ទៅលើការអនុវត្តកម្មវិធីគន្លឹះនានានៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ហើយនិងរួមចំណែកធ្វើឱ្យប្រទេសកម្ពុជាប្រែក្លាយទៅជារដ្ឋាភិបាលឌីជីថល ក្នុងវិស័យហិរញ្ញវត្ថុសាធារណៈក្នុងបរិការណ៍បដិវត្តន៍ឧស្សាហកម្មទី4។
សូមបញ្ជាក់ថា ប្រព័ន្ធ FMIS បានធ្វើសន្ធានកម្មផ្លាស់ប្តូរទិន្នន័យជាមួយប្រព័ន្ធចំណូលពន្ធគយ និងរដ្ឋាករកាលពីឆ្នាំ2016។ រហូតមកទល់បច្ចុប្បន្ន ប្រព័ន្ធនេះក៏បានធ្វើសន្ធានកម្មផ្លាស់ប្តូរទិន្នន័យដោយស្វ័យប្រវត្តិជាមួយធនាគារជាតិនៃកម្ពុជា រួមទាំងធនាគារពាណិជ្ជចំនួន5 ដែលជាដៃគូរបស់អង្គភាពនៃរាជរដ្ឋាភិបាល ក្នុងការចូលរួមចំណែកផ្តល់សេវាសាធារណៈ ផ្តល់ភាពងាយស្រួលជូនប្រជាពលរដ្ឋក្នុងការបង់ពន្ធ ជូនរាជរដ្ឋាភិបាលបានទាន់ពេលវេលា និងសម្បូរបែប។
ការធ្វើសន្ធានកម្មជាមួយធនាគារពាណិជ្ជដៃគូទាំងនេះ គឺដើម្បីទទួលបាននូវទិន្នន័យរបាយការណ៍ ធនាគារដោយស្វ័យប្រវត្តិ ដែលបានជួយសម្រួលក្នុងការកាត់បន្ថយ នូវការងារកត់ត្រារបស់មន្ត្រីរាជការ និងបង្កើនបាននូវស្វ័យប្រវត្តិកម្ម ភាពសុក្រឹត និងភាពទាន់ពេលវេលានៃទិន្នន័យហិរញ្ញវត្ថុសាធារណៈផងដែរ នៅក្នុងប្រព័ន្ធ FMIS។
ជាមួយគ្នានេះ នៅពេលខាងមុខ ប្រព័ន្ធនឹងធ្វើសន្ធានកម្មផ្លាស់ប្តូរទិន្នន័យបន្ថែមទៀត ជាមួយប្រព័ន្ធពន្ធដាររបស់អគ្គនាយកដ្ឋានពន្ធដារ និងប្រព័ន្ធគ្រប់គ្រងបៀវត្សរ៍មន្ត្រីរាជការស៊ីវិលរបស់ក្រសួងមុខងារសាធារណៈ។
ឯកឧត្តមបណ្ឌិតសភាចារ្យបានផ្តល់ការលើកទឹកចិត្ត និងគូសបញ្ជាក់អំពីចំណុចសំខាន់ៗមួយចំនួនដល់អ្នកចូលរួមមកពីក្រសួង-ស្ថាប័ន ក្នុងការបន្តកិច្ចសហការអនុវត្តគម្រោង FMIS ក្នុង នោះរួមមាន៖
1- អគ្គនាយកដ្ឋានគន្លឹះៗនៃក្រសួងសេដ្ឋកិច្ច និងហិរញ្ញវត្ថុ ត្រូវបន្តចូលរួមប្រកបដោយបុរេ សកម្មក្នុងការជួយតម្រង់ទិស និងគាំទ្រដល់អ្នកប្រើប្រាស់ថ្មីៗក្នុងប្រព័ន្ធFMIS ជួយផ្សព្វផ្សាយ និងផ្តល់ការណែនាំឱ្យបានទូលំទូលាយ អំពីការផ្សារភ្ជាប់រវាងការអនុវត្តថវិកា និងការប្រើប្រាស់ប្រព័ន្ធព្រមទាំងនីតិវីធីអនុវត្តថវិកា និងការពង្រឹងគណនេយ្យភាពនៃប្រតិបត្តិការហិរញ្ញវត្ថុនៅក្នុងប្រព័ន្ធ FMIS។
2- ក្រសួង-ស្ថាប័នដែលប្រើប្រាស់ប្រព័ន្ធ FMIS ត្រូវបន្តបង្កើនសមត្ថភាពជំនាញ ទាំងជំនាញហិរញ្ញវត្ថុសាធារណៈ និងជំនាញក្នុងការប្រើប្រាស់ប្រព័ន្ធ FMIS ប្រកបដោយស្មារតីទទួលខុសត្រូវខ្ពស់ និងមានភាពជាម្ចាស់ក្នុងការគ្រប់គ្រងថវិកា និងហិរញ្ញវត្ថុរបស់ខ្លួន តាមរយៈការប្រើប្រាស់ប្រព័ន្ធ FMIS។
3- ក្រសួង-ស្ថាប័ន និងអង្គភាពទាំងអស់ដែលប្រើប្រាស់ប្រព័ន្ធ FMIS ត្រូវធ្វើការត្រួតពិនិត្យ មុខងារ និងតួនាទីរបស់មន្ត្រីម្នាក់ៗ រចនាសម្ព័ន្ធការងារផ្ទៃក្នុង និងកំណត់នូវកម្រិតហានិភ័យនៃប្រភេទប្រតិបត្តិការអនុវត្តន៍ថវិកា និងហិរញ្ញវត្ថុជាបណ្តើរៗដើម្បីត្រៀមខ្លួនសហការជាមួយក្រុមការងារគ្រប់គ្រងគម្រោង FMIS ក្នុងការរៀបចំនីតិវិធីតម្រង់ទិសថ្មី ស្របតាមផែនការតម្រង់ទិសនីតិវិធីអនុវត្តន៍ការងារ (Business Processes Streamlining)។
4- អ្នកប្រើប្រាស់ប្រព័ន្ធFMIS ទាំងអស់ ត្រូវចូលរួមពង្រឹងគណនេយ្យភាពនៃការប្រើប្រាស់ ប្រព័ន្ធ FMIS ដោយធ្វើការពិនិត្យឱ្យបានហ្មត់ចត់លើទិន្នន័យដែលបានកត់ត្រាចូលក្នុងប្រព័ន្ធ FMIS និងប្រើប្រាស់ព័ត៌មានពីប្រព័ន្ធ FMIS ជាគោល សម្រាប់ការគ្រប់គ្រង និងអនុវត្តន៍ថវិកា តាមរយៈការវិភាគ តាមដាន ត្រួតពិនិត្យ និងការរៀបចំរបាយការណ៍នានាស្តីអំពីឥណទាន ថវិកា និងការអនុវត្តថវិកា។
សូមបញ្ជាក់ថា គោលបំណងសំខាន់នៃការប្រកាសដាក់ឱ្យប្រើប្រាស់ប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ(FMIS) គឺដើម្បីដាក់ជូនក្រសួង-ស្ថាប័នជាផ្លូវការ និងការចែករំលែកបទពិសោធក្នុងការធ្វើប្រតិបត្តិការហិរញ្ញវត្ថុក្នុងប្រព័ន្ធ FMIS៕
