ក្នុងប្រទេសអភិវឌ្ឍន៍មួយចំនួនដូចជា ន័រវែស, ដាណឺម៉ាក, ហ្វាំងឡង់, អង់គ្លេស និងបារាំង ដែលធ្លាប់តែកើនឡើងផ្នែកពិន្ទុកម្រិតភាពឆ្លាតវៃ IQ ប្រែជាមានការធ្លាក់ចុះប្រហែល 2.4ពិន្ទុក្នុង 1ទសវត្សរ៍ចុងក្រោយនេះ។ តាមការសិក្សាមួយបានចង្អុលបង្ហាញថា ការប្រើប្រាស់ស្មាតហ្វូនច្រើនម៉ោងពេក មានផលប៉ះពាល់មួយចំនួនទៅលើកម្រិតនៃការយល់ដឹង។
ក្នុងការសិក្សាមួយរបស់់ក្រុមអ្នកស្ម័គ្រចិត្ត បានចោទសួរជាមួយនឹងសំណួរកាន់តែជ្រៅៗទៅ ប៉ុន្តែពួកគេហាក់ឆ្លើយមិនបានល្អ និងមានការវិភាគចុះខ្សោយ។
ការតេស្តនោះ គឺធ្វើទៅលើអ្នកដែលប្រើស្មាតហ្វូនច្រើនម៉ោង។ តាមរបាយការណ៍ចេញផ្សាយកាលខែមិថុនា លើវេបសាយ PNAS ក៏បានចុះផ្សាយដូចគ្នាផងដែរថា ចុចស្មាតហ្វូនច្រើនម៉ោង ធ្វើឱ្យកម្រិត IQ មានការធ្លាក់ចុះពិតមែន មិនត្រឹមតែប៉ុណ្ណោះ វាក៏បន្ថយកម្រិតសមត្ថភាពគ្រប់គ្រងការផ្ដោតអារម្មណ៍ផងដែរ ថ្វីបើចុចស្មាតហ្វូនលេងហ្គេម ហាក់ល្អចំពោះសមត្ថភាពការគិតបានរហ័សក៏ដោយ។ យ៉ាងណាក៏វានៅជះឥទ្ធិពលដល់ការគិត 1ភាគធំដែរ។
ក្រុមអ្នកវិទ្យាសាស្ត្រដដែល បានលើកឡើងថា ស្មាតហ្វូនជួយសម្រេចការងារមួយចំនួនតាមតម្រូវការប្រចាំថ្ងៃ មើលទៅទំនើបជាងមុន ប៉ុន្តែមិនប្រាកដថា ជំរុញភាពឆ្លាតវៃនោះទេ៕
