ឡា រ៉ែន ជឿថា មិត្តអ្នកអានគ្រប់រូបប្រហែលជាធ្លាប់ហើយ ជាមួយនឹងអាការឆ្អឹងត្រីដោតជាប់នៅក្នុងបំពង់ក ដោយសារតែញ៉ាំអាហារប្រភេទត្រី ជាពិសេសត្រីជាច្រើនប្រភេទដែលមានឆ្អឹងតូចៗមុតស្រួចលាក់ខ្លួននៅក្នុងសាច់ ដោយវានឹងហុចផលឱ្យកើតអាការឈឺអួល ឬឈឺផ្សារនៅក្នុងបំពង់កកន្លែងដែលជាសាច់ខ្ចី។ ឆ្អឹងត្រីទាំងនោះ ពេលខ្លះក៏របូតចេញវិញដោយខ្លួនឯង តែពេលខ្លះក៏វាមិនព្រមរបូតចេញដែរ និងថែមទាំងបង្កឱ្យកើតការរំខានចិត្តរហូតដល់អស់អារម្មណ៍លែងចង់ញ៉ាំអាហារតទៅទៀតក៏មាន។
ប្រាកដណាស់ថា ការកែបញ្ហារឿងនេះ ប្រហែលជាមិនអាចយកដៃលូកចាប់ទាញចេញមកធម្មតាៗបាននោះទេ ព្រោះនៅក្នុងបំពង់កគឺជាផ្នែកជ្រៅមួយរបស់រាងកាយ និងមានអវយវៈសំខាន់ផ្សេងទៀតជាច្រើន ដូច្នេះហើយទើបមានអ្នករិះគិតរកវិធីកែបញ្ហានេះជាច្រើនវិធីដូចខាងក្រោម។
1 . ញ៉ាំទឹកត្រជាក់ ជួនកាលការញ៉ាំទឹកត្រជាក់ក៏អាចជួយឱ្យឆ្អឹងត្រីទាំងនោះរបូតចេញពីបំពង់កទៅបានដែរក្នុងករណីដែលវាមុតជាប់មិនជ្រៅ ឬមិនជាប់នៅក្នុងកន្លៀតពេក។ គន្លឹះក្នុងការលេបទឹកគឺ ក្នុងអំឡុងពេលញ៉ាំ ចូរខ្ពុរទឹកនោះនៅក្នុងបំពង់កនៅកន្លែងដែលឈឺនោះទៅមក រួចហើយសឹមលេបចូលទៅ។
2 . ទឹកផ្លែក្រូចឆ្មារ ដោយសារតែទឹកក្រុចឆ្មារមានឬទ្ធិជាអាស៊ីតតិចៗនោះ ដូច្នេះទើបមានគុណសម្បត្តិក្នុងការជួយរំលាយឆ្អឹងតូចៗ ប្រភេទឆ្អឹងត្រីបាន តែត្រូវញ៉ាំបែបសន្សឹមៗ និងលេបចូលទៅយឺតៗឱ្យទឹកក្រូចឆ្មារឆ្លងកាត់កន្លែងដែលឆ្អឹងដោតជាប់នោះ។
អ្នកខ្លះអាចនឹងរអ៊ូថា វិធីនេះពិបាកធ្វើ ព្រោះទឹកក្រូចឆ្មារមានរសជាតិជូរ ដូច្នេះ ឡា រ៉ែន សូមណែនាំឱ្យលាបអំបឹលហ្មត់តិចៗនៅលើមាត់កែវ នឹងជួយឱ្យការញ៉ាំងាយស្រួលឡើងបន្តិច។
3 . លេបបាយមួយដុំធំ ឡា រ៉ែន ណែនាំឱ្យប្រើបាយដំណើបសុទ្ធពូតជាដុំមូលៗ ហើយដាក់ចូលក្នុងមាត់ លេបចូលទៅដោយហាមទំពាឱ្យល្អិត យកល្មមតែអាចលេបចូលទៅបាន។ ពេលបាយដំណើបឆ្លងកាត់បំពង់ក វានឹងជួយធ្វើឱ្យឆ្អឹងត្រីដែលចាក់ជាប់ក្នុងបំពង់ករបូតមកជាប់នឹងបាយដំណើប រួចធ្លាក់ចូលទៅក្នុងពោះបាន។
4 . យកដៃលូកខ្វេះ នៅពេលវិធីទាំងអស់ដែលណែនាំមកខាងលើនោះ មិនបានទទួលលទ្ធផល ឡា រ៉ែន សូមណែនាំឱ្យប្រើម្រាមដៃរុំជាមួយក្រណាត់ស្អាត លូកចូលទៅកៀរក្នុងបំពង់កកន្លែងដែលមានអារម្មណ៍ថា ស្លាក់ឆ្អឹងត្រីនោះ តែត្រូវធ្វើដោយក្តីប្រយ័ត្នប្រយែង ព្រោះក្នុងបំពង់ករបស់មនុស្សយើងពេញទៅដោយផ្នែកផ្សេងៗដែលសំខាន់ជាច្រើន បើមិនប្រយ័ត្ន ឬម្រាមដៃមិនស្អាតអាចធ្វើឱ្យកើតមានដំបៅឡើង និងតាមមកនូវការរលាកក្លាយក្នុងបំពង់ក ឬប្រអប់មាត់នោះ ម្តងនេះច្បាស់ជាលំបាកជាងមុនមិនខាន។
5 . បើសាកល្បងធ្វើគ្រប់វិធីហើយ នៅតែមិនបានផលល្អនោះ ប្រហែលជាត្រូវទៅជួបលោកគ្រូពេទ្យហើយ ព្រោះពេលខ្លះឆ្អឹងត្រីទាំងនោះអាចនឹងទៅមុតនៅត្រង់កន្លែងសំខាន់ណាមួយ ដូចជា បំពង់អាហារ គល់អណ្តាត ក្រពេញថល់ស៊ិន ដែលបើសិនជាដូច្នោះមែន ការទៅជួបលោកគ្រូពេទ្យគឺជាជម្រើសមួយដែលល្អបំផុត ព្រោះគ្រូពេទ្យនឹងមានការព្យាបាលដែលត្រឹមត្រូវតាមវិធី និងមានសុវត្ថិភាពជាង អាចនិយាយបានថា ទៅជួបលោកគ្រូពេទ្យហ្នឹងហើយ កក់ក្តៅបំផុត។
ដែលរៀបរាប់មកទាំងអស់នេះ ជាវិធីកែបញ្ហាដែលពេញនិយម និងបានទទួលការអះអាងហើយថា (ភាគច្រើន) បានទទួលលទ្ធផលល្អមកច្រើននាក់ហើយក៏ពិតមែន តែប្រហែលជានឹងល្អជាង បើសិនជាយើងចេះប្រយ័ត្នប្រយែងក្នុងការទទួលទានអាហារប្រភេទត្រី ដោយពិនិត្យឱ្យបានល្អិតល្អន់ថា បានយកឆ្អឹងចេញអស់ហើយឬនៅមុននឹងទទួលទានចូលទៅ តែប៉ុណ្ណឹងអាការស្លាក់ឆ្អឹងត្រីក៏ប្រហែលជាមិនកើតឡើងចំពោះយើងទេ៕
