រាល់ថ្ងៃនេះយើងកំពុងរស់នៅក្នុងសង្គមដែលប្រើតិចណូឡូជី រហូតក្លាយជាបច្ច័យទី6 ក្នុងការរស់នៅរហូតដល់មិនអាចខ្វះបានទៅហើយ។ នៅពេលការមកដល់របស់តិចណូឡូជីធ្វើឱ្យជីវិតយើងកាន់តែសប្បាយឡើង ប្រព័ន្ធមួយដែលនៅជិតខ្លួនយើងបំផុតគឺ Smart Home ឥឡូវយើងនាំគ្នាមកមើលថា តើ Smart Home ធ្វើឱ្យជីវិតយើងល្អប្រសើរឡើងយ៉ាងណា?
Smart Home គឺអ្វី?
Smart Home ឬ Home Automation ឈ្មោះនេះ យើងប្រហែលជាធ្លាប់បានឮមួយរយៈមកហើយ វាគឺជាឈ្មោះហៅរបស់ឧបករណ៍ដែលមកជួយឱ្យអ្នកស្នាក់នៅក្នុងផ្ទះ មានភាពងាយស្រួលខ្លាំងឡើង បង្កើនប្រសិទ្ធភាពក្នុងការប្រើប្រាស់ថាមពល អាចគ្រប់គ្រងបានតាមរយៈ Smart Phone ឬឧបករណ៍បញ្ជាដោយសំឡេង។ ជាផ្នែកមួយរបស់ប្រព័ន្ធ IOT(Internet of Things) ដោយឧបករណ៍ទាំងអស់នោះអាចដោះដូរចែករំលែកព័ត៌មានគ្នាទៅវិញទៅមក មានសមត្ថភាពយ៉ាងសម្បូរបែប ទាំងប្រព័ន្ធភ្លើងដែលមិនមែនត្រឹមតែភ្លឺដោយខ្លួនឯងពេលមេឃងងឹត ទ្វារផ្ទះ ឬទ្វាររបងដែលបើកឱ្យតែមនុស្សនៅក្នុងផ្ទះចូលប៉ុណ្ណោះ ទូទឹកកកដែលនឹងប្រាប់ឱ្យយើងដឹងថាអ្វីជិតអស់ ប្រព័ន្ធការពារចោរកម្មដែលជួយមើលថែរក្សាទ្រព្យសម្បត្តិនៅក្នុងផ្ទះ ឬគ្រឿងបញ្ចេញសំឡេងដែលទទួលបញ្ជាដោយសំឡេង ដើម្បីឱ្យឧបករណ៍ក្នុងផ្ទះគ្រប់យ៉ាងធ្វើការ ទាំងបើកទូរទស្សន៍ បើកម៉ាស៊ីនត្រជាក់ បើកភ្លើង និងកំណត់ពេលវេលាបើក ឬបិទជាដើម។
ប្រយោជន៍របស់ Smart Home
ប្រយោជន៍ដែលមើលឃើញច្បាស់បំផុតរបស់ Smart Home ប្រហែលជាប្រព័ន្ធការពារចោរកម្ម ដើម្បីបន្ថែមទំនុកចិត្តក្នុងការថែរក្សាផ្ទះមិនឱ្យកើតការខូចខាតបាត់បង់ពីអ្នកដែលមានបំណងមិនល្អ និងថែមទាំងអាចគ្រប់គ្រងឧបករណ៍ខាងក្នុងផ្ទះបានយ៉ាងពេញលេញទៀតផង ដូចជា ម៉ាស៊ីនអាំងនំប៉័ងដែលភ្លេចដកឌុយភ្លើងចេញ ម៉ូទ័របូមទឹកដែលភ្លេចបិទពេលប្រើរួច ឬអំពូលភ្លើងខាងក្នុងផ្ទះដែលអាចបញ្ជាឱ្យបើកបិទបានពីទីណាក៏ដោយក្នុងពិភពលោកនេះ ជាដើម។
ប្រព័ន្ធ Smart Home ក្រៅពីនឹងងាយស្រួលក្នុងការគ្រប់គ្រងឧបករណ៍អគ្គិសនីក្នុងផ្ទះហើយ វានៅជួយកែសម្រួលប្រសិទ្ធភាពក្នុងការប្រើប្រាស់ធនធានថាមពលផ្សេងៗទៀត ដូចជា ភ្លើងអគ្គិសនី ទឹក និងសីតុណ្ហភាពក្ដៅ-ត្រជាក់ ទៀតផង ដូចជា អាចសម្រួលសីតុណ្ហភាពក្នុងបន្ទប់ឱ្យសមល្មមរួចជាស្រេចពេលអ្នកធ្វើដំណើរមកដល់ផ្ទះ ឬជួយមើលថែទាំវាលស្មៅមុខផ្ទះ ឱ្យស្រស់ស្អាតជានិច្ច ដោយមិនបាច់ខ្វល់ខ្វាយថា ទឹកដែលស្រោចស្រពដើមផ្កានឹងច្រើន ឬតិចពេកនោះឡើយ ប្រព័ន្ធនឹងស្រោចទឹកក្នុងបរិមាណដែលស័ក្តិសមបំផុត មិនចាំបាច់គិតថា ពេលមានភ្លៀងធ្លាក់ហើយ តើត្រូវស្រោចទឹកថែមឬអត់ ជាដើម ដែលទាំងអស់នេះ លទ្ធផលចេញមក គឺសន្សំសំចៃប្រាក់ក្នុងហោប៉ៅរបស់អ្នកហ្នឹងឯង។
ការធ្វើការងាររបស់ប្រព័ន្ធ Smart Home ត្រូវការអ្វីខ្លះ?
ការធ្វើការងាររបស់ប្រព័ន្ធ Smart Home ឱ្យទទួលបានប្រយោជន៍ខ្ពស់បំផុត គឺឧបករណ៍ទាំងអស់នឹងត្រូវតភ្ជាប់គ្នា និងធ្វើការដោយប្រើទីបញ្ជាការគ្រប់គ្រងតែ1 ជាមួយគ្នា ដោយប្រព័ន្ធទាំងនោះនៅក្នុងពិភពលោកនេះ មានច្រើនក្រុមហ៊ុនដែលមានផលិតផល និងសេវាកម្មដូចគ្នា។ អ្នកណាដែលចង់នាំយកប្រព័ន្ធ Smart Home មកប្រើ អាចជ្រើសរើសប្រើឧបករណ៍ច្រើនម៉ាកច្រើនយីហោបាន តែសូមឱ្យប្រុងប្រយ័ត្នទៅលើរឿងមួយ គឺឧបករណ៍ Smart Home ត្រូវតែអាចធ្វើការបានក្នុងកម្រិតស្តង់ដារតែមួយ ការពារពេលទិញមកហើយ តភ្ជាប់គ្នាមិនបាន ពិបាកខ្លាំងនៅពេលប្រើប្រាស់-ល- រឿងនេះគួរប្រយ័ត្ន…។
រឿង 1ទៀតដែលសំខាន់ គឺការតភ្ជាប់ប្រព័ន្ធការធ្វើការ…។ នាពេលបច្ចុប្បន្ននេះ ប្រហែលជាគេចមិនផុតពីរឿងរបស់អុីនធើណិតឡើយ ដែលនេះគឺជារឿងសំខាន់យ៉ាងខ្លាំងក្នុងការប្រើការប្រព័ន្ធ Smart Home ព្រោះថា បើសិនគ្មានអុីនធើណិត យើងក៏ប្រហែលជាបញ្ជាពី Smartphone ឬ Web Service ដែលមានសម្រាប់បម្រើសេវាកម្មនោះមិនបានយ៉ាងពិតប្រាកដ។
ជំហានបន្ទាប់ទៀតរបស់ Smart Home គឺ AIoTនៅពេលឧបករណ៍ AloT ដែលធ្វើការរួមគ្នាឱ្យកើតប្រព័ន្ធ Smart Home តែការបញ្ជាការងារ ភាគច្រើនចេញមកពីតម្រូវការរបស់អ្នកស្នាក់អាស្រ័យពិតប្រាកដនោះ ជំហានបន្តទៅទៀត គឺការនាំយកប្រព័ន្ធ AI (Artificial Intelligence ឬបញ្ញាសិប្បនិម្មិត) មកវិភាគព័ត៌មានលម្អិតដែលមានសម្ពន្ធគ្នាដើម្បីបង្កើនប្រសិទ្ធភាពក្នុងការធ្វើការងារឱ្យបានខ្ពស់បំផុត(Optimize Solution) ដូច្នេះកិច្ចការនេះអាចប្រាប់បានតែម្ដងថា ទាន់សម័យបំផុត ដោយការនាំយក AI មករួមជាមួយ IoT ធ្វើឱ្យកើតចេញជាពាក្យថ្មីមួយថា AIoT(Artificial Intelligence of Things) ជាពាក្យថ្មីដែលទើបកើតឡើងកាលពីចុងឆ្នាំ2018 កន្លងទៅហ្នឹងឯង។
ក្នុងជ្រុងរបស់ Smart Home តួប្រព័ន្ធ AIoT នឹងចូលមករៀនយល់ដឹងពីទង្វើរបស់អ្នកស្នាក់នៅបែបបុគ្គលម្នាក់ៗ ដូចជាម្ចាស់ផ្ទះចូលចិត្តស្ដាប់បទភ្លេងបែបណា? ហើយនឹងបើកនៅពេលណា? បិទម៉ូទ័របូមទឹកពេលម៉ោងប៉ុន្មាន? កូនប្រុសម្ចាស់ផ្ទះចូលចិត្តបើកវាំងនននៅពេលយប់អត់? ចូលចិត្តបើកម៉ាស៊ីនត្រជាក់ក្នុងសីតុណ្ហភាពប៉ុន្មានអង្សា? ដោយប្រព័ន្ធ AIoT នឹងសេរ៉េទុកជាស្រេច និងសមល្មមសម្រាប់មនុស្សនៅក្នុងផ្ទះទាំងអស់បានភ្លាមៗ ដោយយើងមិនចាំបាច់បញ្ជាអ្វីទាំងអស់ ប្រៀបដូចមានមេផ្ទះម្នាក់នៅចាំបម្រើសេវាទាំងអស់នេះ និងថែមទាំងធ្វើការរួមជាមួយព័ត៌មានផ្សេងៗទៀត ដូចជា ប្រកាសប្រាប់ពីការជួសជុលបំពង់បង្ហូរទឹក និងត្រៀមទឹកបម្រុងឱ្យគ្រប់គ្រាន់ប្រើសម្រាប់មនុស្សក្នុងផ្ទះទាំងអស់គ្នា ប្រកាសអំពីភ្លៀងធ្លាក់ ប្រព័ន្ធស្រោចទឹកសួនច្បារនឹងឈប់ធ្វើការដោយខ្លួនឯង ហៅជាងមកជួសជុលបំពង់បង្ហូរទឹកដែលបែកនៅក្នុងផ្ទះ ហៅជាងមកលាងម៉ាស៊ីនត្រជាក់ពេលដល់ថ្ងៃកំណត់ជាដើម ព្រោះព័ត៌មានដែល AI នាំមកវិភាគតាមរយៈ Big Data ធ្វើឱ្យប្រព័ន្ធអាចប្រមាណបានអំពីសកម្មភាពរបស់ផ្ទះនាពេលអនាគតបានទៀតផង។
ការជ្រើសរើសប្រើតិចណូឡូជីឱ្យស័ក្តិសមជាមួយការប្រើការ គឺជារឿងសំខាន់ ដូច្នេះអ្នកប្រើប្រាស់គួរមើលអំពីតម្រូវការរបស់ខ្លួនឯងជាចម្បងថា មានតម្រូវការឱ្យប្រព័ន្ធអាចធ្វើការអ្វីបានខ្លះ? ដោយអាចនឹងចាប់ផ្ដើមសិក្សាពីវត្ថុរបស់របរដែលមានលក់នៅតាមហាងផ្សេងៗថា មានឧបករណ៍អ្វីខ្លះ? រួចសឹមមកសរសេរផែនការងារឱ្យប្រព័ន្ធធ្វើការ ដើម្បីឱ្យប្រព័ន្ធដែលនឹងនាំមកប្រើ នឹងបានត្រឹមត្រូវតាមសេចក្ដីត្រូវការរបស់អ្នកប្រើប្រាស់យ៉ាងពិតប្រាកដ៕
