ការរីកចម្រើនវិស័យអចលនទ្រព្យបាននិងកំពុងជំរុញឱ្យមានកំណើនតម្រូវការសម្ភារសំណង់ ស្របពេលវិស័យសំណង់នៅបន្តសកម្មភាពគគ្រឹកគគ្រេង ដែលឆ្លុះបញ្ចាំងឱ្យឃើញថា មិនទាន់មានភាពនឿយណាយ នៃការវិនិយោគលើវិស័យនេះនៅឡើយ។
របាយការណ៍អំពីតម្លៃសម្ភារសំណង់ដែលនាំចូលមកកម្ពុជា ដើម្បីផ្គត់ផ្គង់ដល់វិស័យសំណង់បានឱ្យដឹងថា បានកើនឡើង 50%ក្នុងឆ្នាំ 2019 បើប្រៀបធៀបនឹងឆ្នាំ2018។ នេះបើតាមធនាគារជាតិនៃកម្ពុជា។
តួលេខពីធនាគារជាតិនៃកម្ពុជាបានបង្ហាញថាតម្លៃសរុបនៃសម្ភារសំណង់ រួមមានសម្ភារសំណង់ស៊ីម៉ងត៍ និងផលិតផលដែកថែប ត្រូវបានប៉ាន់ប្រមាណថា មានចំនួន 1.5ពាន់លានដុល្លារ ក្នុងឆ្នាំ2019 រីឯតម្លៃនៃការនាំចូលសម្ភារសំណង់កាលពីឆ្នាំ2018 មានប្រមាណ 1ពាន់លានដុល្លារ។
ធនាគារជាតិនៃកម្ពុជា ឬ NBC បាននិយាយថា វិស័យសំណង់ គឺជាផ្នែកមួយនៃកត្តាជំរុញសេដ្ឋកិច្ចសម្រាប់កំណើនសេដ្ឋកិច្ចឆ្នាំ2019 ដែលត្រូវបានគេប៉ាន់ប្រមាណថា នឹងឈានដល់ 7.1%។
ធនាគារជាតិនៃកម្ពុជា បានសរសេរនៅក្នុងរបាយការណ៍ថា៖“វិស័យសំណង់ និងអចលនទ្រព្យបន្តកើនឡើង ដែលឆ្លុះបញ្ចាំងដោយនិន្នាការកើនឡើងនៃការនាំចូលសម្ភារសំណង់ និងគម្រោងសាងសង់ដែលទទួលបានការអនុម័ត”។
បើតាមរបាយការណ៍ដដែលនេះ នៅក្នុងឆ្នាំ2019 ការនាំចូលសម្ភារសំណង់ មានតម្លៃប៉ាន់ស្មានប្រមាណ 1,500លានដុល្លារ អាមេរិក ដែលកើនឡើងពីជិត 600លានដុល្លារក្នុងឆ្នាំ2018។ ក្នុងនោះ ការនាំចូលគ្រឿងបរិក្ខារសំណង់ផ្សេងៗ មានតម្លៃជាង 900លានដុល្លារ ការនាំចូលស៊ីម៉ងត៍មានតម្លៃជាង 100លានដុល្លារ ពោលគឺកើនឡើងពីប្រមាណ 90លានដុល្លារកាលពីឆ្នាំ2018 និងការនាំចូលដែកមានតម្លៃ 500លានដុល្លារ កើនពីចំនួន 300លានដុល្លារក្នុងឆ្នាំ2018។
របាយការណ៍របស់ NBC ក៏បានបង្ហាញដែរថាវិស័យសំណង់ និងអចលនទ្រព្យនៅតែបន្តកើនឡើង ដែលត្រូវបានឆ្លុះបញ្ចាំងពីនិន្នាការនៃការកើនឡើងការនាំចូលសម្ភារសំណង់ និងគម្រោងសាងសង់ដែលបានអនុម័ត។
សម្រាប់ឆ្នាំ2020 នេះ ការនាំចូលគ្រឿសម្ភារសម្រាប់ផ្គត់ផ្គង់ដល់វិស័យសំណង់ ត្រូវបានព្យាករថា នឹងមានតម្លៃប្រមាណជាង 2,300លានដុល្លារ។ ការនាំចូលសម្ភារសំណង់ រួមមានបរិក្ខាសំណង់ផ្សេងៗ ស៊ីម៉ងត៍ និងដែក ត្រូវបានព្យាករថា នឹងនៅតែបន្តកើនឡើងនៅឆ្នាំ2020 ដែលឆ្លុះបញ្ជាំងពីកំណើននៃវិស័យសំណង់នៅកម្ពុជា ខណៈគម្រោងសាងសង់ក្នុងឆ្នាំ2019 មានសម្ទុះកើនឡើងខ្ពស់។
យោងតាមរបាយការណ៍ស្តីពី “វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ2019 និងទស្សនវិស័យឆ្នាំ2020” របស់ធនាគារជាតិនៃកម្ពុជា បានបញ្ជាក់ថា វិស័យសំណង់នឹងនៅតែជាសសរស្តម្ភមួយនៃការជំរុញកំណើនសេដ្ឋកិច្ចកម្ពុជាសម្រាប់ឆ្នាំ2020។
ធនាគារជាតិនៃកម្ពុជា បានបង្ហាញនៅក្នុងរបាយការណ៍ទស្សនវិស័យឆ្នាំ2020 នេះថា ការនាំចូលបរិក្ខារសំណង់ផ្សេងៗ តំណាងជិត 50% ឬមានទំហំទឹកប្រាក់នាំចូលប្រមាណជិត 1,400លានដុល្លារ។ ចំណែកការនាំចូលស៊ីម៉ងត៍ តំណាងជិត 10% ឬស្មើប្រមាណជិត 200លានដុល្លារ។ ការនាំចូលដែកតំណាងជិត 40% ឬស្មើនឹងតម្លៃសម្រាប់នាំចូលប្រមាណជិត 800លានដុល្លារ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថាគម្រោងសាងសង់មានចំនួនសរុប 4,446គម្រោងនៅក្នុងឆ្នាំ2019 ដែលជាការកើនឡើង 55% បើប្រៀបធៀបទៅនឹងឆ្នាំមុន ខណៈពេលដែលទុនវិនិយោគមានចំនួន 9,3 ពាន់លានដុល្លារ ពោលគឺកើនឡើង 78%។
ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់មានប្រសាសន៍ថា “វិស័យសំណង់រីកចម្រើន គឺដោយសារតែកំណើនសេដ្ឋកិច្ចល្អ។ ការវិនិយោគភាគច្រើន ចូលមកខេត្តព្រះសីហនុ គឺមកពីប្រទេសចិន។ ការកើនឡើងនៅក្នុងវិស័យសំណង់ គឺផ្តើមចេញពីកំណើនសេដ្ឋកិច្ច និងស្ថិរភាពនយោបាយ”។
គួរជម្រាបដែរថា បច្ចុប្បន្ននេះប្រទេសកម្ពុជាមានរោងចក្រផលិតស៊ីម៉ងត៍ចំនួន5 ដែលអាចផលិតស៊ីម៉ងត៍ បាន8លានតោនក្នុង 1ឆ្នាំ៕
