ក្រោយការធ្វើកំណែទម្រង់ប្រព័ន្ធអប់រំ រដ្ឋមន្ត្រីក្រសួងអប់រំ យុវជន និងកីឡា បានជំរុញឱ្យមានការផ្លាស់ប្តូរយ៉ាងច្រើនលើវិធីសាស្រ្តនានា ដើម្បីធ្វើការអភិវឌ្ឍសាលារៀនរបស់រដ្ឋឱ្យមានគុណភាពខ្ពស់ និងទាញបាននូវទំនុកចិត្តកាន់តែច្រើនពីអាណាព្យាបាលសិស្សដែលកំពុងសិក្សានៅទូទាំងប្រទេស។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា បន្ទាប់ពីមានកំណែទម្រង់ប្រព័ន្ធអប់រំ យើងបានដាក់ចេញនូវកត្តាសំខាន់ៗ 4យ៉ាង ដែលអាចធ្វើឱ្យសាលារដ្ឋមានសមត្ថភាពល្អមិនចាញ់សាលាឯកជន ឬកន្លែងខ្លះអាចល្អជាងសាលាឯកជនថែមទៀតផង។ កត្តាសំខាន់ៗទាំងអស់នោះ មានដូចជា ទី1 គឺការគ្រប់គ្រង និងការដឹកនាំរបស់នាយកសាលា។
ឯកឧត្តមបានវាយតម្លៃខ្ពស់ចំពោះនាយកសាលាសំខាន់ៗជាច្រើននៅកម្ពុជាដែលកន្លងមកបានខិតខំប្រឹងប្រែងក្នុងការធ្វើការងារដឹកនាំផង និងគ្រប់គ្រងផងរហូតធ្វើឱ្យសាលារបស់គាត់ក្លាយជាកន្លែងដែលមានបរិស្ថានល្អ មានសុវត្ថិភាពខ្ពស់ចំពោះសិស្ស និងមានការអប់រំល្អប្រសើរ។ ឯកឧត្តមមានប្រសាសន៍ថា ការទទួលខុសត្រូវរបស់នាយកសាលា គឺមានច្រើនណាស់ក្នុងការគាំពារសិស្សានុសិស្ស ដោយក្នុងនោះមានទាំងការគាំពារផ្នែកសុវត្ថិភាពចំណីអាហារ សុវត្ថិភាពផ្នែកផ្លូវកាយពីគ្រោះថ្នាក់នានា ដូចជាបញ្ហាអគារ ឬបញ្ហាផ្សេងទៀតនៅក្នុងបរិវេណសាលា។
បន្ថែមពីលើនេះ នាយកក៏ត្រូវការពារសិស្សកុំឱ្យមានការគំរាមកំហែង បញ្ហាបងតូច-បងធំ និងធានានូវសុវត្ថិភាពផ្លូវចិត្តសម្រាប់សិស្សជាដើម។ ឯកឧត្តម ហង់ជួន ណារ៉ុន បានមានប្រសាសន៍ថា៖ «ក្នុងចំណោមបញ្ហាសំខាន់ៗនានាដែលក្រសួងកំពុងយកចិត្តទុកដាក់ បញ្ហាចំណីអាហារក៏ជាបញ្ហាចម្បងមួយដែលប៉ះពាល់យ៉ាងខ្លាំងដល់ការអប់រំរបស់សិស្ស ព្រោះកាលណារបបអាហារមិនល្អ ការរីកលូតលាស់របស់សិស្សក៏មិនល្អ ដែលធ្វើឱ្យការសិក្សាក៏មានបញ្ហាទៅតាមនោះដែរ»។
បើតាមឯកឧត្ដមរដ្ឋមន្ត្រី ក៏បានបញ្ជាក់ផងដែរថា កន្លងមកក្រសួងក៏បានដាក់ចេញនូវគោលនយោបាយសុខភាពសិក្សា ដើម្បីឱ្យមានការត្រួតពិនិត្យដោយយកចិត្តទុកដាក់លើសុខភាពរបស់សិស្ស និងរៀបចំឱ្យមានផែនការពហុវិស័យដើម្បីបង្ការជំងឺឆ្លង និងជំងឺមិនឆ្លងជាដើម។ បន្ថែមពីលើនេះ នៅតាមសាលារៀនក៏មានកម្មវិធីដើម្បីពិនិត្យមើលអនាម័យមាត់ធ្មេញ បញ្ហាភ្នែក បញ្ហាអាហារូបត្ថម្ភ និងអនាគត ត្រូវវាស់កម្ពស់ និងថ្លឹងទម្ងន់កុមារជាប្រចាំ ដើម្បីឱ្យដឹងពីការរីកចម្រើនរបស់គាត់ថាតើល្អ ឬមិនល្អ?។
បន្ថែមពីលើនេះ យើងបានផ្សព្វផ្សាយទៅនាយកដ្ឋានជំនាញ មន្ទីរ និងនាយកសាលា ដើម្បីធ្វើការងារជាមួយអ្នកលក់ដូរ ដោយនាយកសាលានីមួយៗត្រូវធានាឱ្យបាននូវបញ្ហាសុវត្ថិភាពចំណីអាហារ ដោយឱ្យអ្នកលក់ លក់តែចំណីអាហារណាដែលមិនមានរសជាតិផ្អែមពេក មិនមានខ្លាញ់ច្រើនពេក មានភាពស្រស់ មិនជិតហួសកាលបរិច្ឆេទ មានប្រភពច្បាស់លាស់ និងហាមឃាត់អាហារណាដែលប៉ះពាល់ដល់សុខភាពកុមារ ដូចជាគ្រឿងស្រវឹង អាហារប៉ូវកម្លាំង ឬប្រភេទអាហារមិនមានសុវត្ថិភាពមួយចំនួនផ្សេងទៀត។
ក្រៅពីការគ្រប់គ្រងរបស់នាយកសាលា កត្តាសំខាន់ទី2 ដែលជំរុញឱ្យសាលារដ្ឋមានគុណភាពល្អដែរនោះ គឺកត្តាគ្រូបង្រៀន។
គ្រូបង្រៀនមានតួនាទីសំខាន់ណាស់ក្នុងការចែករំលែកចំណេះដឹង បទពិសោធឱ្យបានច្បាស់លាស់ទៅសិស្សានុសិស្ស។ហេតុនេះគ្រូបង្រៀនត្រូវតែអភិវឌ្ឍសមត្ថភាពជាប់ជាប្រចាំដើម្បីធានាថា ការបង្រៀនរបស់គាត់ត្រូវនឹងបរិបទសកលដែលគេត្រូវការ។
បន្ថែមពីលើនេះគ្រូបង្រៀនត្រូវតែមានឧបករណ៍បង្រៀនគ្រប់គ្រាន់ មានថ្នាក់និទស្សន៍ និងមានកិច្ចការតែងនិពន្ធត្រឹមត្រូវ។ លើសពីនេះទៅទៀត ដើម្បីធានាថា ការបង្រៀនប្រកបដោយប្រសិទ្ធភាពខ្ពស់ គឺត្រូវមានការធ្វើអធិការកិច្ចជាប់ជាប្រចាំ ដើម្បីតាមដានការអនុវត្តរបស់គ្រូដែលជាបុគ្គលដ៏សំខាន់សម្រាប់ការអប់រំដល់សិស្សានុសិស្សនៅទូទាំងប្រទេស។
កាលណាគ្រូបង្រៀនមានសមត្ថភាពខ្ពស់ នោះសិស្សានុសិស្សក៏មានឱកាសល្អច្រើនក្នុងការទទួលយកប្រភពចំណេះដឹងជាវិជ្ជមានសម្រាប់អភិវឌ្ឍសមត្ថភាពដែរ។
ចំណែកឯកត្តាសំខាន់ទី3 ដែលក្រសួងកំពុងយកចិត្តទុកដាក់ដែរនោះ គឺកត្តាលទ្ធផលការសិក្សារបស់សិស្ស។ កត្តានេះសំខាន់ខ្លាំងណាស់ ព្រោះទាល់តែមានការជំរុញឱ្យសិស្សខិតខំប្រឹងប្រែង និងមានវិធីសាស្រ្តបង្រៀនល្អ ទើបអាចធ្វើឱ្យគុណភាពនៃការអប់រំកើនឡើងជាវិជ្ជមានបាន។ ក្រសួងបានចាប់ផ្តើមអនុវត្តនូវផែនការសកម្មភាពសំខាន់ៗ ចាប់តាំងពីសិស្សនៅតូចៗរហូតដល់ធំ។
ជាក់ស្តែង យើងមានរៀបចំឱ្យមានថ្នាក់កុមារមេត្រី ដើម្បីឱ្យសិស្សទាំងប្រុស និងស្រីទទួលបានការអប់រំល្អដូចគ្នា មានការការពារល្អដូចគ្នា និងអប់រំដោយវិធីសាស្រ្តវិជ្ជមាន ដើម្បីឱ្យពួកគេធំធាត់ឡើងជាមួយនឹងផ្នត់គំនិត ក៏ដូចជាការអប់រំដែលល្អ។ បន្ថែមពីលើនេះ យើងមានកម្មវិធីជំរុញការអភិវឌ្ឍអំណានដំបូង ដើម្បីបង្ហាត់សិស្សទាំងអស់ឱ្យចេះអាន និងចាប់អារម្មណ៍លើអំណានតាំងពីវ័យក្មេងៗ។
បន្ថែមពីលើនេះ នៅពេលពួកគេចូលដល់កម្រិតអនុវិទ្យាល័យ យើងមានសាលាជំនាន់ថ្មីដើម្បីធ្វើការបណ្តុះបណ្តាលតាមវិធីសាស្ត្រថ្មី ក៏ដូចជាមានការធ្វើតេស្តជាប្រចាំដើម្បីធានាថា ពួកគេមានសមត្ថភាពគ្រប់គ្រាន់សម្រាប់បន្តទៅថ្ងៃអនាគត។
ឯកឧត្តមរដ្ឋមន្ត្រីបានបញ្ជាក់ផងដែរថា កត្តាសំខាន់ទី4 គឺកត្តាអាណាព្យាល និងការចូលរួមពីផ្នែកឯកជនក្នុងការអប់រំ។ កាលណាអាណាព្យាបាលមានការចូលរួមបានល្អ នោះលទ្ធផលនៃការសិក្សារបស់សិស្ស ក៏នឹងមានភាពប្រសើរឡើងផងដែរ។ បន្ថែមពីលើនេះសាលារៀនខ្លាំង ក៏ត្រូវការការចូលរួមគាំទ្រពីអាជ្ញាធរ និងផ្នែកពាក់ព័ន្ធនានាដើម្បីជំរុញឱ្យការអប់រំកាន់តែប្រសើរឡើង៕
