មុនពេលក្លាយជាមហាសេដ្ឋីល្បីឈ្មោះនៅតំបន់ Silicon ជាមួយនឹងក្រុមហ៊ុន Tesla និង SpaceX លោក Elon Musk ធ្លាប់បានធ្វើការងារច្រើនដែលមនុស្សទូទៅយល់ថាជាការងារប្រើកម្លាំងបាយដ៏លំបាក ដែលក្នុងនោះមានដូចជា អ្នកសម្អាត អ្នកអារឈើ អ្នកដាំបន្លែ។ល។
កាលពីអាយុ 17ឆ្នាំ លោក Elon Musk បានចាកចេញពីប្រទេសអាហ្វ្រិកខាងត្បូង ទៅរស់នៅជាមួយសាច់ញាតិរបស់គាត់នៅប្រទេសកាណាដា។ លោក Elon Musk បានចាប់ផ្ដើមការងារថ្មីរបស់ខ្លួននៅ Waldeck (Saskatchewan, Canada) ដោយធ្វើជាអ្នកដាំបន្លែ។ បន្ទាប់មក លោកក៏បានចូលរៀនផ្នែកជាងអារឈើនៅ Vancouver។ លោក Elon Musk បច្ចុប្បន្ន គឺជាមនុស្សឆ្លាតវៃ ប៉ុន្តែកាលណោះ ដើម្បីបានលុយច្រើន លោកបែរជាសម្រេចជ្រើសរើសធ្វើការងារប្រើកម្លាំងបាយទៅវិញ ដោយធ្វើជាអ្នកសម្អាត និងរៀបចំក្នុងរោងចក្រអារឈើ។
មហាសេដ្ឋីរូបនេះ ធ្លាប់បានឱ្យដឹងថា កន្លែងធ្វើការប្រចាំថ្ងៃរបស់លោក គឺជាកន្លែងក្ដៅខ្លាំង ហើយអាចបាត់បង់ជីវិត បើសិនអ្នកឈរនៅទីនោះតែកន្លះម៉ោង។ យ៉ាងនេះក្ដី ប្រាក់ខែដែលលោកទទួលបាន គឹត្រឹមតែ 18ដុល្លារប៉ុណ្ណោះក្នុង 1ម៉ោង។
លោក Elon Musk បានបង្ហើបប្រាប់អ្នកកាសែតថា លោក គឺជាអ្នកតស៊ូម្នាក់នៅក្នុងរោងចក្រនោះ ព្រោះថា នៅក្នុងរោងចក្រនោះ មានតែលោកម្នាក់គត់ដែលធ្វើការនេះបានយូរជាងគេ។ ប៉ុន្តែក្រោយមក លោកក៏បានសម្រេចចិត្តសុំឈប់ពីការងារនោះ ហើយក៏ងាកមករកវិស័យបច្ចេកវិទ្យាវិញម្ដង។
ឆ្នាំ1997 ម្ចាស់ក្រុមហ៊ុន SpacX រូបនេះ បានបញ្ចប់ការសិក្សានៅសាកលវិទ្យាល័យ Pennsylvania ហើយបន្តការសិក្សានៅសាកលវិទ្យាល័យ Stanford។ ក្រោយមកទៀត លោកក៏បានដាក់ពាក្យសុំធ្វើការឱ្យក្រុមហ៊ុន Netscape ព្រោះតែស្រឡាញ់វិស័យបច្ចេកវិទ្យា។ ប៉ុន្តែបំណងរបស់លោកត្រូវគេបដិសេធ។ លោកគិតថា នេះអាចមកពីលោកមិនមានសញ្ញាបត្រ ឬបទពិសោធទាក់ទិននឹងកុំព្យូទ័រ។
បើទោះជាការចាប់ផ្ដើមរបស់លោកមានការលំបាកយ៉ាងណាក៏ដោយ ប៉ុន្តែក្រោយមកលោកក៏បានបង្កើតក្រុមហ៊ុន Zip2 និងបានលក់ទៅឱ្យ Compaq ក្នុងឆ្នាំ1999 ក្នុងតម្លៃ 300លានដុល្លារអាមេរិក។ លោកបានបង្កើត Zip2 បន្ទាប់ពីបរាជ័យក្នុងការចង់ធ្វើការនៅ Netscape។ មហាសេដ្ឋីរូបនេះ ធ្លាប់បានគិតថា ខ្លួនត្រូវតែបង្កើតក្រុមហ៊ុនតូចមួយជាមុនសិន ហើយបើបរាជ័យ លោកអាចវិលទៅបន្តការសិក្សានៅមហាវិទ្យាល័យបានទៀត។
Zip2 គឺជាគេហទំព័រមួយដែលផ្ដល់សេវាណែនាំផ្នែកទេសចរណ៍ឱ្យកាសែត New York Times និង Chicago Tribune។
ក្រោយមកទៀត បន្ទាប់ពីបានប្រាក់ពីការលក់ក្រុមហ៊ុន Zip2 លោកក៏បានបង្កើត X.com ដែលជាក្រុមហ៊ុនផ្ដល់សេវាកម្មផ្នែកហិរញ្ញវត្ថុ ដែលក្រោយមកក្រុមហ៊ុននេះបានប្ដូរឈ្មោះទៅជា PayPal រហូតដល់បច្ចុប្បន្ន។ ឆ្នាំ2002 eBay បានទិញយក PayPal ក្នុងតម្លៃទឹកប្រាក់ 1.5ពាន់លានដុល្លារអាមេរិក។
លោក Elon Musk បន្តបង្កើតក្រុមហ៊ុន SpaceX ក្នុងឆ្នាំ2002 និង Tesla នៅឆ្នាំ2003។ ឆ្នាំ2016 លោកថែមទាំងបានបង្កើតក្រុមហ៊ុន Neuralink ដែលមានជំនាញខាងបំពាក់កុំព្យូទ័រទៅក្នុងខួរក្បាលរបស់មនុស្ស ដើម្បីតាមឱ្យទាន់បច្ចកវិទ្យាបញ្ញាសិប្បនិម្មិត។ មិនយូរប៉ុន្មានលោកក៏បង្កើតក្រុមហ៊ុន The Boring Company។
បច្ចុប្បន្នលោក Elon Musk គឺជាមហាសេដ្ឋីមួយរូបដែលមានឈ្មោះល្បីល្បាញក្នុងពិភពលោក ជាមួយនឹងទ្រព្យសម្បត្តិ 27.5ពាន់លានដុល្លារអាមេរិក៕
