ភ្នំពេញៈ ស្របពេលដែលប្រាសាទសំបូរព្រៃគុកត្រូវបានដាក់បញ្ចូលក្នុងសម្បត្តិបេតិកភណ្ឌពិភពលោក ក្រសួងទេសចរណ៍បានបង្កើនការផ្សព្វផ្សាយពីរមណីយដ្ឋាននេះ ទៅកាន់ពិភពលោកកាន់តែច្រើនជាងមុន និងជំរុញឲ្យក្រុមហ៊ុនភ្នាក់ងារទេសចរណ៍ដាក់ប្រាសាទនេះចូលក្នុងកញ្ចប់ទេសចរណ៍របស់ខ្លួនផង។
ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានថ្លែងឲ្យដឹងនៅការិយាល័យរបស់លោកនាព្រឹកថ្ងៃទី11 កក្កដានេះថា ក្រសួងបាន និងកំពុងរៀបចំ និងបានផ្សព្វផ្សាយរួចមកហើយនូវរមណីយដ្ឋានប្រាសាទសំបូរព្រៃគុក ប៉ុន្តែពេលប្រាសាទនេះត្រូវបានដាក់បញ្ចួលក្នុងសម្បត្តិបេតិកភណ្ឌពិភពលោក ក្រសួងនឹងបង្កើនការផ្សព្វផ្សាយបន្ថែមទៀតពីរមណីយដ្ឋាននេះ។ ឯកឧត្តមបន្តថា ការដាក់បញ្ចូលរមណីយដ្ឋាននេះជាសម្បត្តិបេតិកភណ្ឌពិភពលោកនឹងបង្កើតឲ្យមានខ្សែទស្សនកិច្ចបេតិកភណ្ឌថ្មីមួយទៀតរវាងប្រាសាទសំបូរព្រៃគុកទៅកាន់ប្រាសាទអង្គរវត្ត ខេត្តសៀមរាប និងឆ្ពោះទៅកាន់ប្រាសាទព្រះវិហារ ព្រមទាំងភ្ជាប់ខ្សែទស្សនកិច្ចទៅកាន់ប្រាសាទវត្តភូ ក្នុងប្រទេសឡាវផងដែរ។
ឯកឧត្តមបន្តថា “ចំនួនភ្ញៀវទេសចរជាតិ និងអន្តរជាតិនឹងចាប់អារម្មណ៍ នឹងមកទស្សនាប្រាសាទនេះច្រើនមិនខាន ព្រោះកន្លងមកក្រសួងក៏បានសហការជាមួយសហគមន៍នៅជុំវិញប្រាសាទរៀបចំបង្កើតជាផលិតផលទេសចរណ៍ផងដែរ តាមរយៈការសហការជាមួយអង្គការ ADB ដែលបានជួយជាមូលនិធិ អភិវឌ្ឍន៍សហគមន៍នៅតំបន់នោះ។ ឯកឧត្តមបន្ថែមថា លើសពីនេះក្រសួងនឹងសហការជាមួយអាជ្ញាធរខេត្ត និងគណៈកម្មការគ្រប់គ្រងប្រាសាទសំបូរព្រៃគុក ដើម្បីរៀបចំធ្វើជាផ្ទះស្នាក់នៅ (Home Stay) ភោជនីយដ្ឋាន ដើម្បីទទួលភ្ញៀវទេសចរជាតិ-អន្តរជាតិផងដែរ ដោយធ្វើយ៉ាងណាផ្តោតលើទិសស្លោក “ទីក្រុងស្អាត រមណីយដ្ឋានស្អាត សេវាល្អ”។
ឯកឧត្តមរដ្ឋមន្រ្តីបានបន្តថា ជាមួយនឹងផែនការអភិវឌ្ឍន៍តំបន់នេះ ខេត្តកំពង់ធំក៏មានសណ្ឋាគារលំដាប់ផ្កាយ4 សណ្ឋាគារកម្រិតមធ្យម និងផ្ទះសំណាក់ជាច្រើនទៀត ព្រមទាំងមានភោជនីយដ្ឋានដែលអាចទទួលភ្ញៀវទេសចរបាន ព្រោះក្រុងស្ទឹងសែន ខេត្តកំពង់ធំមានចម្ងាយត្រឹមតែ 25គីឡូម៉ែត្រពីប្រាសាទនេះប៉ុណ្ណោះ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានថ្លែងថា ពិតណាស់ការដាក់បញ្ចូលប្រាសាទសំបូរព្រៃគុកជាសម្បត្តិបេតិកភណ្ឌពិភពលោកនឹងទាក់ទាញភ្ញៀវទេសចរឱ្យទៅទស្សនាប្រាសាទនេះកាន់តែច្រើន ពិសេសភ្ញៀវអឺរ៉ុបដែលចូលចិត្តតំបន់រមណីយដ្ឋានបែបនេះ។លោកស្រីបន្តថា កន្លងមកប្រាសាទសំបូរព្រៃគុកមិនសូវទាក់ទាញភ្ញៀវទេសចរអន្តរជាតិប៉ុន្មានទេ តែពេលប្រាសាទនេះដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោកហើយ ភ្ញៀវទេសចរជាតិ-អន្តរជាតិនឹងមានការចាប់អារម្មណ៍ច្រើនពីប្រាសាទនេះមិនខាន៕
