រដ្ឋាភិបាលជប៉ុនបានផ្ដល់ជំនួយជាទឹកប្រាក់ចំនួនប្រមាណ 363,224ដុល្លារដល់អង្គភាពចំនួន3 ក្រោមគម្រោងការជំនួយឧបត្ថម្ភឥតសំណង សម្រាប់គម្រោងទ្រង់ទ្រាយតូច សន្ដិសុខមនុស្សជាតិ។
នៅក្នុងពិធីចុះហត្ថលេខាផ្ដល់ជំនួយ នៅថ្ងៃទី8 ខែមករា ឆ្នាំ2020 លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុន ប្រចាំកម្ពុជា បានមានប្រសាសន៍ថា៖«រដ្ឋាភិបាលជប៉ុន បាននិងកំពុងអនុវត្តកម្មវិធី KUSANONK នៅកម្ពុជាចាប់តាំងពីឆ្នាំ1991 ដើម្បីជួយដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ក្នុងការអនុវត្តគម្រោងរបស់ពួកគេ»។
លោកបានបញ្ជាក់ថា៖«ស្ថានទូតជប៉ុនប្រចាំកម្ពុជា បានផ្ដល់ជំនួយលើសពី 600គម្រោងនៅ ទូទាំងប្រទេសកម្ពុជានោះ តាមរយៈជំនួយ KUSANONK។ យើងមានសេចក្ដីសោមនស្សរីករាយដែលគម្រោងទាំងនេះ បានចូលរួមចំណែកក្នុងការលើកកម្ពស់គុណភាពនៃជីវភាពនៅកម្រិតមូលដ្ឋាន»។
លោកឯកអគ្គរាជទូតជប៉ុនបានថ្លែងបញ្ជាក់ដែរថា៖«ជាងនេះទៅទៀត សង្កេតឃើញថា កម្ពុជាកំពុងមានការអភិវឌ្ឍ យ៉ាងឆាប់រហ័ស ។ ទោះបីយ៉ាងណាក៏ដោយ ជប៉ុនទទួលស្គាល់ថា នៅតែមានបញ្ហាប្រឈមមួយចំនួន ដែលត្រូវដោះស្រាយដើម្បីលើកកម្ពស់គុណភាពជីវភាពរបស់ប្រជាជន»។
លោកម៉ាសាហ៊ីរ៉ូ បន្តថា៖« ជប៉ុននឹងបន្ដចូលរួមចំណែក ក្នុងការដោះស្រាយបញ្ហាប្រឈម ទាំងនោះតាមរយៈគម្រោងសហប្រតិបត្តិការសេដ្ឋកិច្ច និងការអភិវឌ្ឍផ្សេងៗ»។
យោងសេចក្តីប្រកាសព័ត៌មាន របស់ស្ថានទូតជប៉ុនប្រចាំកម្ពុជា នៅថ្ងៃផ្សេងគ្នា បានឱ្យដឹងថាគម្រោងចំនួន3 នោះរួមមាន៖
ទី1-គម្រោងកែលម្អផ្លូវថ្នល់ ក្នុងសង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ថវិកាចំនួន 181, 560ដុល្លារអាមេរិក។
ទី2-គម្រោងសាងសង់អគារសម្រាកពេទ្យ នៅមណ្ឌលសុខភាពទឹកឃ្លាំង ក្នុងខេត្តកណ្ដាល ថវិកាចំនួន 90,850ដុល្លារអាមេរិក។
ទី3-គម្រោងសាងសង់ស្ថានីយផលិតទឹកស្អាតខ្នាតតូច នៅក្នុងឃុំចំនួន7 ក្នុងខេត្ត2 នាទិសពាយព្យ ថវិកាចំនួន 90,814ដុល្លារអាមេរិក។
កាលពីឆ្នាំ2019 ជប៉ុនបានផ្តល់ជំនួយដល់កម្ពុជាចំនួន 4លើក គឺលើកទី1 នៅថ្ងៃទី20 ខែកុម្ភៈ ចំនួន 43,36លានដុល្លារ។ លើកទី2 នៅថ្ងៃទី31 ខែឧសភា ចំនួន 4,8លានដុល្លារ។ លើកទី3 នៅថ្ងៃ17 ខែកក្តដា ចំនួន 4,6លានដុល្លារ និងនៅថ្ងៃទី3 ខែតុលាឆ្នាំ2019 មានចំនួន 25,752,306ដុល្លារ៕
