នៅឆ្នាំ ២០២០នេះ ផលិតកម្ម Bee Production បានបញ្ចេញបទចម្រៀងថ្មីៗនេះមានមនោសញ្ចេតនា ញាក់កន្ទ្រាក់អារម្មណ៍ជាច្រើនបទនៅលើទីផ្សារ និងតាមបណ្ដាបណ្ដាញសង្គមអនឡាញន៍ ដែលសម្រិតស្រាំងតារាចម្រៀងប្រុសស្រីមានរូបសម្រស់សស្រ់សង្ហាសស្រស់សោភា។ ក្នុងនោះដែរផលិតកម្ម Bee Production ក៏បានបញ្ចេញកម្លាំងរបស់ខ្លួនក្នុងការរៀបចំការប្រគំតន្ត្រីធំមួយនៅខាងលិចផ្សារព្រៃទា ជិតខាងលិចវិហារចិន ដែលនឹងធ្វើឡើងរហូតដល់5ថ្ងៃចាប់ពីថ្ងៃទី៩ ដល់១៣ មករា ផងដែរ។
លោក ហាស សំអាត ដែលត្រូវគេស្គាល់ថាជាម្ចាស់បទ«សុំទោសកំពុងចាម» បានអះអាងថា ដោយសារតែលោកមានបទពិសោធន៍ក្នុងការរៀបចំកម្មវិធីប្រគំតន្ត្រីជាយូរមកហើយ ទើបក្រោយពេលលោកមានតួនាទីក្នុងផលិតកម្ម Bee Production លោកក៏នៅតែទទួលជោគជ័យក្នុងការរៀបចំប្រគំតន្ត្រី ដែលគឺជាយុទ្ធសាស្ត្រ ដែលមិនខុសពីជួយឱ្យតារាចម្រៀងថ្មីៗរបស់ផលិតកម្មលោកទាំងអស់ កាន់តែមានសកម្មភាព។
ជាក់ស្ដែងសម្រាប់ការបញ្ចេញសិល្បករឱ្យចេញច្រៀងក្នុងការប្រគំតន្ត្រីនៅផ្សារព្រៃទា ដែលធ្វើដល់ទៅ៥ថ្ងៃជាទ្រង់ទ្រាយធំនោះ មិនមែនជាលើកទី១នោះទេ ដ្បិតពេលកន្លងមក លោកបានបញ្ចេញតារាចម្រៀងរបស់ខ្លួន នៅក្នុងសកម្មភាពប្រគំតន្ត្រីតូចធំរបស់ខ្លួនរាប់ភ្លេចមកហើយ បន្ថែមពីលើសកម្មភាពឡើងឆាកទូរទស្សន៍របស់កូនក្រុម ដោយគ្រាន់តែសកម្មភាពប្រគំតន្ត្រីលើកនេះ ធំជាងសព្វដង និងជាកម្មវិធីដែលស្ថិតនៅទីប្រជុំជនជាយក្រុង ដែលពិតជាមានមនុស្សទស្សនាកុះករ។ ក្រុមតារាចម្រៀងរបស់លោកត្រៀមខ្លួនរួចរាល់អស់ហើយ ក្នុងការបង្អួតបទចម្រៀងល្អៗ និងថ្មីៗ ក្នុងការប្រគំតន្ត្រីនៅផ្សារព្រៃទានោះ៕
