ប្រសិនបើអ្នក គឺជាមនុស្សម្នាក់ដែលមានការងាររវល់ខ្លាំងពេញមួយថ្ងៃ រហូតស្ទើរតែរកពេលទំនេរមិនបាននោះ សូមកុំបណ្តោយខ្លួនឱ្យខូចសុខភាពឱ្យសោះ អ្នកគួរតែយកចិត្តទុកដាក់ថែរក្សាសុខភាពរបស់អ្នកមុនគេ។ ដោយជាញឹកញាប់ត្រូវទទួលទានទឹកឱ្យបានគ្រប់គ្រាន់ជាប្រចាំ ទើបអ្នកមិនមានជំងឺ “កង្វះជាតិទឹក” ព្រោះថា អ្នកដឹងទេបើអ្នកទទួលទានទឹកតិចពេកនៅក្នុងមួយថ្ងៃៗ នោះវាហុចផលដល់សុខភាពរបស់អ្នក និងបង្កបញ្ហាអវិជ្ជមានធ្ងន់ធ្ងរ ដោយមិនដឹងខ្លួន។
1. ជំងឺភ្លេចភ្លាំង
នៅពេលដែលរាងកាយរបស់អ្នកខ្វះជាតិទឹក វានឹងបណ្តាលឱ្យការដឹកនាំសារធាតុចិញ្ចឹមនានាទៅកាន់ខួរក្បាលគឺមិនពេញលេញ ឯបេះដូងក៏មិនអាចច្របាច់ឈាមគ្រប់គ្រាន់ទៅចិញ្ចឹមខួរក្បាលដែរ។ មូលហេតុនេះធ្វើឱ្យអ្នកមានជំងឺបាត់បង់ការចងចាំបន្តិចម្តងៗ ឬមានការគិតយឺត ខួរក្បាលស្ពឹក និងឧស្សាហ៍ឈឺក្បាលជាដើម។
2. ជំងឺឫសដូងបាត
ជាការពិតណាស់ ប្រសិនបើរាងកាយមិនអាចទទួលបានទឹកគ្រប់គ្រាន់ទេ ការរំលាយអាហារនៅក្នុងក្រពះ នឹងមានការលំបាកបន្ថែមទៀត ព្រោះពោះវៀនឡើងស្ងួត មិនអាចបណ្ដេញលាមកបានល្អ ហើយលាមកអាចនឹងស្ងួតពេក ពេលកាកសំណល់សល់ច្រើននៅក្នុងពោះវៀនធំ។ ពេលនោះវាត្រូវបានស្រូបត្រឡប់មកវិញពីពោះវៀនធំចូលទៅក្នុងរាងកាយដែលបង្កឱ្យកើតមានអាការទល់លាមក ហើយនៅទីបំផុតក៏កើតឡើងនូវជំងឺឫសដូងបាតនេះឡើង។
3. ឈឺសន្លាក់
ដឹងទេថាឆ្អឹងខ្ចីនៃផ្នែកខាងក្នុងរាងកាយ គឺសំខាន់ខ្លាំងណាស់ ហើយវាងាយនឹងមានគ្រោះថ្នាក់ជាទីបំផុត។ ជាទូទៅវាត្រូវការជាតិទឹក80% ដូច្នេះប្រសិនបើនៅសន្លាក់ ឬឆ្អឹងខ្ចីត្រង់ផ្នែកណាមួយខ្វះជាតិទឹក ឬមិនមានសំណើមគ្រប់គ្រាន់វាងាយនឹងឈឺចាប់ ឬឆាប់រងរបួស ឬរលាក នៅពេលដែលអ្នកហាត់ប្រាណ លើករបស់មានទម្ងន់ធ្ងន់ៗ ឬធ្វើការងារផ្សេងៗជាដើម។
4. ជំងឺរលាកប្លោកនោម
ប្រសិនបើអ្នកឈឺបន្ទោបង់ទឹកនោម តែបន្ទោបង់មិនចេញ ឬចេញមកដែរតែតិចពេក បញ្ជាក់ថា អ្នកអាចមាន អាការរលាកប្លោកនោមហើយ ដោយសារតែការទទួលទានទឹកមិនបានគ្រប់គ្រាន់។
5. ជំងឺធាត់លើសទម្ងន់
មិនជឿក៏ត្រូវតែជឿដែរថា បើអ្នកទទួលទានទឹកតិចពេក វាក៏ជាមូលហេតុមួយ ដែលអាចធ្វើឱ្យអ្នកធាត់បានដែរ ជាពិសេសបើអ្នកទទួលទានទឹកមិនបានគ្រប់គ្រាន់នៅពេលព្រឹក។ ប៉ុន្តែបើអ្នកទទួលទានទឹក1កែវមុនពេលទទួលទានអាហារថ្ងៃត្រង់ ឬអាហារពេលល្ងាចវិញ នឹងជួយឱ្យអ្នកស្គមវិញ ព្រោះអ្នកនឹងមានអារម្មណ៍ថា ឆ្អែតតាំងពីដំបូងមុនពេលបរិភោគអាហារ។ ដូច្នេះគ្រាន់តែទទួលទានទឹកឱ្យបានច្រើននោះ អ្នកក៏អាចសម្រកទម្ងន់បានយ៉ាងល្អ។
6. រដូវមកមិនទៀងទាត់
ស្ថានភាពនៃការមករដូវរបស់ស្ត្រី គឺជាការចង្អុលបង្ហាញអំពីបញ្ហាសុខភាពមួយចំនួនដែរ។ ប្រសិនបើអ្នករកឃើញថា អ្នកមករដូវមិនទៀងទាត់ មានការឈឺចាប់ ឬកើតអាការខុសប្រក្រតីនានា សូមគិតថា នេះអាចជាមូលហេតុដែលអ្នកមិនបានយកចិត្ដទុកដាក់ក្នុងការទទួលទានទឹកឱ្យបានគ្រប់គ្រាន់ទៅតាមតម្រូវការ ដែលរាងកាយត្រូវការជាចាំបាច់។ កត្តានេះធ្វើឱ្យឈាមរត់មិនបានសព្វល្អ ទើបបានជាអ្នកមានអាការនេះកើតឡើង។
ខាងក្រោមនេះគឺជាសញ្ញា ដែលប្រាប់ថា អ្នកគឺជាមនុស្សដែលខ្វះជាតិទឹក៖
– មិនបន្ទោបង់ទឹកនោមចោលពី4-7ដងក្នុងមួយថ្ងៃ
– ទឹកនោមមានពណ៌លឿង និងខាប់ស្ទើរតែរៀងរាល់ពេលដែលបន្ទោបង់ចេញមកក្រៅ
– ទឹកនោមមានក្លិន។ល។ ដូច្នេះគ្រាន់តែការមិនទទួលទានទឹកក៏ជះឥទ្ធិពលអវិជ្ជមានទៅលើរាងកាយយ៉ាងច្រើនដែរ នេះមិនរាប់បញ្ចូលដល់ការខូចខាតស្បែក ស្បែកមានសភាពសឹករិចរិល ភ្នែកស្ងួត ស្បែកស្ងួត និងមើលទៅចាស់ជាងអាយុរបស់អ្នកទៀតផង។ សរុបមកអ្នកគួរទទួលទានទឹកឱ្យបានច្រើនប្រមាណជា1500-2000មីលីលីត្រក្នុងមួយថ្ងៃ ឬ6-8ពែងក្នុង1ថ្ងៃ ឬប្រសិនបើខ្ជិលក្រោកទៅយកទឹកមកទទួលទាន អ្នកត្រូវដាក់ដបទឹកមួយលីត្រនៅលើតុ ហើយទទួលទានឱ្យបានញឹកញាប់។ ធ្វើដូច្នេះរាងកាយរបស់អ្នកនឹងមិនខ្វះជាតិទឹកទៀតនោះទេ។
ប្រសិនបើអ្នកទទួលទានទឹកមិនបាន6-8កែវក្នុងមួយថ្ងៃ ប៉ុន្តែអ្នកមិនមានអាការខ្វះជាតិទឹកទេ គឺអាចបណ្តាលមកពីអ្នកទទួលទានភេសជ្ជៈផ្សេងៗ ឬបរិភោគអាហារ ដែលមានជាតិទឹកច្រើនរួចមកហើយ។ តែទោះជាយ៉ាងនេះក្តី ទឹកសុទ្ធនៅតែមានប្រយោជន៍យ៉ាងសំខាន់ចំពោះរាងកាយ។ សូមកុំភ្លេចទទួលទានទឹកមួយថ្ងៃឱ្យបានពី6-8កែវ ដើម្បីថែរក្សាសុខភាពទាំងអស់គ្នា៕
