ទៅមិនរួចមួយគូទៀតហើយ! បន្ទាប់មានរឿងរ៉ាវក្ដៅគគុកកំពុងតែផ្ទុះឡើងនៅតាមបណ្ដាញទំនាក់ទំនងសង្គម នោះគឺតារាចម្រៀងស្រីជាសមាជិកនៅក្នុងក្រុមចម្រៀង Brown Eyed Girls នាង Ga In ត្រូវបានមិត្តភ័ក្តិរបស់គូស្នេហ៍ខ្លួន Joo Ji Hoon តារាឯកប្រុសនៅក្នុងរឿងភាគល្បី Princess Hour បបួលទៅជក់កញ្ឆាជាមួយគ្នា រហូតដល់ត្រូវប៉ូលិសចាប់ខ្លួនបាន ហើយនៅទីបំផុតសម្ព័ន្ធភាពរវាងនាង និងគូស្នេហ៍នៅពេលនេះក៏ត្រូវដល់ទីបញ្ចប់។
ក្រុមហ៊ុន Key East ជាអ្នកគ្រប់គ្រងតារាឯកប្រុសនេះបានចេញមុខមកអះអាងព័ត៌មានដែលគូស្នេហ៍នេះចែកផ្លូវគ្នា បន្ទាប់ពីមានសម្ព័ន្ធភាពស្នេហាជាមួយគ្នាអស់រយៈពេល 3 ឆ្នាំហើយនោះ ដោយបានថ្លែងថា “នេះជារឿងពិតប្រាកដណាស់ ពួកគេបានចែកផ្លូវគ្នាហើយ និងបានអះអាងតាមហេតុផលដែលមានពិតប្រាកដជាក់ស្ដែងនេះ ព្រោះភាពផ្ទាល់ខ្លួនរបស់ពួកគេរៀងខ្លួននោះ វាសំខាន់ជាងការដែលលើកលែងទោសដល់ការប្រព្រឹត្តខុសច្បាប់នៅគ្រានេះទៅទៀត”។
ចំណែកឯខាងផលិតកម្ម Mystic Entertainment អ្នកគ្រប់គ្រងតារាស្រី Ga In វិញ បានចេញមកអះអាងដូចគ្នា និងសំណូមពរឱ្យអ្នកគាំទ្រទាំងឡាយយល់ថា រឿងលម្អិតនៃការចែកផ្លូវគ្នានោះ មិនអាចបើកបង្ហាញឱ្យដឹងបន្ដទៀតបានទេ។
គួរបញ្ជាក់ផងដែរថា អតីតគូស្នេហ៍ចាប់ផ្ដើមបើកបង្ហាញពីទំនាក់ទំនងស្នេហ៍កាលពីខែឧសភា ឆ្នាំ2014 មុនពេលដែលមានព័ត៌មានតារាស្រីរូបនេះត្រូវប៉ូលិសចាប់ខ្លួន ពីបទប្រើប្រាស់គ្រឿងញៀនប្រភេទកញ្ឆាខុសច្បាប់ នាងក៏បានបដិសេធនូវរឿងទាំងអស់នេះផងដែរ ប្រហែលជាចំនួនកញ្ឆានៅក្នុងគ្រានេះច្រើនពេក ទើបធ្វើឱ្យរង្គោះរង្គើដល់សម្ព័ន្ធស្នេហារបស់នាងបែបនេះ៕
