រយៈពេល 9ខែ ឆ្នាំ2019 នេះ អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានប្រមូលពន្ធលើយានយន្ត និងគ្រឿងចក្របានប្រមាណ 1,244លានដុល្លារសហរដ្ឋអាមេរិក តួលេខនេះស្មើនឹងជាង 52% នៃចំណូលពន្ធសរុប។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករ។
យោងតាមកិច្ចប្រជុំបូកសរុបការងារគយ និងរដ្ឋាកររយៈពេល 9ខែ ឆ្នាំ2019 ឯកឧត្តមបណ្ឌិត គុណញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានគូសបញ្ជាក់ថា សម្រាប់ 9ខែ ឆ្នាំ2019 ចំណូលសរុបមានប្រមាណជាង 9.7ទ្រីលានរៀល(ប្រមាណ 2,391 លានដុល្លារអាមេរិក) កើនឡើងប្រមាណ 35% ធៀបរយៈពេលដូចគ្នាក្នុងឆ្នាំ2018។
លទ្ធផលចំណូលនេះត្រូវនឹងប្រមាណជា106% នៃផែនការឆ្នាំ ដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2019។ បើប្រៀបធៀបរយៈពេលដូចគ្នាក្នុងឆ្នាំ2018 លទ្ធផល ចំណូលតាមប្រភេទពន្ធ និងអាករសំខាន់ៗ ដែលប្រមូលដោយគយ មានកំណើនគួរឱ្យកត់សម្គាល់ ក្នុងនោះពន្ធគយ (ពន្ធនាំចូល)មានកំណើនជិត 38% អាករពិសេសកើនប្រមាណ 39% និងអាករលើតម្លៃបន្ថែម (VAT) កើនជាង 32%។
របាយការណ៍ក៏បានឱ្យដឹងដែរថា ការប្រមូលចំណូលពន្ធលើមុខទំនិញជាប្រភពចំណូលសំខាន់ៗផ្សេងទៀត ដូចជាប្រងឥន្ធនៈ និងថាមពលសម្រេចបានប្រមាណ 406លានដុល្លារអាមរិក ស្មើ នឹង 17%នៃចំណូលពន្ធសរុប និងមុខទំនិញចម្រុះ និងគ្រឿងសំណង់ប្រមូលបាន 705លានដុល្លារអាមេរិកស្មើនឹងប្រមាណ 29.5% នៃចំណូលសរុប។
ការកើនឡើងនៃចំណូលពន្ធលើយានយន្ត និងគ្រឿងចក្រនេះ កើតឡើងបន្ទាប់ពីរាជរដ្ឋាភិបាល កាលពីពេលថ្មីៗបានប្រកាសដំឡើងពន្ធរថយន្ត និងគ្រឿងចក្រឡើងរហូតពីជាង 80% ទៅ 110% តាមប្រភេទទំហំស៊ីឡាំងនៃរថយន្ត។ ជាមួយគ្នានេះដែរយានយន្ត និងគ្រឿងចក្រប្រភេទជជុះក៏ត្រូវបានដំឡើងផងដែរ នៅក្នុងនោះអង្គភាពគយ ក៏បានកំណត់តម្លៃពន្ធថ្មី ទៅលើប្រភេទយានយន្តទេសចរណ៍ សម្រាប់ទំហំស៊ីឡាំងមិនលើសតម្លៃពន្ធ 93% រហូតដល់ជាង 152% សម្រាប់ប្រភេទរថយន្តកម្លាំងលើស 5000សេះ។
ការបង្កើនពន្ធយានយន្ត និងគ្រឿងចក្រ មិនត្រឹមតែជួយបង្កើនចំណូលចូលដល់សេដ្ឋកិច្ចជាតិប៉ុណ្ណោះទេ គឺថែមទាំងជួយឱ្យប្រជាពលរដ្ឋងាកទៅប្រើប្រាស់រថយន្តថ្មី ដែលធានាសុវត្ថិភាពប្រើប្រាស់កាត់បន្ថយគ្រោះថ្នាក់ចរាចរណ៍ និងទាក់ទាញក្រុមហ៊ុនវិនិយោគបង្កើតរោងចក្រដំឡើងរថយន្តឱ្យមកបណ្តាក់ទុនកាន់តែច្រើនក្នុងស្រុកនាពេលអនាគត។
ថ្មីៗនេះប្រមុខរាជរដ្ឋាភិបាលកម្ពុជា បានកោតសរសើរដល់អង្គភាពគយដែលបានខិតខំប្រមូលពន្ធឱ្យមានកំណើនគួរជាទីមោទនៈជាពិសេសចំណូលពន្ធយានយន្ត និងគ្រឿងចក្រនេះ។
សម្តេចតេជោ ហ៊ុន សែន នាយករដ្ឋមន្ត្រី បានអះអាងថា ការកើនឡើងចំណូលពន្ធលើយានយន្តនិងគ្រឿងចក្រ គឺជាការរីកលូតលាស់នៃសេដ្ឋកិច្ចកម្ពុជា ដែលធ្វើឱ្យប្រជាពលរដ្ឋកាន់តែមានជីវភាពធូរធារ ហើយដែលតម្រូវឱ្យការប្រើប្រាស់យានយន្ត និងគ្រឿងចក្រកាន់តែកើនឡើង ដើម្បីប្រើប្រាស់សម្រាប់ជាមធ្យោបាយធ្វើដំណើរប្រើប្រាស់ សម្រួលដល់មុខរបររបស់ខ្លួន និងដឹកជញ្ជូនទំនិញជាដើម ដែលជំរុញនូវចំណូលពន្ធយានយន្ត និងគ្រឿងចក្រកើនឡើងផងដែរ។
បើតាមសម្តេចនាយករដ្ឋមន្ត្រី ចំណូលគយ បើគិតជាមធ្យមមានប្រមាណ 250លានដុល្លារក្នុង 1ខែ ហើយមានខែខ្លះ អាចមានរហូតដល់ 300លានដុល្លារ ហើយការប្រមូលពន្ធនៅសល់ពេល 2ខែទៀតសម្រាប់ឆ្នាំនេះ ដូច្នេះចំណូលគយឆ្នាំនេះ រំពឹងថា នឹងកើនឡើងលើផែនការ 800លានដុល្លារអាមេរិក។
សម្តេច ហ៊ុន សែន បញ្ជាក់ទៀតថា ក្នុង 1ខែៗ កម្ពុជាប្រមូលចំណូលសរុបបានប្រមាណ 500លានដុល្លារអាមេរិក និងចំណាយទៅវិញប្រមាណ 300លានដុល្លារ នៅសល់ 200លានដុល្លារសម្រាប់ការសន្សំ ដើម្បីវិនិយោគដោយខ្លួនឯង ដោយមិនរង់ចាំតែការវិនិយោគពីបរទេសនោះទេ។
លទ្ធផលដ៏ល្អប្រសើរនេះ គឺបានមកដោយសារតែកម្ពុជា មានស្ថិរភាពនយោបាយ ការអនុវត្តកម្មវិធីកែទម្រង់របស់ អ.គ.រ(អគ្គនាយកដ្ឋានគយ និងរដ្ឋាករ)ស្របតាមគោលនយោបាយ និងយុទ្ធសាស្ត្រ កែទម្រង់មុតស្រួចរបស់រាជរដ្ឋាភិបាល ការពង្រឹងអភិបាលកិច្ចផ្ទៃក្នុងរបស់អង្គភាពគយ និងការយល់ដឹងកាន់តែទូលាយ ក្នុងការអនុវត្តកាតព្វកិច្ច ពន្ធអាកររបស់ធុរជនពាក់ព័ន្ធ៕
