នៅក្នុងក្បួនតម្រាពេទ្យរបស់ចិនបានបង្រៀនថា មានកាយវិការ 8យ៉ាងដែលមនុស្សយើងគួរធ្វើនៅក្នុងជីវិតប្រចាំថ្ងៃឱ្យបានញឹកញាប់ ដើម្បីឱ្យមានសុខភាពរាងកាយល្អ ហើយកាយវិការទាំងអស់នោះគឺ ៖
1. ធ្វើចលនាកែវភ្នែក : ការផ្ចង់ខ្សែភ្នែកសម្លឹងទៅរកចំណុចណាមួយក្នុងរយៈពេលយូរ គឺជាការធ្វើបាបកែវភ្នែកខ្លួនឯងដោយផ្ទាល់ដោយមិនដឹងខ្លួន ដូច្នេះយ៉ាងហោចណាស់នៅរៀងរាល់ 1ម៉ោងម្តង មនុស្សម្នាក់ៗគួរធ្វើលំហាត់ប្រាណខ្សែភ្នែកដោយការបើកភ្នែកសម្លឹងមើលទៅលើពិតាន រួចហើយបង្វិលកែវភ្នែកសន្សឹមៗទៅខាងឆ្វេង រួចចុះទៅក្រោម ហើយរេទៅខាងស្តាំ មុននឹងវិលទៅសម្លឹងមើលខាងលើវិញ។ ចូរធ្វើបែបហ្នឹងឱ្យបានច្រើនដង សាច់ដុំភ្នែកនឹងបានរឹងមាំល្អ។
2. លេបទឹកមាត់ : ការលេបទឹកមាត់ញឹកញាប់ គឺជាការធ្វើលំហាត់ប្រាណសាច់ដុំបំពង់ក ជួយជំរុញប្រព័ន្ធរំលាយអាហារឱ្យធ្វើការបានតាមប្រក្រតី។
3. សិតសក់ : ទោះជាការសិតសក់ញឹកញាប់មិនបានជួយឱ្យសក់របស់យើងស្អាតឡើងមែន តែវាជាការជួយម៉ាស្សាសរសៃប្រសាទលើនៅលើស្បែកក្បាល ជួយធ្វើឱ្យភ្នែកភ្លឺច្បាស់ ឫសសរសៃសក់រឹងមាំឡើង ព្រោះមានលោហិតហូរទៅចិញ្ចឹមស្បែកក្បាលគ្រប់ពេលដែលយើងបានសិតសក់ជានិច្ច។
4. ម៉ាស្សាត្រចៀក : តាមក្បួនតម្រារបស់គ្រូពេទ្យចិនបុរាណបានឱ្យដឹងថា នៅនឹងត្រចៀករបស់យើងមានសរសៃប្រសាទដែលតភ្ជាប់ជាមួយក្រលៀន ដូច្នេះការទាញ ផ្ទាត់ ច្របាច់ ឬត្រដុសស្លឹកត្រចៀកញឹកញាប់ នឹងជួយជំរុញការធ្វើការងាររបស់ក្រលៀនដោយផ្ទាល់ ជួយការពារអាការវិលមុខ និងការបានឮអ្វីផ្តេសផ្តាស់។
5. កម្រើកអណ្តាតពេលអង្គុយទំនេរៗ : បើបានយកអណ្តាតរុញក្រអូមមាត់ខាងលើផងនោះ វានឹងជួយជំរុញការបញ្ចេញទឹកមាត់ ធ្វើឱ្យប្រអប់មាត់ស្អាត និងបំបាត់ក្លិនមាត់បានទៀតផង។
6. ខ្ជឹបរន្ធគូទ : ជាវិធីបំបាត់អាការឆ្អល់ពោះដ៏ងាយ និងមានប្រសិទ្ធភាពបំផុត។ ចូរខ្ជឹបរន្ធគូទក្នុង 1ថ្ងៃឱ្យបាន 3ឈុត 1ឈុតឱ្យបានពី 50 -100ដង ព្រោះរាល់ពេលដែលយើងខ្ជឹបរន្ធគូទ ពោះវៀននឹងពង្រឹងខ្លួនកម្ចាត់កាកសំណល់មិនល្អដែលនៅសេសសល់ក្នុងពោះវៀនមិនឱ្យរាតត្បាតបំផ្លាញរាងកាយរបស់យើង។
7. ខាំធ្មេញ : ការខាំធ្មេញស្រាលៗញឹកញាប់ នឹងជួយធ្វើឱ្យធ្មេញរឹងមាំ និងជួយជំរុញការផលិតទឹករំលាយអាហារ សម្រាប់អ្នកដែលមានបញ្ហារឿងពោះវៀនចូរកុំខកខានឱ្យសោះ។
8. យកដៃត្រដុសថ្ពាល់ និងផ្ទៃមុខ : ថ្ពាល់ និងផ្ទៃមុខ គឺជាកន្លែងដែលខ្វះការហាត់ប្រាណច្រើនបំផុតលើរាងកាយ នេះជាវិធីមួយដ៏សែនងាយបំផុត គ្រាន់តែត្រដុសបាតដៃទាំងសងខាង រួចហើយយកបាតដៃមកដុសមុខស្រាលៗ វានឹងជួយជំរុញដល់ប្រព័ន្ធឈាមរត់ ធ្វើឱ្យឈាមហូរមកចិញ្ចឹមផែនថ្ពាល់ទាំងសងខាងបានកាន់តែច្រើនឡើង ធ្វើឱ្យផ្ទៃមុខស្អាតស្រស់ថ្លា៕
