ពិភពលោកនាសម័យបច្ចុប្បន្ននេះជាពិភពលោកនៃការប្រកួតប្រជែង តែវិធីសាស្ត្រដែលគេប្រកួតប្រជែងផ្នែកសេដ្ឋកិច្ច គេលែងប្រកួតប្រជែងផ្នែកកសិកម្ម ឬផ្នែកធនធានតទៅទៀតហើយ។ អ្វីដែលគេចាត់ទុកថា ជាការប្រកួតប្រជែងដ៏ធំ និងទាញយកប្រយោជន៍ច្រើនសម្រាប់ការអភិវឌ្ឍសេដ្ឋកិច្ចនាពេលបច្ចុប្បន្ន គឺការធ្វើនវានុវត្តន៍ (innovation) ដែលជាការរុករកបង្កើតសមិទ្ធផលថ្មីៗសម្រាប់ដោះស្រាយបញ្ហាមនុស្ស និងបង្កើតជាផលប្រយោជន៍ជាហិរញ្ញវត្ថុជាដើម។
ថ្មីៗនេះរបាយការណ៍ស្តីពីការប្រកួតប្រជែងលើពិភពលោករបស់វេទិកាសេដ្ឋកិច្ចពិភពលោកប្រចាំឆ្នាំ 2019 (World Economic Forum Global Comcompetitiveness Report 2019) បានបញ្ជាក់ថា ប្រទេសជាច្រើនកំពុងយកចិត្តទុកដាក់ជំរុញឱ្យមានការបង្កើតថ្មីដើម្បីប្រកួតប្រជែងផ្នែកអភិវឌ្ឍន៍។ នៅក្នុងនោះប្រទេសហូឡង់ ជាប្រទេសមួយដែលស្ថិតក្នុងចំណោមប្រទេសទាំង10 ដែលមាននវានុវត្តន៍សេដ្ឋកិច្ចខ្លាំងជាងគេលើពិភពលោក បានព្យាយាមធ្វើឱ្យខ្លួនក្លាយជាតំបន់ដែលងាយស្រួលក្នុងការបញ្ចូលនូវបច្ចេកវិទ្យាថ្មី និងវិធីសាស្ត្រថ្មីៗក្នុងការធ្វើការងារ។ ប្រជាជននៅក្នុងប្រទេសនេះ ទទួលបានការអប់រំយ៉ាងទូលំទូលាយពីបច្ចេកវិទ្យា និងត្រូវបានគេលើកទឹកចិត្តឱ្យមានសេរីភាពលើការគិត និងពិចារណាលើវិធីឆ្លាតវៃជាច្រើនដែលខុសពីវិធីចាស់ៗរបស់មនុស្សជាទូទៅក្នុងសង្គម។
ចំណែកឯប្រទេសបារាំងវិញ ឈរនៅលំដាប់ថ្នាក់លេខ9 ដែលត្រូវបានគេមើលឃើញថាមានការចាក់ឫសយ៉ាងមាំនូវការធ្វើអាជីវកម្ម ឬសហគ្រិនភាពប្រពៃណី តែទោះជាយ៉ាងនេះក្តី ក៏បារាំងកំពុងជំរុញឱ្យមានការលើកទឹកចិត្តដល់អ្នកបង្កើតថ្មីជាច្រើន ដើម្បីធ្វើយ៉ាងណាឱ្យមានដំណើរស្របគ្នារវាងសហគ្រាសធំៗជាប្រពៃណី និងបច្ចេកវិទ្យាទំនើបនៅក្នុងប្រទេស។
បារាំងជំរុញ និងលើកទឹកចិត្តឱ្យអ្នករុករកថ្មីៗទទួលនូវអាទិភាពសម្រាប់ការកែប្រែគម្រោងនវានុវត្តន៍របស់ខ្លួនឱ្យក្លាយទៅជាអាជីវកម្ម។ បើងាកទៅមើលចក្រភពអង់គ្លេសវិញ ត្រូវបានគេមើលឃើញថា ប្រទេសនេះសម្បូរទៅដោយស្ថាបត្យកម្មបុរាណ និងមានគ្រឹះស្ថានអប់រំយូរអង្វែង តែអង់គ្លេសស្ថិតនៅក្នុងលំដាប់ថ្នាក់លេខ8 នៃប្រទេសដែលមានការបង្កើតថ្មីច្រើនបំផុតលើពិភពលោក។ អង់គ្លេសបានជំរុញខ្លួនឱ្យក្លាយជាប្រទេស ឬជាផ្នះបស់អ្នកវិទ្យាសាស្ត្រ ព្រមទាំងជំរុញឱ្យមានមជ្ឈមណ្ឌលស្រាវជ្រាវជាច្រើនដើម្បីលើកទឹកចិត្តប្រជាជនឱ្យខិតខំប្រឹងប្រែងបំបែកគំនិតនៃការអប់រំដើម្បីបង្កើតជាសមិទ្ធផលវិទ្យាសាស្ត្រថ្មីៗដែលផ្តល់ផលប្រយោជន៍សម្រាប់ប្រទេសផង និងសម្រាប់ពិភពលោកផង។
ប្រទេសដែលឈរនៅលំដាប់ថ្នាក់លេខ7 នៃទិន្នន័យប្រចាំឆ្នាំ2019 នេះ គឺប្រទេសជប៉ុន។ ជប៉ុនជាប្រទេសដែលមានចំនួននៃការដាក់ពាក្យសុំប៉ាតង់សម្រាប់ស្នាដៃថ្មីច្រើនឡើងៗពី 1ឆ្នាំទៅ1ឆ្នាំ។ កំណើននៃការរុករកឃើញនេះត្រូវបានគេមើលឃើញថា មានកំណើនលឿន និងអាចរំពឹងថា ធ្វើឱ្យប្រទេសនេះរត់កាន់តែលឿនឡើងៗ ឬទទួលបានចំណាត់ថ្នាក់កាន់តែល្អនៅថ្ងៃអនាគត ដោយសារប្រព័ន្ធអប់រំនៅក្នុងប្រទេសជប៉ុន គឺបានបញ្ចូលកម្មវិធីនវានុវត្តន៍តាំងពីសិស្សនៅវ័យក្មេង។
នៅពីលើជប៉ុន គឺកូរ៉េខាងត្បូង ដែលធ្លាប់ជាប្រទេសដែលគេចាត់ទុកថាជាប្រទេសដែលប្រើប្រាស់រ៉ូបូតច្រើនជាងគេនោះ បានក្លាយជាប្រទេសលេខរៀងទី6 ដែលមាននវានុវត្តន៍ច្រើន ព្រោះប្រទេសនេះបានចំណាយថវិកាខ្ពស់លើវិស័យស្រាវជ្រាវ និងអភិវឌ្ឍន៍ (R&D)។ កូរ៉េខាងត្បូងបានចំណាយច្រើនជាង 4ភាគនៃ GDP របស់ខ្លួនដើម្បីស្រាវជ្រាវ និងអភិវឌ្ឍនៅក្នុងប្រទេស។ ស្របពេលជាមួយគ្នានេះ ប្រទេសដែលនៅលំដាប់ថ្នាក់លេខ5 លើប្រទេសកូរ៉េខាងត្បូងគឺប្រទេសស៊ុយអែត។ មូលហេតុសំខាន់ដែលធ្វើឱ្យប្រទេសនេះទទួលបានចំណាត់ថ្នាក់ល្អ គឺធនធានមនុស្សនៅក្នុងប្រទេសនេះភាគច្រើនជាមនុស្សដែលមានការសហការ និងចែករំលែកគំនិតដល់គ្នាច្រើនបំផុត ដែលធ្វើឱ្យប្រសិទ្ធភាពនៃការធ្វើការងារ និងការបង្កើតថ្មីបានកើនឡើងយ៉ាងឆាប់រហ័ស។
ប្រទេសដែលឈរនៅលំដាប់ថ្នាក់លេខ4 ផ្នែកនវានុវត្តន៍សេដ្ឋកិច្ច គឺកោះតៃវ៉ាន់។ តំបន់នេះមិនធំពេកនោះទេ តែវាជាកន្លែងដែលមានការអភិវឌ្ឍផ្នែកវិទ្យាសាស្ត្របានយ៉ាងល្អ ព្រោះប្រជាជននៃកោះតៃវ៉ាន់ភាគច្រើនទទួលបានការអប់រំល្អៗពីបរទេស និងបន្តយកចំណេះដឹងទាំងអស់នោះមកចែករំលែកបន្ថែមក្នុងប្រព័ន្ធអប់រំ និងការធ្វើការងារជាក់ស្តែង។ ចំណាត់ថ្នាក់លេខ4 នេះមិនមែនទើបតែទទួលបាននៅឆ្នាំនេះទេ កាលពីឆ្នាំមុនតៃវ៉ាន់ក៏ស្ថិតក្នុងចំណាត់ថ្នាក់ល្អនេះដែរ។
ប្រទេសដែលឈរនៅលំដាប់ថ្នាក់លេខ3 គឺប្រទេសស្វ៊ីស។ ប្រទេសនេះ ជាតំបន់ដែលមានការចុះឈ្មោះម៉ាកសញ្ញាអាជីវកម្ម (trademark) ខ្ពស់បំផុតលើពិភពលោក។ ស្វ៊ីសលើកតម្កើងការបង្កើតថ្មី និងប្រណីតភាពនៃផលិតផលរបស់ខ្លួន ដែលធ្វើឱ្យស្នាដៃនីមួយៗប្រកបដោយគុណតម្លៃ ដែលជាកត្តាជំរុញកាន់តែខ្លាំងដល់ការបង្កើតថ្មីដើម្បីចែកចាយលើពិភពលោក។ ចំណែកឯប្រទេសដែលឈរនៅលំដាប់ថ្នាក់លេខ2 ក្នុងតារាងនៃឆ្នាំនេះគឺ សហរដ្ឋអាមេរិក ជាតំបន់ដែលមានវិទ្យាស្ថានស្រាវជ្រាវល្អបំផុតលើពិភពលោក។ ប្រទេសនេះបានចំណាយថវិកាជាតិយ៉ាងច្រើនលើការបណ្តុះបណ្តាល និងការស្រាវជ្រាវ ដើម្បីធ្វើយ៉ាងណាជំរុញប្រជាជនខ្លាំងៗឱ្យបញ្ចេញស្នាដៃលើការបង្កើតថ្មីសម្រាប់ប្រកួតប្រជែងផ្នែកពាណិជ្ជកម្ម។
ចំពោះប្រទេសដែលឈរនៅលំដាប់ថ្នាក់លេខ1 លើពិភពលោកឆ្នាំនេះផ្នែកនវានុវត្តន៍ គឺអាល្លឺម៉ង់។ មូលហេតុដែលប្រទេសនេះទទួលបានចំណាត់ថ្នាក់ល្អបំផុត ដោយសារតែអាល្លឺម៉ង់ជាប្រទេសដែលជំរុញ និងលើកទឹកចិត្តខ្លាំងបំផុតផ្នែកស្រាវជ្រាវ សហការ និងពាណិជ្ជកម្ម៕
