តាមធម្មតាស្បែកដែលមិនធ្លាប់ប៉ះពាល់ទៅនឹងអ្វីដែលធ្ងន់ៗ គឺប្រាកដជាមានសភាពទន់ស្អាត ប៉ុន្តែប្រសិនបើវាទទួលរងនូវការប៉ះ ឬកកិតខ្លាំងៗ ដោយវត្ថុដែលរឹងៗញឹកញាប់នោះ ស្បែកដែលធ្លាប់តែមានសភាពទន់នឹងប្រែមកជារឹងក្រិនវិញជាក់ជាមិនខាន។ ភាគច្រើនគេសង្កេតឃើញថា ស្បែកដែលមានសភាពក្រិននេះ តែងតែកើតនៅម្តុំបរិវេណបាតដៃ ឬបាតជើង ព្រោះម្តុំនេះតែងតែត្រូវទទួលនូវការប៉ះពាល់នឹងរបស់ដែលរឹងៗច្រើនជាងកន្លែងផ្សេងទៀត។ អ្នកប្រាកដជាដឹងច្បាស់ណាស់ថា នៅពេលដែលស្នាមក្រិនអស់ទាំងនេះមានវត្តមាននៅលើផ្នែកណាមួយនៃរាងកាយរបស់អ្នកហើយនោះ ភាពស្រស់ស្អាតរបស់អ្នកក៏នឹងត្រូវកាត់បន្ថយទៅតាមនោះដែរ ហេតុនេះប្រសិនបើឃើញវាបង្ហាញខ្លួនពេលណា អ្នកត្រូវតែកម្ចាត់វាចោលជាដាច់ខាត។ តាមដានអត្ថបទខាងក្រោម ដើម្បីបានដឹងពីវិធីនៃការកម្ចាត់ស្បែកក្រិនជាមួយ ឡារ៉ែន ដូចតទៅ៖
ស្វែងរកពីមូលហេតុ ហើយធ្វើការផ្លាស់ប្តូរ
ចង់កម្ចាត់ស្នាមក្រិនអស់ទាំងនេះបាន អ្នកត្រូវដឹងពីមូលហេតុដែលនាំឱ្យស្បែករបស់អ្នកមានបញ្ហាជាមុនសិន ព្រោះថានៅពេលដែលអ្នកបានដឹងហើយនោះ វានឹងផ្តល់នូវភាពងាយស្រួលដល់អ្នកក្នុងការការពារ និងព្យាយាមចៀសឱ្យផុតពីសកម្មភាពអស់ទាំងនោះ។ ស្បែកដៃរបស់អ្នកអាចក្លាយជាក្រិន ដោយសារតែការចាប់កាន់របស់ដែលរឹង ការប្រើកម្លាំងខ្លាំង ឬការដែលដៃរបស់អ្នកប៉ះទង្គិចជាមួយនឹងរបស់អ្វីមួយដដែលៗជាដើម។ បន្ទាប់ពីបានដឹងពីមូលហេតុដែលនាំឱ្យស្បែកក្រិនហើយនោះ អ្នកគួរតែព្យាយាមកែទម្លាប់ទាំងនោះចេញ។ ការពាក់ស្រោមដៃ ដើម្បីការពារដៃក្នុងពេលដែលអ្នកធ្វើការ ការកាត់បន្ថយការលើក ចាប់ ឬកាន់វត្ថុធ្ងន់ៗមួយចំនួនគឺជារឿងដែលអ្នកត្រូវធ្វើ ដើម្បីស្បែកដៃស្រស់ស្អាតមិនមានស្នាមក្រិន។
បំបាត់ស្នាមក្រិនដោយថ្មខាត់ដ្បិតថា ស្បែកដែលមានសភាពក្រិននឹងបាត់ទៅវិញដោយឯកឯង ប៉ុន្តែវាត្រូវចំណាយពេលវេលាយូរបន្តិច ដូច្នេះបើអ្នកចង់ឱ្យស្នាមនេះឆាប់បាត់ទៅវិញនោះអ្នកអាចសាកល្បងខាត់វាចេញដោយប្រើថ្មសំលៀង ឬក្រដាសខាត់ក៏បាន។ បន្ទាប់ពីខាត់ស្នាមក្រិនចេញម្តងបន្តិចៗរួចហើយ អ្នកត្រូវប្រើផលិតផលផ្តល់សំណើមលាបពីលើស្បែកដែលក្រិននោះ។ ការធ្វើបែបនេះគឺដើម្បីឱ្យស្បែករបស់អ្នកមានសំណើមគ្រប់គ្រាន់ និងការពារកុំឱ្យមានរបួសនៅលើស្បែកដែលក្រិននោះ៕
