រដ្ឋាភិបាលអង់គ្លេសតាមរយៈមន្ត្រីជាន់ខ្ពស់របស់ខ្លួនបានប្រកាសថា អង់គ្លេសនឹងផ្តល់ការអនុគ្រោះពន្ធនាំចូលទំនិញពីកម្ពុជាតាមគំរូសហភាពអឺរ៉ុបដែរ បន្ទាប់ពីខ្លួនចាកចេញពីអឺរ៉ុបជាផ្លូវការនាពេលខាងមុខ។ ប៉ុន្តែជាថ្នូរនឹងការធ្វើបែបនេះ អង់គ្លេសក៏មានលក្ខខណ្ឌមួយសម្រាប់កម្ពុជាដែរ គឺសុំឱ្យកម្ពុជាគាំទ្រខ្លួនធ្វើជាដៃគូសន្ទនាជាមួយអាស៊ាននៅពេលដែលខ្លួនលែងជាសមាជិកសហភាពអឺរ៉ុបទៀតនោះ។
ការប្រកាសផ្តល់ការអនុគ្រោះពន្ធទំនិញនាំចូលពីកម្ពុជារបស់អង់គ្លេសនេះ បានធ្វើឡើងដោយលោកស្រី Heather Wheeler អនុរដ្ឋលេខាធិការសភា និងជារដ្ឋមន្ត្រីទទួលបន្ទុកកិច្ចការអាស៊ី និងប៉ាស៊ីហ្វិកនៃក្រសួងការបរទេសអង់គ្លេសនៅក្នុងជំនួបជាមួយលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជាកាលពីថ្ងៃទី17 ខែកញ្ញា ឆ្នាំ2019។
លោកស្រី Heather Wheeler បានប្រាប់ប្រមុខការទូតកម្ពុជាថា អង់គ្លេសនឹងចាកចេញពីសហភាពអឺរ៉ុបនាពេលខាងមុខនេះ ប៉ុន្តែអង់គ្លេសនៅតែផ្តល់ការអនុគ្រោះពន្ធផ្នែកពាណិជ្ជកម្មដល់ប្រទេសកម្ពុជា ព្រមទាំងប្រទេសដែលមានការអភិវឌ្ឍតិចតួចចំនួន 47ប្រទេសទៀត។ នេះបើតាមបញ្ជាក់ឱ្យដឹងរបស់លោក មាស គឹមហេង អនុរដ្ឋលេខាធិការក្រសួងការបរទេសកម្ពុជានៅក្រោយកិច្ចប្រជុំនោះ។
លោក មាស គឹមហេង ក៏បានអះអាងឱ្យដឹងដែរថា ជាមួយនឹងការសន្យាបែបនេះ លោកស្រី Heather Wheeler ក៏បានស្នើសុំ និងរំពឹងថា កម្ពុជានឹងគាំទ្រខ្លួនក្នុងការធ្វើជាដៃគូសន្ទនាជាមួយនឹងអាស៊ាននៅពេលណាដែលអង់គ្លេសចេញផុតពីសហភាពអឺរ៉ុប។ ជាការឆ្លើយតបវិញ រដ្ឋមន្ត្រីក្រសួងការបរទេសកម្ពុជាក៏បានសន្យាទៅវិញថា កម្ពុជានឹងគាំទ្របេក្ខភាពអង់គ្លេសក្នុងរឿងនេះ។
“ប្រសិនបើគាត់ផ្តល់ប្រព័ន្ធអនុគ្រោះពន្ធដល់កម្ពុជាយើងនោះ យើងនឹងទទួលបានប្រយោជន៍ ដោយសារប្រទេសអង់គ្លេសបច្ចុប្បន្ននេះនៅក្នុងសហគមន៍អឺរ៉ុប បន្ទាប់ពីអាល្លឺម៉ងមក គឺអង់គ្លេសជាប្រទេសទី2 ហើយ ដែលយើងនាំចេញទៅអឺរ៉ុបគឺអាល្លឺម៉ង់ហ្នឹង ជាង 1ពាន់លានដុល្លារ ទៅអង់គ្លេសហ្នឹង ក៏ជាង 1ពាន់លានដុល្លារដូចគ្នាដែរ”។ ការផ្តល់ប្រព័ន្ធអនុគ្រោះពន្ធពីប្រទេសមហាអំណាចអង់គ្លេសនឹងក្លាយជាការរួមចំណែកជួយអភិវឌ្ឍន៍កម្ពុជា ហើយកម្ពុជានឹងទទួលបានផលប្រយោជន៍បន្ថែមទៀតកាន់តែច្រើនឡើង។ នេះជាការបញ្ជាក់បន្ថែមពីលោក មាស គឹមហេង។
សូមកត់សម្គាល់ថា ការប្រកាសពីជំហររបស់អង់គ្លេសនេះ ធ្វើឡើងស្របពេលដែលកម្ពុជាកំពុងតែប្រឈមមុខនឹងការបាត់បង់ប្រព័ន្ធអនុគ្រោះពន្ធEBA ពីសហភាពអឺរ៉ុប ដោយសារតែបញ្ហាសិទ្ធិមនុស្ស និងលទ្ធិប្រជាធិបតេយ្យ ក៏ប៉ុន្តែនៅពេលនេះកម្ពុជាកំពុងមានសុទិដ្ឋិនិយមឡើងវិញ ក្រោយការប្រកាសរបស់អង់គ្លេសបែបនេះ។ លោក មាស គឹមហេង បានគូសបញ្ជាក់ថា សម្រាប់កម្ពុជា នេះគឺជាចំណុចវិជ្ជមាន។ វិជ្ជមានដោយហេតុថា អង់គ្លេស គឺជាទីផ្សារធំទី2 ហើយបន្ទាប់ពីអាល្លឺម៉ង់ដែលបានទិញទំនិញពីកម្ពុជាតាមច្រកទីផ្សារសហភាពអឺរ៉ុប។
យោងតាមមន្ត្រីពាណិជ្ជកម្មកម្ពុជា កិច្ចសហប្រតិបត្តិការពាណិជ្ជកម្ម រវាងកម្ពុជា និងចក្រភពអង់គ្លេស មានសម្ទុះរីកចម្រើនពី1ឆ្នាំទៅ 1ឆ្នាំ។ ទំហំពាណិជ្ជកម្មរវាងកម្ពុជា និងអង់គ្លេសមានទំហំ 465លានដុល្លារក្នុងរយៈពេល 6ខែដើមឆ្នាំ2019នេះ។
ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជាបានឱ្យដឹងថា នៅឆមាសទី1 ឆ្នាំ2019នេះ កម្ពុជាបាននាំចេញទៅអង់គ្លេសចំនួន 450លានដុល្លារ ចំណែកអង់គ្លេសបាននាំចូលមកកម្ពុជាមានចំនួន 15លានដុល្លារ។
កាលពីឆ្នាំ2018 ទំហំពាណិជ្ជកម្មនៃប្រទេសទាំង2 មានចំនួន 1ពាន់ 83លានដុល្លារ ក្នុងនោះកម្ពុជានាំទៅអង់គ្លេសមានចំនួន 1ពាន់ 18លានដុល្លារ ចំណែកអង់គ្លេសនាំមកកម្ពុជា មានតែ 65លានដុល្លារ។
នៅឆ្នាំ2017 ទំហំពាណិជ្ជកម្មរវាងប្រទេសទាំង2 មានទឹកប្រាក់ 1ពាន់ 44លានដុល្លារ ក្នុងនោះកម្ពុជានាំទៅអង់គ្លេសចំនួន 1ពាន់ 14លានដុល្លារ ចំណែកអង់គ្លេសនាំចូលមកកម្ពុជាវិញ ចំនួន 30លានដុល្លារ។
គួរបញ្ជាក់ឱ្យដឹងដែរថា ផលិតផលរបស់កម្ពុជាដែលអង់គ្លេសបញ្ជាទិញភាគច្រើន គឺសម្លៀកបំពាក់ ផលិតផលស្បែកជើង និងកង់។ ចំណែកទំនិញដែលកម្ពុជានាំចេញទៅអង់គ្លេសរួមមាន សម្លៀកបំពាក់ ស្បែកជើង កង់ជិះ អង្ករ និងផលិតកសិកម្មផ្សេងទៀត។
ការផ្តល់ប្រព័ន្ធអនុគ្រោះពន្ធពីប្រទេសមហាអំណាចអង់គ្លេស ត្រូវបានគេពណ៌នាថា នឹងរួមចំណែកជួយអភិវឌ្ឍកម្ពុជា ហើយកម្ពុជានឹងទទួលបានផលប្រយោជន៍បន្ថែមទៀតកាន់តែច្រើនឡើង។ ចក្រភពអង់គ្លេស គឺជាដៃគូពាណិជ្ជកម្មដ៏សំខាន់ផងដែរសម្រាប់កម្ពុជាក្នុងតំបន់អឺរ៉ុប ហើយប្រទេសអង់គ្លេស គឺជាទីផ្សារទី3 ក្នុងតំបន់អឺរ៉ុបដែលទិញអង្ករពីកម្ពុជាច្រើនជាងគេ៕
