ស្មាតហ្វូនកំពូលៗភាគច្រើនពេលឥឡូវនេះបានទម្លាក់ចោលរន្ធកាស ដោយបន្សល់ទុកត្រឹមរន្ធ USB Type-C ប្រើទាំងភ្ជាប់កាស សាកថ្ម និងផ្លាស់ប្ដូរទិន្នន័យនានា ហើយបើចង់ភ្ជាប់កាសខ្សែធម្មតា ក៏តម្រូវឱ្យមានឌុយបំបែក ឬឌុយក្បាល USB Type-C តែម្តង។
ចំណែកកាស Bluetooth កំពុងមានភាពពេញនិយម ងាយស្រួលភ្ជាប់ប្រើ គ្រប់ទីកន្លែងអាចប្រើបានស្ទើរតែគ្រប់ស្មាតហ្វូន។ តែយ៉ាងណាក៏ដោយ សំឡេងតាម Bluetooth នៅមានភ្ជាប់ជាមួយសំឡេងរំខាន ដែលនៅមិនទាន់អាចជំនួសរន្ធកាស Headphone Jack បានឡើយ។ ខាងក្រោមនេះ គឺព្រំដែនកំណត់នៃគុណវិបត្តិនៃការប្រើកាសឥតខ្សែទាំងនោះ...។
1) អ្នកប្រើប្រាស់ភាគច្រើន មិនអាចឮភាពខុសគ្នាបានទេ បើមានអាយុចាប់ពីជាង 24ឆ្នាំឡើងទៅ។ កាស Bluetooth ល្អស្ដាប់ បើអ្នកស្ថិតនៅក្នុងទីតាំងដែលមានសំឡេងរំខាន ឬទីប្រជុំជន តែបើស្ដាប់នៅក្នុងទីតាំងស្ងប់ស្ងាត់ កាសខ្សែជាជម្រើសដ៏ល្អបំផុត។
2) រាល់ Bluetooth Codec មានបញ្ហាកំណត់ខ្នាតគុណភាពមិនសូវល្អទេ។
3) មិនទាន់មាន Codec ឬកាស Bluetooth ណាអាចប្រជែងនឹងគុណភាពរលកសញ្ញាខ្សែបានទេ។ ត្រង់ចំណុចនេះ គេបានសិក្សាបន្ថែមដោយប្រើគំរូសិក្សាពីសំឡេង (Psychoacoustic) AAC ប៉ុន្តែលទ្ធផលចេញមក អាចកាត់បន្ថយទិន្នន័យតិចតួច ដែលធម្មតាមិនអាចសម្គាល់ដឹងបានឡើយ។
បើយោងតាមវេបសាយ SoundGuys បានរកឃើញថា ចន្លោះពីឧបករណ៍ទៅកាស Bluetooth មានសំឡេងរំខានខ្ពស់(កម្រិតហ្វ្រេកង់ខ្ពស់)។ ប្រភពដដែលបានបន្ថែមថា កាស Bluetooth បើសម្រាប់ក្មេងៗមិនគួរស្តាប់នោះទេ។ ជាងនេះទៀត កាសប្រើ AAC ដូចជា AirPods របស់ Apple ក៏មិនល្អសម្រាប់ប្រើជាមួយទូរស័ព្ទ Android ដែរ។
ការសិក្សាបានបរិយាយលម្អិតថា ការសាកល្បងរលកសញ្ញា AAC ពីទូរស័ព្ទ Android ដូចជា Huawei P20 Pro, LG V30 និង Samsung Galaxy Note 8 សុទ្ធតែមានភាពខុសគ្នា ដែលមូលហេតុនេះគេបានរកឃើញដោយសារមុខងារសន្សំសំចៃថ្ម មានHardware ខុសៗគ្នារបស់ប្រព័ន្ធ Ecosystem Android ទើបវាមានឥទ្ធិពលលើសំឡេងបែបនេះ ដែលខុសពី iOS Device។
វិធីល្អបំផុត គួរស្ដាប់ក្រោមសំឡេង 90dB។ ម្យ៉ាងទៀត កាសខ្សែនៅតែផ្ដល់គុណភាពសំឡេងបានល្អ ធូរថ្លៃជាង ជាពិសេសស្ដាប់នៅក្នុងស្ថានភាពស្ងប់ស្ងាត់ គ្រាន់តែមិនសូវទាន់សម័យនឹងគេប៉ុណ្ណឹងឯង៕
