រដ្ឋលេខាធិការក្រសួងពាណិជ្ជកម្មបានឱ្យដឹងថា ការផ្តល់សុពលភាពលើឯកសារទស្សនទានយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក គឺជាផែនទីបង្ហាញផ្លូវមួយដល់ការអភិវឌ្ឍវិស័យពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។
លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម បានថ្លែងថា៖ “ការវិវឌ្ឍដ៏លឿននៃបច្ចេកវិទ្យាឌីជីថលបានបង្កើតឡើងនូវកាលានុវត្តភាព ក៏ដូចជាការប្រឈមជាច្រើនដែលទាមទារឱ្យមានការគិតគូរឱ្យច្បាស់លាស់លើការប្រព្រឹត្តទៅនៃការងារនានា ការពឹងផ្អែកបច្ចេកវិទ្យាជាមធ្យោបាយ ហើយការងារទាំងនេះត្រូវបានរំលេចយ៉ាងច្បាស់លាស់ប្រកបដោយចក្ខុវិស័យវែងឆ្ងាយ នៅក្នុងយុទ្ធសាស្ត្រចតុកោណដំណាក់កាលទី4 របស់រាជរដ្ឋាភិបាលអាណត្តិទី6 ត្រង់មុំទី3 ដែលតម្រូវឱ្យមានការពិនិត្យ និងត្រៀមខ្លួនសម្រាប់សេដ្ឋកិច្ចឌីជីថល និងឆ្លើយតបនឹងបដិវត្តន៍ឧស្សាហកម្មទី4”។
លោកជំទាវបន្តទៀតថា ជាកិច្ចឆ្លើយតប និងចូលរួមវិភាគទានទៅលើការសម្រេចបាននូវ គោលដៅអាទិភាពទាំងនោះ ក្រសួងពាណិជ្ជកម្មបានសម្រេចចិត្តធ្វើការរៀបចំយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ដើម្បីជាផែនទីបង្ហាញផ្លូវមួយច្បាស់លាស់ដល់ការអភិវឌ្ឍវិស័យពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។
ការរៀបចំយុទ្ធសាស្ត្រនេះដែរ ក៏ជាតម្រូវការដ៏សំខាន់ និងឆ្លើយតបទៅនឹងអនុសាសន៍មួយ ចំនួនទៀតនៅក្នុងឯកសារ និងយុទ្ធសាស្ត្រផ្សេងៗ ដូចជាឯកសារ Cambodia eTrade Readiness Assessment ដែលបានរៀបចំឡើងដោយអង្គការ UNCTAD នៅឆ្នាំ2017 និងថ្មីៗនេះនៅក្នុងសមា ហរណកម្មពាណិជ្ជកម្មកម្ពុជា 2019-2023 ជាពិសេសជំពូកទី11 ស្ដីពីពាណិជ្ជកម្មអេឡិចត្រូនិក និងជំពូកទី12 ស្ដីពីសេដ្ឋកិច្ចឌីជីថល និងបដិវត្តន៍ឧស្សាហកម្មទី4។
សូមបញ្ជាក់ថា បច្ចុប្បន្នប្រព័ន្ធព័ត៌មានវិទ្យាបានដើរតួនាទីយ៉ាងសំខាន់ក្នុងកិច្ចការសម្រួលពាណិជ្ជកម្ម តាមរយៈការកាត់បន្ថយនីតិវិធីរដ្ឋបាល ជួយសន្សំថវិកា និងពេលវេលានាំចេញ-នាំចូល ព្រមទាំងធានាបាននូវតម្លាភាព និងប្រសិទ្ធភាពខ្ពស់ ស្របតាមគោលការណ៍នៃអភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណដំណាក់កាលទី4 របស់រាជរដ្ឋាភិបាលកម្ពុជា។
នៅក្នុងបរិបទនៃសេដ្ឋកិច្ចឌីជីថល ប្រទេសជាច្រើនរួមទាំងកម្ពុជាបានកំពុងធ្វើកំណែទម្រង់នីតិវិធីរដ្ឋបាលដោយប្រើប្រាស់ប្រព័ន្ធព័ត៌មានវិទ្យាដើម្បីបង្កើនល្បឿន និងប្រសិទ្ធភាពនៃការដោះដូរទំនិញ និងលើកកម្ពស់ភាពប្រកួតប្រជែងរបស់ខ្លួន។
ដូច្នេះកិច្ចប្រឹងប្រែងរបស់ក្រសួងពាណិជ្ជកម្មក្នុងការធ្វើទំនើបកម្មសេវាសាធារណៈ តាមរយៈការដាក់ឱ្យប្រើប្រាស់នូវប្រព័ន្ធស្វ័យប្រវត្តិកម្មសំខាន់ៗជាមួយប្រព័ន្ធបង់ប្រាក់អេឡិចត្រូនិក និងតភ្ជាប់ទៅកាន់បញ្ជរជាតិតែមួយ ការធ្វើបច្ចុប្បន្នភាពផែនការមេបច្ចេកវិទ្យា (ITC Master Plan) ការដាក់ឱ្យដំណើរការបច្ចេកវិទ្យា Cloud និងការដាក់បញ្ចូលផែនការសកម្មភាពថ្មីៗស្តីពីកិច្ចសម្រួលពាណិជ្ជកម្មនៅក្នុងយុទ្ធសាស្ត្រសមាហរណកម្មពាណិជ្ជកម្មកម្ពុជា (CTIS) ឆ្នាំ2019-2023 ជាដើម។
លោកជំទាវ តឹករ៉េត កំរង ក៏បានបន្ថែមទៀតដែរថា៖“លើសពីនោះទៀត យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ក៏ឆ្លើយតបទៅនឹងតម្រូវការរបស់វិស័យឯកជនដែលត្រូវការឯកសារមួយសម្រាប់បញ្ជាក់ជូនអំពីចក្ខុវិស័យ និងគោលនយោបាយរបស់រដ្ឋាភិបាលក្នុងការអភិវឌ្ឍវិស័យនេះ ដែលជាចលករមួយសំខាន់ក្នុងការសំដៅជំរុញនៃការធ្វើពាណិជ្ជកម្មតាមរយៈការប្រើប្រាស់បច្ចេកវិទ្យា”។
លោកជំទាវ តឹករ៉េត កំរង បានបញ្ជាក់ថា៖“ការរៀបចំយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិកនៅវេលានេះ ជាការមួយដ៏ត្រឹមត្រូវ គាប់ជួនជាមួយនឹងការជិតសម្រេចបាននូវច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិក ហើយសេចក្ដីព្រាងច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិកនេះបានឆ្លងផុតកិច្ចប្រជុំជាមួយគណៈកម្មការជំនាញនៃរដ្ឋសភារួចហើយ បន្ទាប់ទៀតនឹងត្រូវបញ្ជូនបន្តដើម្បីស្នើសុំការអនុម័តដោយរដ្ឋសភាក្នុងពេលដ៏ខ្លីខាងមុខនេះ”៕
